ފާއިތުވި ފަސް އަހަރަކީ ބައިނަލްއަގުވާމީ ފުޓުބޯޅައިގެ މައިދާނުގައި ސްޕެއިން ނުވަތަ "ލަ ރޯހާ" އިން މުޅި ދުނިޔެއަށް ނަމޫނާ ދެއްކި ފަސް އަހަރެވެ. ބާލިންގައި މީގެ ދެ އަހަރު ކުރިން ޔޫރަޕްގެ ޗެމްޕިއަންކަން ހޯދުމަށްފަހު، ރޭގައި ނިއު ޖާޒީގައި ކުޅުނު ވޯލްޑް ކަޕް ފައިނަލުގައި އާޖެންޓީނާ 1-0 އިން ބަލިކޮށް، ސްޕެއިން މިވަނީ ދުނިޔޭގެ ޗެމްޕިއަންކަން ހޯދައިފައެވެ. 2008 ވަނަ އަހަރުގެ ޔޫރޯ ކާމިޔާބު ކުރުމަށްފަހު 2010 ވަނަ އަހަރުގެ ވޯލްޑް ކަޕް ކާމިޔާބުކޮށްގެން ސްޕެއިން ހެދި ތާރީހީ ރެކޯޑު އަލުން އެގައުމު މިވަނީ ތަކުރާރު ކޮށްފައެވެ.
ސްޕެއިންގެ މި ކާމިޔާބީއަކީ ހަމައެކަނި ފިރިހެން ފުޓުބޯޅައަށް ހަނިވެފައިވާ ކަމެއް ނޫނެވެ. މިއީ ފިރިހެން އަދި އަންހެން ފުޓުބޯޅައިގައިވެސް އެ ގައުމުން ދަމަހައްޓަމުން އަންނަ އާދަޔާހިލާފު ރެކޯޑެކެވެ. ސްޕެއިނަކީ އެއްވަގުތެއްގައި ފިރިހެން އަދި އަންހެން ވޯލްޑް ކަޕްގެ ތަށި އުފުލާލި ފުރަތަމަ ގައުމެވެ. 2023 ވަނަ އަހަރު ސިޑްނީގައި ކުޅުނު އަންހެން ވޯލްޑް ކަޕް ފައިނަލުގައި އިންގްލެންޑް ބަލިކޮށް ސްޕެއިންގެ އަންހެން ޓީމުން ވަނީ ތާރީހު ލިޔެފައެވެ.
މީގެ އިތުރުން، 2023 ވަނަ އަހަރުގެ ނޭޝަންސް ލީގާއި 2024 ވަނަ އަހަރުގެ އޮލިމްޕިކްސް ރަން މެޑަލް ފިރިހެން ޓީމުން ހޯދިއިރު، އަންހެން ޓީމުން ވަނީ 2024 އަދި 2025 ވަނަ އަހަރުގެ ނޭޝަންސް ލީގު ކާމިޔާބުކޮށްފައެވެ. ފާއިތުވި ފަސް އަހަރުގެ ތެރޭގައި 17 އަހަރުން ދަށުގެ އުމުރުފުރާއިން ފެށިގެން ސީނިއާ ލެވެލްއާ ހަމައަށް ސްޕެއިން ވަނީ ޖުމްލަ 16 ބައިނަލްއަގުވާމީ ތަށި ކާމިޔާބުކޮށްފައެވެ.
Advertisement
ސްޕެއިންގެ ފުޓުބޯޅަ މާހިރު ގިލެމް ބަލަގޫ ބުނި ގޮތުގައި، މިއީ "ޕާފެކްޓް ސްޓޯމް" އެކެވެ. ސަގާފީ ގޮތުން ސްޕެއިންގެ ފުޓުބޯޅަ ބައްޓަންކޮށްފައިވާ ގޮތާމެދު އެންމެން އިތުބާރު ކުރެއެވެ. އަދި އެންމެ މުހިންމު ކަމަކީ މި ކާމިޔާބީތަކާއެކުވެސް ހުއްޓުމެއް ނެތި ކުރިއަށް ދިއުމެވެ.
