ސީރިއާގައި ރައްކާކޮށްފައިވާ ކެމިކަލް ހަތިޔާރުތައް ނައްތާލުމަށް ކުރަމުންދާ ބައިނަލްއަގުވާމީ މަސައްކަތްތަކަށް އެހީތެރިވުމުގެ ގޮތުން ކެނެޑާ ސަރުކާރުން 5 މިލިއަން ޑޮލަރުގެ މާލީ އެހީއެއް ދިނުމަށް ނިންމައިފިއެވެ.
މި އެހީ ދިނުމަށް ނިންމާފައިވަނީ ކެމިކަލް ހަތިޔާރު މަނާކުރާ ބައިނަލްއަގްވާމީ ޖަމާއަތް އޮގަނައިޒޭޝަން ފޯ ދަ ޕްރޮހިބިޝަން އޮފް ކެމިކަލް ވެޕަންސް (އޯ.ޕީ.ސީ.ޑަބްލިޔު) މެދުވެރިކޮށެވެ. ކެނެޑާގެ ފޮރިން މިނިސްޓްރީން ހާމަކޮށްފައިވާ ގޮތުގައި، މި ފައިސާ ހޭދަކުރުމަށް ހަމަޖެހިފައިވަނީ ސީރިއާގެ ކެމިކަލް ހަތިޔާރުގެ ޕްރޮގްރާމް އެއްކޮށް ނައްތާލުމަށާއި، އެ ގައުމުގައި ހުރި ނުރައްކާތެރި މާއްދާތައް ރައްކާތެރިކަމާއެކު ނައްތާލުމުގެ މަސައްކަތްތަކަށެވެ.
ކެނެޑާއިން މި އެހީ ދޭން ނިންމި މައިގަނޑު ސަބަބަކީ، ސީރިއާގައި ކެމިކަލް ހަތިޔާރު ބޭނުންކުރުން ހުއްޓުވުމަށާއި، ބައިނަލްއަގުވާމީ ގާނޫނުތަކާ އެއްގޮތަށް އެ ގައުމުން އަމަލުކުރަމުންދާކަން ކަށަވަރު ކުރުމަށެވެ. އަދި މީގެ ސަބަބުން ސީރިއާގެ އާންމު ރައްޔިތުންނަށް ކުރިމަތިވެފައިވާ ނުރައްކާތަކުން ސަލާމަތްކުރުމަށް ބާރު ލިބިގެންދާނެ ކަމަށްވެސް އެ ގައުމުން ގަބޫލުކުރެއެވެ.
Advertisement
އޯ.ޕީ.ސީ.ޑަބްލިޔު އިން ދަނީ ގިނަ އަހަރުތަކެއް ވަންދެން ސީރިއާގައި ހުރި ކެމިކަލް ހަތިޔާރުތައް ދެނެގަނެ، އެ ތަކެތި ނައްތާލުމުގެ އޮޕަރޭޝަންތައް ހިންގަމުންނެވެ. ނަމަވެސް، މި މަސައްކަތްތަކަށް ބޭނުންވާ ފަންޑު ހޯދުމަކީ އެ ޖަމިއްޔާއަށް ކުރިމަތިވެފައިވާ ބޮޑު ގޮންޖެހުމެކެވެ.
