ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ސަރުކާރު ހިންގާ ކޮންގްރެސް ޕާޓީގެ ފަރާތުން ވާދަކުރާނެ ކެންޑިޑޭޓަކު ހޮވުމަށް ބާއްވާ ޕްރައިމެރީ، އަންނަ ހޮނިހިރު ދުވަހު ބޭއްވުމަށް އެ ޕާޓީން ނިންމައިފި އެވެ.
ކޮންގްރެސް ޕާޓީން ކުރި އިޢުލާނެއްގައި ބުނެފައިވަނީ، 25 އެޕްރީލް 2026 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ މި ޕްރައިމެރީގެ ވޯޓުލުން ކުރިއަށްދާނީ އެ ދުވަހުގެ ހެނދުނު 9:00 އިން ފެށިގެން ހަވީރު 4:00 އާ ހަމައަށެވެ. މި އިންތިހާބުގައި ވޯޓުލުމުގެ ފުރުސަތު އޮންނާނީ ހިތަދޫ އުތުރު ދާއިރާގައި ހިމެނޭ ކޮންގްރެސް ޕާޓީގެ މެންބަރުންނަށް އެކަންޏެވެ.
ވޯޓުލުން ކުރިއަށް ގެންދިއުމަށް ހަމަޖެހިފައިވަނީ ހިތަދޫ އުތުރު ދާއިރާގެ އިތުރުން ވެރިރަށް މާލޭގަ އެވެ. އެގޮތުން، ހިތަދޫ ދާއިރާއަށް ރަޖިސްޓަރީވެފައިވާ މެންބަރުން ވޯޓުލުމަށް ހިތަދޫގައި ވޯޓު ފޮށިތައް ބެހެއްޓިފައި ހުންނާނެ އެވެ. އަދި މާލެ އާއި އެހެނިހެން ރަށްރަށުގައި ތިބި، މާލޭގައި ވޯޓުލުމަށް ރަޖިސްޓަރީވެފައިވާ އެ ދާއިރާގެ މެންބަރުންނަށް ވޯޓުލުމަށް މާލެ ސިޓީގައި ވޯޓު ފޮށިތައް ބަހައްޓާނެ ކަމަށް ޕާޓީން މައުލޫމާތު ދެ އެވެ.
މި އިންތިހާބުގެ އެންމެހާ ކަންކަން ރާވައި ހިންގަމުންދަނީ ކޮންގްރެސް ޕާޓީގެ އިންތިހާބީ ކޮމިޓީގެ ބެލުމުގެ ދަށުންނެވެ.
ހިތަދޫ އުތުރު ދާއިރާގެ ބައި-އިލެކްޝަނެއް ބޭއްވުމަށް އިލެކްޝަންސް ކޮމިޝަނުން ނިންމީ، އެ ދާއިރާގެ ކުރީގެ މެންބަރު މުހައްމަދު ސިނާންގެ ގޮނޑި ގެއްލިފައިވާ ކަމަށް ސުޕްރީމް ކޯޓުން މި މަހުގެ 12 ވަނަ ދުވަހު ހުކުމް ކުރުމާ ގުޅިގެންނެވެ. ސިނާންގެ ގޮނޑި ގެއްލުނީ އިސްލާމިކް ބޭންކުން ނެގި ލޯނަކަށް ދައްކަންޖެހޭ 2.5 މިލިއަން ރުފިޔާ، ކޯޓު ހުކުމާ އެއްގޮތަށް ނުދައްކާ އޮތުމުގެ ސަބަބުންނެވެ.
ސުޕްރީމް ކޯޓުގެ ފަނޑިޔާރުންގެ އިއްތިފާގުން ކުރި މި ހުކުމާ ގުޅިގެން ހުސްވި ގޮނޑިއަށް ކޮންގްރެސް ޕާޓީން ކެންޑިޑޭޓަކު ނެރުމަށް ތައްޔާރުވަމުންދާއިރު، އިދިކޮޅު އެމްޑީޕީގެ ފަރާތުން މި އިންތިހާބުގައި ވާދަކުރައްވަނީ އައްޑޫ ސިޓީގެ ކުރީގެ މޭޔަރު އަބްދުﷲ ސާދިގް (ސޯބެ) އެވެ. ކޮންގްރެސް ޕާޓީން ޕްރައިމަރީގައި ވާދަކުރަނީ ކުރީގެ މެމްބަރު ސިނާންގެ އިތުރުން ހިތަދޫ މޫލެކެޑެ ދާއިރާގެ މިހާރުގެ ކައުންސިލަރު އަހްމަދު ސައީދު އެވެ.
