މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ބޯޑު މެންބަރުކަމުގެ މަގާމަށާއި، އެ ކުންފުނީގެ ޗީފް އެގްޒެކްޓިވް އޮފިސަރު (ސީއީއޯ) އަދި މެނޭޖިން ޑިރެކްޓަރުގެ މަގާމަށް އަލްފާޟިލް ހުސެއިން ޝަފީގް މިއަދު އައްޔަނުކޮށްފި އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ހާމަކޮށްފައިވާ ގޮތުގައި، މި މަގާމަށް އައްޔަނުކުރެއްވި ހުސެއިން ޝަފީގަކީ ދަފްތަރު ނަންބަރު ރސ 2861 އެވެ. އޭނާ މި މަގާމަށް އައްޔަނުކުރައްވާފައިވަނީ މިއަދުން ފެށިގެންނެވެ.
Advertisement
އެމްޕީއެލްގެ މެނޭޖިން ޑިރެކްޓަރުގެ މަގާމަށް އާ ބޭފުޅަކު މި އައްޔަނުކުރެއްވީ، ކުރިން އެ މަގާމުގައި ހުންނެވި ކުރީގެ ޑީސީޕީ މުހައްމަދު ރިޝްވާން އޭޕްރީލް މަހުގެ 6 ވަނަ ދުވަހު މަގާމުން އިސްތިއުފާ ދެއްވުމާ ގުޅިގެންނެވެ. ރިޝްވާން މަގާމުން އިސްތިއުފާ ދެއްވި ސީދާ ސަބަބެއް ރަސްމީކޮށް ހާމަކޮށްފައި ނުވި ނަމަވެސް، ބެލެވޭ ގޮތުގައި މިއީ ސަރުކާރުގެ ހިންގުމަށް ރައީސުލްޖުމްހޫރިއްޔާ ގެންނަވަން ބޭނުންފުޅުވާ ބަދަލުތަކުގެ ދަށުން ނިންމެވި ނިންމެވުމެކެވެ.
ސަރުކާރުގެ އިސް މަގާމުތަކަށް މި ދުވަސްވަރު އަންނަނީ ބޮޑެތި ބަދަލުތަކެއް ގެންނަމުންނެވެ. އެގޮތުން ނިމިދިޔަ ހަފްތާތަކުގައި ސަރުކާރުގެ ބައެއް ކުންފުނިތަކުގެ އިސްވެރިން މަގާމުން ވަކިކޮށްފައިވާއިރު، ކެބިނެޓުގެ 10 މިނިސްޓަރަކު ވެސް ވަނީ ސަރުކާރު ހިންގުމަށް ބަދަލުތަކަށް ޖާގަ ދެއްވުމުގެ ގޮތުން އިސްތިއުފާ ދެއްވާފަ އެވެ.
މި ބަދަލުތަކަކީ ދާދިފަހުން ބޭއްވުނު ލޯކަލް ކައުންސިލް އިންތިހާބުގައި ސަރުކާރަށް ކުރިމަތިވި ނާކާމިޔާބީއާ ގުޅިގެން، ސަރުކާރުގެ ހިންގުން ހަރުދަނާކުރުމަށް ގެންނަ ބަދަލުތަކެއް ކަމަށް ބެލެވެ އެވެ. އިންތިހާބުގެ ނަތީޖާއަށްފަހު ފެށި މި ބަދަލުތަކުގެ ސިލްސިލާގެ ދަށުން، ކުރިއަށް އޮތް ތަނުގައި ވެސް ސަރުކާރުގެ އިތުރު މަގާމުތަކަށް ބަދަލު އައުމަކީ އެކަށީގެންވާ ކަމެކެވެ.
