އިންޓަރޕާލިމެންޓަރީ ޔުނިއަން (އައި.ޕީ.ޔޫ) ގެ 152 ވަނަ އެސެމްބްލީގައި ބައިވެރިވެވަޑައިގަތުމަށް ތުރުކީވިލާތުގެ އިސްތަންބޫލަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، ރައްޔިތުންގެ މަޖިލީހުގެ ރައީސް އޮނަރަބަލް ޢަބްދުއްރަޙީމް ޢަބްދުالله އާއި އެމަނިކުފާނުގެ އަރިހުގައި ވަޑައިގެންނެވި ވަފުދުގެ ބޭފުޅުން މިއަދު ރާއްޖެ ވަޑައިގެންފިއެވެ.
މި މަހުގެ 13 ވަނަ ދުވަހު ފެއްޓެވި މި ދަތުރުފުޅުގައި މަޖިލީހުގެ ރައީސްގެ އަރިހުގައި ރައްޔިތުންގެ މަޖިލީހުގެ އެކި ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުން ބައިވެރިވެވަޑައިގެންނެވިއެވެ. އޭގެ ތެރޭގައި ސަރުކާރު ހިންގާ ޕީއެންސީއަށް ނިސްބަތްވެވަޑައިގަންނަވާ ކުޅުދުއްފުށި އުތުރު ދާއިރާގެ މެންބަރު މުޙައްމަދު ދާއޫދު، ގައްދޫ ދާއިރާގެ މެންބަރު މުޙައްމަދު ޢަލީ، ހުޅުދޫ ދާއިރާގެ މެންބަރު މުޙައްމަދު ޝާހިދު، މާފަންނު މެދު ދާއިރާގެ މެންބަރު އަސްމާ ރަޝީދު، ނިލަންދޫ ދާއިރާގެ މެންބަރު ފާޠިމަތު ސަޢުދާ އަދި ހުރާ ދާއިރާގެ މެންބަރު އަނާރާ ނައީމް ހިމެނިވަޑައިގަންނަވައެވެ.
މީގެ އިތުރުން، އިދިކޮޅު އެމްޑީޕީގެ ފަރާތުން ކެންދޫ ދާއިރާގެ މެންބަރު މައުރޫފް ޛާކިރު ވެސް މި ވަފުދުގައި ބައިވެރިވެވަޑައިގެންނެވިއެވެ.
މި ދަތުރުފުޅަކީ ބައިނަލްއަޤްވާމީ ޕާލިމެންޓަރީ ދާއިރާގައި ދިވެހިރާއްޖޭގެ ދައުރު ފުޅާކުރުމަށާއި، އެކި ޤައުމުތަކުގެ ޤާނޫނު ހަދާ މަޖިލިސްތަކާއެކު އޮންނަ ގުޅުން ބަދަހިކުރުމުގެ މަޤްޞަދުގައި ކުރެއްވި މުހިންމު ދަތުރުފުޅެކެވެ. އިސްތަންބޫލްގައި ބޭއްވުނު މި އެސެމްބްލީގައި ދުނިޔޭގެ އެކި ކަންކޮޅުތަކުގެ މަޖިލިސް ރައީސުންނާއި މެންބަރުން ބައިވެރިވެވަޑައިގެން، ބައިނަލްއަޤްވާމީ މުހިންމު މައުޟޫޢުތަކަށް މަޝްވަރާކުރައްވާފައިވެއެވެ.
