މުޖުތަމައުގައި ހިނގަމުންދާ ނަފްސާނީ ގޮތުން އަސަރުކުރުވާ ފަދަ ހިތާމަވެރި ހާދިސާތަކާ ގުޅިގެން، ހަގީގަތާ ހިލާފު ވާހަކަތަކާއި ކަށަވަރުނުވާ މައުލޫމާތު ނުފެތުރުމަށް މިނިސްޓްރީ އޮފް ހެލްތުން އިލްތިމާސްކޮށްފި އެވެ.

މިކަމާ ގުޅިގެން އެ މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ، ފަހަކަށް އައިސް ހިނގަމުންދާ ހިތާމަވެރި ހާދިސާތަކާމެދު ނުހަނު ބޮޑަށް ކަންބޮޑުވާ ކަމަށެވެ. އަދި މިފަދަ ނާޒުކު ދަނޑިވަޅުތަކުގައި އެކަކު އަނެކަކަށް ހަމްދަރުދީއާއި އޯގާތެރިކަމާއެކު މުއާމަލާތް ކުރުމަކީ މުހިންމު ކަމެއްކަން ފާހަގަކޮށްފައިވެ އެވެ.

ހެލްތު މިނިސްޓްރީން ބާރުއަޅާފައިވަނީ މީސްމީޑިއާގައި ފަތުރާ ކަށަވަރުނުވާ މައުލޫމާތުތަކާއި ހިތްދަތި މަންޒަރުތަކުގެ ސަބަބުން، ނަފްސާނީ ގޮތުން ބަލިކަށިވެފައިވާ ފަރާތްތަކަށާއި ވަކިވެދިޔަ ފަރާތްތަކުގެ އާއިލާތަކަށް ފޫނުބެއްދޭ ފަދަ އަސަރުތަކެއް ކުރާނެ ކަމަށެވެ. އެހެންކަމުން، ހަގީގަތާ ހިލާފު ވާހަކަ ފެތުރުމުގެ ބަދަލުގައި އެކަކު އަނެކަކަށް އުއްމީދާއި ހިތްވަރު ދިނުމަށް އާންމުންނަށާއި މީޑިއާތަކަށް އިލްތިމާސްކޮށްފައިވެ އެވެ.

"ކޮންމެ އިންސާނެއްގެ ފުރާނައަކީ މަތިވެރި އަމާނާތެއް. އަނެކާގެ ވާހަކަ ކަނުލާ އަޑުއަހާލުމަކީ ނުވަތަ ދެވޭ ކުޑަ އޯގާތެރިކަމަކީވެސް މީހެއްގެ ފުރާނަ ސަލާމަތްކުރުމަށް ލިބޭ ވަރަށް ބޮޑު ބާރަކަށް ވެގެންދާނެ،" ބަޔާނުގައިވެ އެވެ.

ނަފްސާނީ ދަތިތަކެއް ތަހައްމަލު ކުރަމުންދާ ފަރާތްތަކަށް އެހީތެރިކަން ފޯރުކޮށްދިނުމަށްޓަކައި، ނޭޝަނަލް މެންޓަލް ހެލްތު ހެލްޕްލައިން 1677 މެދުވެރިކޮށް 24 ގަޑިއިރު ނަފްސާނީ އެހީތެރިކަން ލިބޭނެ އިންތިޒާމު ވަނީ ހަމަޖައްސާފަ އެވެ.

މިނިސްޓްރީން އިތުރަށް ބުނެފައިވަނީ ނަފްސާނީ ދުޅަހެޔޮކަމަށް ދެވޭ ހިދުމަތްތައް ހަރުދަނާކުރުމަށް ފަންނީ ބޭފުޅުންނާއި ގުޅުންހުރި މުއައްސަސާތަކާއެކު މަސައްކަތް ކުރަމުންދާ ކަމަށެވެ. އަދި ރައްކާތެރި އޯގާތެރި މުޖުތަމައެއް ބިނާކުރުމަކީ އެންމެންގެ ޝާމިލު ޒިންމާއެއް ކަމަށްވެސް އެ ވުޒާރާއިން ފާހަގަކޮށްފައިވެ އެވެ.