ޑޮލަރުން އާމްދަނީ ލިބޭ ފަތުރުވެރިކަމުގެ ދާއިރާގެ މުވައްޒަފުންނަށް ހާއްސަކޮށްގެން ބޭންކް އޮފް މޯލްޑިވްސް (ބީއެމްއެލް) އިން އައު ހޯމް ފައިނޭންސިން ފެސިލިޓީއެއް ތައާރަފުކޮށްފި އެވެ.

އަހަރަކު 7.5 އިންސައްތައިގެ ފައިނޭންސިން ރޭޓަކާއެކު ތަައާރަފުކުރި މި ފެސިލިޓީއަކީ، ރާއްޖޭގައި މިވަގުތު ހިޔާވަހި ފައިނޭންސް ސްކީމް ފިޔަވައި، ބޯހިޔާވަހިކަމަށް ބޭންކަކުން ދޫކުރާ އެންމެ ކުޑަ ރޭޓެވެ. ރިސޯޓު، ގެސްޓްހައުސް، ހޮޓާ އަދި ސަފާރީތަކުގައި މަސައްކަތްކުރާ ދިވެހި މުވައްޒަފުންނަށް، ރާއްޖޭގެ ކޮންމެ ސަރަހައްދަކުންވެސް އަމިއްލަ ބޯހިޔާވަހިކަމެއް ހޯދުމަށް ލުއި ފަހި ފުރުސަތުތަކެއް ހޯދައިދިނުމުގެ ބޭނުމުގައި ތައާރަފުކުރި މި ފެސިލިޓީ، ބީއެމްއެލް އިސްލާމިކް މެދުވެރިކޮށްވެސް ލިބިގެންދާނެ ކަމަށް ބޭންކުން ހާމަކޮށްފައިވެ އެވެ.

މި ފެސިލިޓީ ތައާރަފުކުރުމާ ގުޅިގެން ބޭންކް އޮފް މޯލްޑިވްސްގެ ސީއީއޯ އަދި މެނޭޖިން ޑައިރެކްޓަރ މުހައްމަދު ޝަރީފް ވިދާޅުވީ، "މި ފެސިލިޓީ ފަރުމާކޮށްފައިވަނީ ރާއްޖޭގެ އިގްތިސާދުގައި އެންމެ މުހިންމު ދައުރެއް އަދާކުރާ ރިސޯޓުތަކާއި، ގެސްޓްހައުސްތަކާއި، ހޮޓާތަކުގެ އިތުރުން ސަފާރީތަކުގައި މަސައްކަތްކުރާ މުވައްޒަފުންނަށް ފަސޭހަކަމާއެކު ފައިނޭންސިން ލިބޭނެ މަގު ތަނަވަސްކޮށްދިނުމަށް" ކަމަށެވެ. އަދި "ފަތުރުވެރިކަމަކީ ރާއްޖޭގެ އިގްތިސާދުގެ މައިބަދަ ކަމަށްވާއިރު، މިއީ އެ ސިނާއަތުގައި މަސައްކަތްކުރާ މުވައްޒަފުންނަށާއި އެމީހުންގެ އާއިލާތަކަށް އެހީތެރިކަން ފޯރުކޮށްދިނުމަށް ބޭންކުން ދޭ އަހުމިއްޔަތުކަން ހާމަކޮށްދޭ ކަމެއް" ކަމަށްވެސް އޭނާ ވިދާޅުވި އެވެ.

މި ފެސިލިޓީއަށް އެދި ހުށަހެޅޭނީ ފަތުރުވެރިކަމުގެ ދާއިރާގައި ހިމެނޭ ރިސޯޓް، ގެސްޓްހައުސް، ހޮޓާ އަދި ސަފާރީތަކުގައި މަސައްކަތްކޮށް، ޑޮލަރުން މުސާރަ ލިބޭ ދިވެހީންނަށެވެ. ފެސިލިޓީ ދިނުމުގައި، ކަސްޓަމަރުގެ އާމްދަނީ ވަޒަންކުރާ ގޮތް ބަލާއިރު، ލިބޭ ސަރވިސް ޗާޖަށްވެސް ބަލާނެ ކަމަށާއި، ނަމަވެސް ހުށަހަޅާ އާމްދަނީ ވާންޖެހޭނީ ބޭންކް އޮފް މޯލްޑިވްސްގައި ހުޅުވާފައިވާ އެކައުންޓަށް ޖަމާވާ އާމްދަނީ ކަމަށް ބޭންކުން ބުނެ އެވެ.

ކަސްޓަމަރުންނަށް ބީއެމްއެލް މޮބައިލް ބޭންކިންގ އެޕް މެދުވެރިކޮށް މި ފެސިލިޓީއަށް އެދި ހުށަހެޅޭނެ ކަމަށް ބޭންކުން ހާމަކޮށްފައިވެ އެވެ. އަދި ފެސިލިޓީއާ ގުޅޭ އިތުރު މައުލޫމާތު ބޭންކް އޮފް މޯލްޑިވްސްގެ ރަސްމީ ވެބްސައިޓް https://www.bankofmaldives.com.mv/ އިން ލިބެން ހުންނާނެ ކަމަށްވެސް ބޭންކުން ބުނެ އެވެ.

ފަތުރުވެރިކަމަކީ ރާއްޖޭގެ އިގްތިސާދުގެ އެންމެ މުހިންމު ތަނބު ކަމަށްވާއިރު، ދާއިރާގައި ހަރަކާތްތެރިވާ ގިނަ އަދަދެއްގެ ދިވެހި މުވައްޒަފުންނަށް ބޯހިޔާވަހިކަން ހޯދުމަށް ކުރިމަތިވާ ދަތިތައް ހައްލުކޮށްދިނުމަށް ބީއެމްއެލް އިން ތައާރަފުކުރި މި ފެސިލިޓީ، ދާއިރާގެ ގިނަ ބަޔަކަށް ފައިދާހުރި ފުރުސަތެއް ކަމަށް ބެލެވެ އެވެ.