ދިވެހިރާއްޖޭގެ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ރިޒާވް ބޭންކް އޮފް އިންޑިއާ (އާރުބީއައި) އާއެކު ވެފައިވާ 400 މިލިއަން ޑޮލަރުގެ ކަރަންސީ ސްވެޕް ފެސިލިޓީ ދައްކައި ހަލާސްކޮށްފި އެވެ.

މި ފެސިލިޓީއަކީ ސާކް ގައުމުތަކަށް ކަނޑައަޅާފައިވާ 'ފްރޭމްވޯކް އޮން ކަރަންސީ ސްވެޕް އެރޭންޖްމަންޓް ފޯ ސާކް ކަންޓްރީޒް 2024-2027' ގެ ދަށުން، ޔޫއެސް ޑޮލަރު/ޔޫރޯ ސްވެޕް ވިންޑޯގެ ތެރެއިން 2024 ވަނަ އަހަރު އޮކްޓޫބަރު މަހު އެމްއެމްއޭއިން ބޭނުންކުރި ފެސިލިޓީއެކެވެ.

މީގެ އިތުރުން، ދެ ގައުމުގެ ދެމެދުގައި ވެފައިވާ ކަރަންސީ ސްވެޕް އެއްބަސްވުމުގެ އިންޑިއަން ރޫޕީ (އައިއެންއާރު) ވިންޑޯގެ ދަށުން، 30 ބިލިއަން އިންޑިއަން ރޫޕީގެ ފުރަތަމަ ފިޔަވަހީގެ ފައިސާ ނެގުމުގެ ހުއްދަ އިންޑިއާ ސަރުކާރުން ދެއްވާފައިވާތީ، ދިވެހި ސަރުކާރުން ވަނީ އެކަމަށް މަރުހަބާ ކިޔާފަ އެވެ. މި އެއްބަސްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު 2024 ވަނަ އަހަރު އޮކްޓޫބަރު މަހު އިންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިން އާރުބީއައި އާއި އެމްއެމްއޭއާ ދެމެދު ސޮއިކުރެވުނު އެއްބަސްވުމެކެވެ.

30 ބިލިއަން އިންޑިއަން ރޫޕީގެ މި ސްވެޕް ފެސިލިޓީގެ ސަބަބުން، ހުޅަނގު އޭޝިއާގެ މަސްރަހަށް އަންނަ ބަދަލުތަކާއެކުވެސް ރާއްޖޭގެ އިގްތިސާދީ ހަމަޖެހުން ވަރުގަދަކުރުމަށް ސަރުކާރުން ގެންގުޅޭ ފުޅާ ސިޔާސަތަށް ބޮޑު އެހީތެރިކަމެއް ލިބިގެންދާނެއެވެ. 2017-2024 ގެ ފްރޭމްވޯކްގެ ދަށުން ހަމަޖެހިފައިވާ މި އައިއެންއާރު ސްވެޕް ވިންޑޯއަކީ ލުއި ފަސޭހަ ޝަރުތުތަކެއް އެކުލެވޭ، ނަތީޖާ ނެރެދޭނެ ވަސީލަތެކެވެ.

މި ހަރަކާތްތަކުގެ އިތުރުން، 2019 ވަނަ އަހަރު ސްޓޭޓް ބޭންކް އޮފް އިންޑިއާ (އެސްބީއައި) މެދުވެރިކޮށް ބަޖެޓް ސަޕޯޓުގެ ގޮތުގައި ނަގާފައިވާ 150 މިލިއަން ޑޮލަރުގެ ޓްރެޒަރީ ބިލުގެ ތެރެއިން 50 މިލިއަން ޑޮލަރު މިހާތަނަށް ސަރުކާރުން ވަނީ ދައްކައި ހަލާސްކޮށްފަ އެވެ.

30 ބިލިއަން ރޫޕީގެ ސްވެޕް ފެސިލިޓީ ހަމަޖެހިގެންދިއުމަކީ ރާއްޖެއާއި އިންޑިއާއާ ދެމެދު އޮތް ގާތް ގުޅުން ރަންގަޅަށް ހާމަކޮށްދޭ ކަމެކެވެ. އަދި މިއީ އިންޑިއާގެ 'ނެއިބަހޫޑް ފަސްޓް' ނުވަތަ އަވަށްޓެރި ގައުމުތަކަށް އިސްކަންދިނުމުގެ ސިޔާސަތުގެ ދަށުން ރާއްޖެއަށް ދެމުންގެންދާ އެއްބާރުލުން ރަމްޒުކޮށްދޭ ކަމެކެވެ.