ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަންގައި ސަރުކާރު ހިންގާ މައި ޕާޓީ، ޕީއެންސީގެ ޓިކެޓުގައި ވާދަކުރާނެ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގެ ވޯޓުލުން މިއަދު ހެނދުނު ފަށައިފި އެވެ.

މިއަދު ހެނދުނު 9:00 އިން ފެށިގެން ހަވީރު 4:00 އާ ހަމައަށް ކުރިއަށްދާ މި ވޯޓުލުމުގައި، އެ ދާއިރާގައި ރަޖިސްޓްރީވެފައިވާ ޕީއެންސީގެ މެންބަރުން ވޯޓުލުމަށް ދެ ސަރަހައްދެއްގައި ވަނީ ފޮށި ބަހައްޓާފަ އެވެ. އެގޮތުން އައްޑޫ ހިތަދޫގައި ދިރިއުޅޭ މެންބަރުންނަށް ހިތަދޫ ސްކޫލުގައި ވޯޓު ފޮށި ބަހައްޓާފައިވާއިރު، މާލެ އާއި އެހެނިހެން ރަށްރަށުގައި ތިބި އެ ދާއިރާގެ މެންބަރުން ވޯޓުލުމަށް ހަމަޖެހިފައިވަނީ މާލޭގެ ކަލާފާނު ސްކޫލުގަ އެވެ.

މި ޕްރައިމަރީގައި ވޯޓުލުމުގެ ހައްގު ޖުމްލަ 727 މެންބަރުންނަށް ލިބިގެންވެ އެވެ.

ޕްރައިމަރީގައި ވާދަކުރައްވާ ކެންޑިޑޭޓުން:

ޕީއެންސީގެ ޓިކެޓަށް ވާދަކުރައްވަނީ ދެ ބޭފުޅުންނެވެ. އެއީ:

މުހައްމަދު ސިނާން - އެ ދާއިރާގެ ކުރީގެ މެންބަރު.

އަހުމަދު ސައީދު (ސޮޑާ) - ހިތަދޫ މޫލެކެޑެ ދާއިރާގެ ކައުންސިލަރު.

ސައީދަކީ މި މަހުގެ 4 ވަނަ ދުވަހު ބޭއްވި ލޯކަލް ކައުންސިލް އިންތިހާބުގައި ޕީއެންސީގެ ޓިކެޓުގައި ވާދަކުރައްވައި، އެމްޑީޕީގެ ކެންޑިޑޭޓާ ވާދަކޮށް އެންމެ 9 ވޯޓުގެ ތަފާތުން ނާކާމިޔާބީއާ ކުރިމަތިލައްވަން ޖެހިވަޑައިގެންނެވި ބޭފުޅެކެވެ.

ގޮނޑި ހުސްވި ސަބަބު:

ހިތަދޫ އުތުރު ދާއިރާގެ މަޖިލިސް ގޮނޑި ހުސްވީ، އެ ދާއިރާގެ މެންބަރު ކަމުގައި ހުންނެވި މުހައްމަދު ސިނާން އިސްލާމިކް ބޭންކުން ނެގި ލޯނަކަށް ދައްކަންޖެހޭ 2.5 މިލިއަން ރުފިޔާ ނުދެއްކި މައްސަލައިގައި، އޭނާގެ މެންބަރުކަމުގެ ޝަރުތު ގެއްލިފައިވާ ކަމަށް މި މަހުގެ 12 ވަނަ ދުވަހު ސުޕްރީމް ކޯޓުން ހުކުމް ކުރުމާ ގުޅިގެންނެވެ.

ޕީއެންސީން ޕްރައިމަރީއަކަށް ދިޔަ ނަމަވެސް، އިދިކޮޅު އެމްޑީޕީގެ ފަރާތުން މި ބައި އިލެކްޝަންގައި ވާދަކުރުމަށް ކުރިމަތިލެއްވީ އައްޑޫގެ ކުރީގެ މޭޔަރު އަބްދުﷲ ސޯދިގު (ސޯބެ) އެކަނި ކަމަށްވާތީ، ޕްރައިމަރީއަކާ ނުލައި އޭނާއަށް ވަނީ އެމްޑީޕީގެ ޓިކެޓު ކަށަވަރުވެފަ އެވެ.

އިލެކްޝަންސް ކޮމިޝަނުން ނިންމާފައިވަނީ ހިތަދޫ އުތުރު ދާއިރާގެ ބައި އިލެކްޝަން އަންނަ ޖޫން މަހުގެ 6 ވަނަ ދުވަހު ބޭއްވުމަށެވެ.