ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ފަށާފައިވާ "އޮޕަރޭޝަން ކުރަނގި" ގެ ދަށުން ކުރެވުނު މަސައްކަތުން، ގަވައިދާ އެއްގޮތަށް އުޅޭ ބިދޭސީންގެ އަދަދު 28 ޕަސެންޓުން 62 ޕަސެންޓަށް އިތުރުވެފައިވާ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި މީޑިއާ ބްރީފިންގައި ވާހަކަދައްކަވަމުން މިނިސްޓަރު ވިދާޅުވީ، 2024 ވަނަ އަހަރުގެ މޭ މަހު މި އޮޕަރޭޝަން ފެށި އިރު ވޯކްޕާމިޓް ފީ ނުދެއްކުން ނުވަތަ ވިސާއެއް ނެތި ތިބުން ފަދަ ކަންކަމާ ގުޅިގެން 148,417 ބިދޭސީން ގަވައިދާ ހިލާފަށް ތިބި ކަމަށް ލިޔެކިއުންތަކުން ދެއްކި ކަމަށެވެ. ނަމަވެސް މިހާރު އެ އަދަދު ވަނީ ބޮޑުތަނުން މަދުކުރެވިފައެވެ.
"އަޅުގަނޑުމެން މިދިޔަ ދެ އަހަރު ކުރެވުނު މަސައްކަތުން، ފުރިހަމައަށް ޑޮކިއުމެންޓް ހަމަކޮށް ލާރި ދައްކާފައި ތިބި މީހުންގެ އަދަދު ވަނީ 28 ޕަސެންޓުން 62 ޕަސެންޓަށް އިތުރުކުރެވިފައި،" މިނިސްޓަރު އިހުސާން ވިދާޅުވިއެވެ.
މިނިސްޓަރު އިތުރަށް ވިދާޅުވީ މިހާރު މި ހިމެނޭ 62 ޕަސެންޓަކީ ވޯކްޕާމިޓް ފީ ދައްކާފައިވާ، ސައްހަކަން 100 ޕަސެންޓް ކަށަވަރުކުރެވިފައިވާ މީހުން ކަމަށެވެ.
މިނިސްޓަރު ހާމަކުރެއްވި ގޮތުގައި މިހާތަނަށް ގާތްގަނޑަކަށް 206,000 ބިދޭސީންގެ ފިންގަޕްރިންޓް ނަގާފައިވާއިރު، އަދިވެސް ފިންގަޕްރިންޓް ނުދީ 2,933 މީހަކު އެބަތިއްބެވެ. މި މީހުންނަކީ ކޮން ބައެއްކަން އިމިގްރޭޝަނަށް މިހާރު ދެނެގަނެވިފައިވާ ކަމަށާއި، މިވަގުތު އެންމެ ކަންބޮޑުވާ އަދަދަކީ އެއީ ކަމަށްވެސް މިނިސްޓަރު ވިދާޅުވިއެވެ.
އޮޕަރޭޝަން ކުރަނގީގެ ތިންވަނަ ފޭސް އަންނަ މޭ މަހުގެ ދެވަނަ ދުވަހު ފެށުމަށް ވަނީ ހަމަޖެހިފައެވެ. މި ފޭސްގެ ދަށުން އެއް އަހަރު ދުވަހުގެ ތެރޭގައި ގަވައިދާ ހިލާފަށް އުޅޭ މީހުން ހޯދައި، ހައްޔަރުކޮށް، ރާއްޖޭން ޑީޕޯޓްކުރުމުގެ މަސައްކަތް ކުރިއަށް ގެންދާނެ ކަމަށް މިނިސްޓަރު ވިދާޅުވިއެވެ.
ނިންމަވާލައްވަމުން މިނިސްޓަރު ވަނީ ބިދޭސީން ގެންގުޅޭ ފަރާތްތަކުން އެމީހުންގެ ސްޓޭޓަސް ގަވައިދުން ޗެކްކޮށް، ދައްކަންޖެހޭ ފީތައް ދެއްކުމަށް އިލްތިމާސްކުރައްވާފައެވެ. އިމިގްރޭޝަންގެ ސިސްޓަމް މެދުވެރިކޮށް ބިދޭސީންގެ ވިސާގެ މުއްދަތާއި އިތުރު ތަފްސީލުތައް ފެންނަން ހުންނާނެކަންވެސް މިނިސްޓަރު ފާހަގަކުރެއްވިއެވެ.