ފާއިތުވި ފަސް އަހަރުގެ ތެރޭގައި ސްޕެއިން ހޯދާފައިވާ ކާމިޔާބީތަކަށް ބަލާއިރު:
އަންހެން ފުޓުބޯޅަ (11 ތަށި):
- ސީނިއާ: 1 ވޯލްޑް ކަޕް (2023)، 2 ނޭޝަންސް ލީގު (2024، 2025).
- 20 އަހަރުން ދަށް: 1 ވޯލްޑް ކަޕް (2022).
- 19 އަހަރުން ދަށް: 5 ޔޫރަޕިއަން ޗެމްޕިއަންޝިޕް (2022، 2023، 2024، 2025، 2026).
- 17 އަހަރުން ދަށް: 1 ވޯލްޑް ކަޕް (2022)، 1 ޔޫރަޕިއަން ޗެމްޕިއަންޝިޕް (2024).
ފިރިހެން ފުޓުބޯޅަ (5 ތަށި):
- ސީނިއާ: 1 ވޯލްޑް ކަޕް (2026)، 1 ޔޫރަޕިއަން ޗެމްޕިއަންޝިޕް (2024)، 1 ނޭޝަންސް ލީގު (2023).
- 23 އަހަރުން ދަށް: 1 އޮލިމްޕިކްސް ރަން މެޑަލް (2024).
- 19 އަހަރުން ދަށް: 1 ޔޫރަޕިއަން ޗެމްޕިއަންޝިޕް (2026).
2022 ވަނަ އަހަރުގެ ވޯލްޑް ކަޕުން މޮރޮކޯ އަތުން ބަލިވެ ސްޕެއިން ކެޓުމާ ގުޅިގެން، ލުއިސް އެންރީކޭގެ ބަދަލުގައި ލުއިސް ޑެ ލަ ފުއެންޓޭ ހަމަޖެއްސުމަކީ ގިނަ ބަޔަކު ސުވާލު އުފެއްދި ކަމެކެވެ. ބޮޑު ކުލަބަކަށް އިރުޝާދު ދީފައި ނުވާ ކޯޗަކު މިހާ ކުރު މުއްދަތެއްގެ ތެރޭގައި ނޭޝަންސް ލީގު، ޔޫރޯ އަދި ވޯލްޑް ކަޕް ކާމިޔާބު ކުރާނެ ކަމަށް އެކަކުވެސް ހީނުކުރެއެވެ.
ނަމަވެސް، ޑެ ލަ ފުއެންޓޭއަކީ ސްޕެއިންގެ އެކަޑަމީތަކުން ކުޅުންތެރިން އުފެދިގެން އަންނަ ގޮތާއި، އެ ގައުމުގެ ފުޓުބޯޅަ ފަލްސަފާ އެންމެ ރަނގަޅަށް ދަންނަ އެކަކެވެ. ސްޕެއިންގެ ކުރީގެ މިޑްފީލްޑަރު ހުއާން މާޓާ ބުނި ގޮތުގައި، ގިނަ ކުޅުންތެރިންނަކީ އެކަޑަމީ ދުވަސްވަރުން ފެށިގެން ޑެ ލަ ފުއެންޓޭ ދަންނަ ކުޅުންތެރިންނެވެ. މިއީ ހަމައެކަނި މިހާރަށް އޮތް ޓީމެއް ނޫން ކަމަށާއި، މިއީ މުސްތަގުބަލުގެ ވެސް ޓީމެއް ކަމަށް އޭނާ ފާހަގަކުރިއެވެ.
ޑެ ލަ ފުއެންޓޭ ވަނީ ޓީމުގެ ތެރޭގައި އިދިކޮޅު ޓީމަށް އިހުތިރާމް ކުރުމާއި، ކާމިޔާބީއަށް ވާސިލުވުމަށް ކެތްތެރިކަން އިސްކުރުމުގެ ސަގާފަތެއް ގާއިމުކޮށްފައެވެ. "މި ޓީމަކީ ވަރުބަލިކަމެއް ނެތި މަސައްކަތްކުރާ ޓީމެއް،" އޭނާ ބުންޏެވެ. މިހާރު ސްޕެއިން އޮތީ ބައިނަލްއަގުވާމީ މައިދާނުގައި ބަލިނުވެ 38 މެޗު ހަމަކޮށްފައެވެ. މިއީ ޔޫރަޕްގެ ޓީމަކުން މިހާތަނަށް ދަމަހައްޓާފައިވާ އެންމެ ދިގު ރެކޯޑެވެ.
