މިހާރު ކުރިއަށްދާ ވޯލްޑް ކަޕް ފުޓްބޯޅަ މުބާރާތުގެ ކުއާޓާ ފައިނަލުން ޖާގަ ހޯދި ފުރަތަމަ ޓީމުގެ ޝަރަފު މޮރޮކޯ އިން ހޯދައިފިއެވެ. މޮރޮކޯ މި ޖާގަ ކަށަވަރުކުރީ މިރޭ އެމެރިކާގެ ހިއުސްޓަން ސިޓީގައި ކުޅުނު މެޗުގައި ކެނެޑާގެ މައްޗަށް ކުރިހޯދައިގެންނެވެ.

ފޯރިގަދަ ކުޅުމެއް ފެނިގެންދިޔަ މި މެޗު މޮރޮކޯއިން ކާމިޔާބުކުރީ 3-0 ގެ ނަތީޖާއަކުންނެވެ. މެޗުގެ ފުރަތަމަ ދެ ގޯލު ދެވަނަ ހާފުގައި ކާމިޔާބުކޮށްދީ، މޮރޮކޯގެ މޮޅުގައި އެންމެ މުހިންމު ދައުރެއް އަދާކުރީ އަޒެދިން އޫނާހީ އެވެ. އަދި މެޗުގެ ފުރިހަމަ ވަގުތު ހަމަވެގެން ކުޅުނު އިތުރު ވަގުތުގެ ތެރޭގައި ރަހީމީ ވަނީ ތިންވަނަ ލަނޑެއް ޖަހައި، ނަތީޖާގެ ފަރަގު ބޮޑުކޮށްދީފައެވެ.

މި ކާމިޔާބީއާއެކު މޮރޮކޯއަށް އުފާވެރިކަން ލިބުނު ނަމަވެސް، އެ ޓީމުގެ އެންމެ މުހިންމު ފޯވާޑް އިސްމާއިލް ސައިބާރީއަށް ލިބުނު އަނިޔާއަކީ އެ ޓީމަށް ކުރިމަތިވި ބޮޑު ކަންބޮޑުވުމެކެވެ. މުބާރާތުގައި އެ ޓީމަށް އެންމެ ގިނަ ލަނޑު ޖަހައިދީފައިވާ އަދި ދާދި ފަހުން ޖަރުމަނުގެ ބަޔާން މިއުނިކަށް ސޮއިކުރި ސައިބާރީއަށް ދިމާވި އަނިޔާއާ ގުޅިގެން، މެޗުގެ ފުރަތަމަ ހާފުގައި އޭނާ ވަނީ ބަދަލުކޮށްފައެވެ.

މި މުބާރާތް ބާއްވާ އެއް ގައުމު ކަމަށްވާ ކެނެޑާ، މުބާރާތުން ވަކިވާން ޖެހުނީ ކުޅުނު ހަތަރު މެޗަށް ފަހުއެވެ. އެހެންނަމަވެސް، މިއީ ކެނެޑާގެ ފުޓްބޯޅަ ތާރީހުގައި ފާހަގަކޮށްލެވޭ މުބާރާތެކެވެ. އެގޮތުން ގްރޫޕް ސްޓޭޖުގައި ގަތަރު ބަލިކޮށް، ވޯލްޑް ކަޕް ތާރީހުގައި އެ ގައުމުން ހޯދި ފުރަތަމަ މޮޅު މި މުބާރާތުގައި ވަނީ ރެކޯޑުކޮށްފައެވެ. މީގެ އިތުރުން، ނޮކައުޓް ބުރުގައި ދެކުނު އެފްރިކާގެ މައްޗަށްވެސް އެ ޓީމުން ވަނީ ކުރިހޯދާފައެވެ.

ކުއާޓާ ފައިނަލުގައި މޮރޮކޯ ބައްދަލުކުރަން ޖެހޭނީ ފްރާންސާއި ޕެރަގުއޭ ބައްދަލުކުރާ މެޗުން މޮޅުވާ ޓީމަކާއެވެ. މި މެޗުވެސް ކުޅުމަށް ހަމަޖެހިފައިވަނީ މިރޭ 01:00 ގައެވެ.