ރާއްޖޭގައި މަސްވެރިކަން ކުރާ ހުރިހާ ދޯނިފަހަރަކަށް މާދަމާ އިން ފެށިގެން އެސްޓީއޯ ޝެޑް ރޭޓުގައި ތެޔޮ ލިބޭނެ އިންތިޒާމް ސަރުކާރުން މިއަދު ހަމަޖައްސައިފި އެވެ. ފިޝަރީޒް މިނިސްޓްރީން މިއަދު ހާމަކުރި ގޮތުގައި، މި ނިންމުމުގެ ދަށުން މަސްވެރިކަން ކުރާ ހުރިހާ އުޅަނދަކަށް މާދަމާ އިން ފެށިގެން އެސްޓީއޯގެ ޝެޑްތަކުން ތެޔޮ ލިބޭ އަގުގައި ޑީސަލް ލިބޭނެ މަގު ވަނީ ފަހިވެފަ އެވެ.

މީގެ އިތުރުން "ފަހި ހަކަތަ" ޕްރޮގްރާމްގައި ރަޖިސްޓްރީވެފައިވާ ދޯނިތަކަށް ސަބްސިޑައިޒް އަގުގައި ރާއްޖޭގެ އެކި ސަރަހައްދުތަކުން ތެޔޮ ލިބޭނެ އިންތިޒާމް ވެސް މިހާރު ވަނީ ހަމަޖެހިފަ އެވެ. އެގޮތުން ހއ. އިހަވަންދޫ، ހދ. ހަނިމާދޫ، ށ. މިލަންދޫ، ބ. އޭފަދުށި، ފ. ނިލަންދޫ، ކ. ހިންމަފުށި، ރ. ދުވާފަރު، ދ. ކުޑަހުވަދޫ، ޅ. ފެލިވަރު، ގއ. ކޫއްޑޫގެ އިތުރުން ފުވައްމުލައް، ހުޅުމީދޫ އަދި ހުޅުމާލެ ޖެޓީން މަސްވެރިންނަށް ސަބްސިޑައިޒް އަގުގައި ތެޔޮ ލިބޭނެ އެވެ.

މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގަށް އައި ބަދަލާއެކު، އެސްޓީއޯ އިން މިހާރު ޑީސަލް ލީޓަރެއް ވިއްކަމުންދަނީ 17.54 ރުފިޔާއަށެވެ. މިކަމާ ގުޅޭގޮތުން ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ، ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިފައިވީ ނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މަސައްކަތް ކުރަމުންދަނީ މަސްވެރިންނަށް އެ ބުރަ ނުޖައްސައި، ތެލުގެ ކަންކަން ވީއެންމެ ރަނގަޅަކަށް މެނޭޖުކުރުމަށް ކަމަށެވެ. އަދި ސަރުކާރުގެ މި ނިންމުން މަސްވެރިން ޝުކުރުވެރިކަމާއެކު ބަލައިގަންނަކަން ވެސް މިނިސްޓަރު ފާހަގަކުރެއްވި އެވެ.

މިނިސްޓަރު އިތުރަށް ވިދާޅުވީ، ގިނަ ދުވަސްތަކެއް ވަންދެން އެންވެރިކަން ދަށްވެފައި އޮތުމަށްފަހު، މިހާރު މުޅި ރާއްޖެއަށް އެންވެރިކަން ރަނގަޅުވަމުން އަންނަ ކަމަށެވެ. މީގެ ސަބަބުން މަސްވެރިކަން ވެސް އިރާދަފުޅާ ކުރެއްވިއްޔާ ރަނގަޅުވަމުން އަންނަ ކަމަށާއި، މަސްވެރިކަން ރަނގަޅުވާ ސަރަހައްދުތަކަށް ބޯޓުތައް ފޮނުވުމުގެ މަސައްކަތް ވެސް ކުރިއަށްދާނެ ކަމަށް މިނިސްޓަރު ވިދާޅުވި އެވެ. ފަހަކަށް އައިސް މަސްވެރިކަން ދަށްވުމުގެ ސަބަބުން މަހުގެ ބާވަތްތައް އުފެއްދުމުގައި ގޮންޖެހުންތަކެއް ކުރިމަތިވި ނަމަވެސް، ސަރުކާރުގެ މި އާ އިންތިޒާމާއެކު މަސްވެރިންގެ ހަރަދުތަކަށް ބޮޑު ލުޔެއް ލިބިގެންދާނެކަން ފާހަގަކޮށްލެވެ އެވެ.