ސްޕެއިންގެ އަންހެން ފުޓުބޯޅައަށް ފާއިތުވި ދިހަ އަހަރު ތެރޭގައި އައި ބަދަލަކީ ފާހަގަކޮށްލަންޖެހޭ ބޮޑު ބަދަލެކެވެ. ކުރީގެ ކުޅުންތެރިޔާ މާރިއާ ގަރީޑޯ ކިޔައިދިން ގޮތުގައި، މީގެ ދިހަ އަހަރު ކުރިން ބާސެލޯނާގައި ކުޅުނުއިރު އަންހެން ކުދިންނަށް "ލަ މާސިއާ" އެކަޑަމީގެ ފުރުސަތެއް ނޯވެއެވެ. ނަމަވެސް ފާއިތުވި ފަސް އަހަރު ތެރޭގައި ވަސީލަތްތައް ތަރައްގީކޮށް، ހާއްސަ އެކަޑަމީތައް ހުޅުވުމުން އަންހެން ފުޓުބޯޅައަށް އޮތް އިހުތިރާމް ބޮޑުވެ، މިއަދު އެ ގައުމަކީ ދުނިޔޭގެ އެންމެ ވަރުގަދަ ބާރެވެ.
އެ ގައުމުގެ ކާމިޔާބީގެ ސިއްރަކީ ޒުވާން ކުޅުންތެރިންނަށް ކުރާ އިތުބާރެވެ. ލަމީން ޔަމާލް އަދި ޕާއު ކުބާސީ ފަދަ 19 އަހަރުގެ ކުޅުންތެރިންނަކީ މިހާރުވެސް ވޯލްޑް ކަޕް ޗެމްޕިއަނުންނެވެ. އެއް ވޯލްޑް ކަޕް ފައިނަލެއްގައި ދެ ޒުވާން ކުޅުންތެރިން (ޓީންއޭޖަރުން) ކުޅުނު ފުރަތަމަ ޓީމަކަށް ސްޕެއިން ވެގެންދިޔައެވެ.
އިނގިރޭސި ކުރީގެ ގޯލްކީޕަރު ޖޯ ހާޓް ބުނި ގޮތުގައި، ސްޕެއިންގެ ކުޅުމުގެ ވައްޓަފާޅިއާ ގާތްކުރެވޭނެ އެހެން ބަޔަކު ދުނިޔޭގައި މިހާރަކު ނެތެވެ. މި ވޯލްޑް ކަޕްގައި މުޅި މުބާރާތުގައިވެސް ސްޕެއިންގެ ގޯލަށް އަމާޒުވެފައިވަނީ އެންމެ 10 ހަމަލާއެވެ. ފްރާންސްގެ ތޯމަސް ހެންރީ ފާހަގަކުރި ގޮތުގައި، ސްޕެއިންގެ މި ނިޒާމުގެ ސަބަބުން ކުރިއަށް އޮތް އަހަރުތަކުގައިވެސް އެ ގައުމުން ފުޓުބޯޅައިގައި ރަސްކަން ކުރާނެއެވެ.
ޚުލާސާކޮށް ބުނާނަމަ، ސްޕެއިންގެ ކާމިޔާބީއަކީ އިއްތިފާގެއް ނޫނެވެ. އެއީ ވަރުގަދަ އެކަޑަމީ ނިޒާމެއްގެ ތެރެއިން، ވަކި ފަލްސަފާއަކަށް އިތުބާރުކޮށްގެން ކުރަމުންދާ ބުރަ މަސައްކަތުގެ ނަތީޖާއެވެ. މިއަދު ސްޕެއިން އޮތީ ފުޓުބޯޅައިގެ ހުރިހާ ލެވެލްއެއްގައި ބަލިކުރަން އުނދަގޫ ބާރެއްގެ ގޮތުގައެވެ.
