ތިލަމާލެ ބްރިޖުގެ މަސައްކަތް ނުނިމި ލަސްވަމުންދާ ދިއުމަކީ ވަރަށް ބޮޑު ކަންބޮޑުވުމެއް ކަމަށާއި، ނަމަވެސް ސަރުކާރުން އެ މަސައްކަތުގައި ކޮންޓްރެކްޓަރަށް ދޭންޖެހޭ އެންމެހާ އެއްބާރުލުން ދެމުންދާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، ބްރިޖުގެ މަސައްކަތް ނިންމުމަށް ކޮންޓްރެކްޓަރު ދިން އެތައް ތާރީހެއް މިހާރު ފަހަނައަޅާފައިވާ ކަމަށެވެ.

ރައީސް މުޢިއްޒު ފާހަގަކުރެއްވި ގޮތުގައި، މަޝްރޫއު އަވަސްކުރުމަށް ސަރުކާރުން ދޭންޖެހޭ އެހީތެރިކަން ފޯރުކޮށްދިން ނަމަވެސް، މަސައްކަތް ކުރިއަށްދާ ދުވެއްޔާމެދު ހިތްހަމަޖެހިވަޑައިނުގަންނަވައެވެ. މަސައްކަތް ނުނިމި ދިގުލައިގެންދާތީ، ޕްރޮޖެކްޓްގެ މުއްދަތު އިތުރުކުރުމަށް ކޮންޓްރެކްޓަރުގެ ފަރާތުން ތަކުރާރުކޮށް އެދެމުންދާކަން އެމަނިކުފާނު ހާމަކުރެއްވިއެވެ.

"ސަރުކާރުން ކުރަންޖެހޭ ހުރިހާ ކަމެއް މިކަމުގައި ކުރަމުން މިދަނީ. މިހާރު އަނެއްކާވެސް އެ މުއްދަތު އިތުރުކޮށްދޭން އެދިއްޖެ. ވަރަށް ބޮޑަށް ބަލާފައި އެ މުއްދަތު ދީފިން. ކުރިންވެސް ތާރީހް ދިން. އެކަމަކު ދިމަލެއް ނުވި. މިހާރު 2027އަށް ނިންމަން ކޮންޓްރެކްޓަރު ތާރީހް ދީފައިވަނީ،" ރައީސް ވިދާޅުވިއެވެ.

މި މަޝްރޫއު ނިންމުމަށް ކޮންޓްރެކްޓަރު އެދިފައިވަނީ ކުންފުންޏަށް 100 މިލިއަނަށްވުރެ ގިނަ ރުފިޔާގެ ގެއްލުންވާ ގޮތަށް 30 މަސްދުވަހުގެ އިތުރު މުއްދަތެކެވެ.

ތިލަމާލެ ބްރިޖް މަޝްރޫއުގެ މިހާތަނަށް ނިމިފައިވަނީ ޖުމްލަ %71.60 މަސައްކަތެވެ. މިވަގުތު ސައިޓުގައި މައިގަނޑު ގޮތެއްގައި ކުރިއަށްދަނީ ބްރިޖް ޑެކަށް ބޭނުންވާ ސެގްމަންޓްތައް ކާސްޓްކުރުމާއި އިންސްޓޯލްކުރުމުގެ މަސައްކަތެވެ. ބްރިޖް ޑެކަށް ބޭނުންވާ 1222 ސެގްމަންޓްގެ ތެރެއިން %84 ސެގްމަންޓް ކާސްޓްކޮށް ނިމިފައިވާއިރު، %54 ސެގްމަންޓް ވަނީ އިންސްޓޯލްކޮށް ނިންމާފައެވެ.

މީގެ އިތުރުން، ގުޅިފަޅުގައި ބްރިޖާ ގުޅޭ މަގުތަކުގެ މަސައްކަތް ކުރިއަށްދާއިރު، ތިލަފުށީގައި ރިވެޓްމަންޓް ޖެހުމާއި ކަލްވާޓްސް ހަރުކުރުމުގެ މަސައްކަތް ދަނީ ކުރަމުންނެވެ. މި މަޝްރޫއަކީ މާލެ، ވިލިމާލެ، ގުޅިފަޅު އަދި ތިލަފުށި ގުޅާލުމަށް ހިންގާ 6.7 ކިލޯމީޓަރުގެ ބިޔަ މަޝްރޫއެކެވެ.

މި މަޝްރޫއަށް ޖުމްލަ 500 މިލިއަން ޑޮލަރު (7 ބިލިއަނަށްވުރެ ގިނަ ރުފިޔާ) ހޭދަވާނެއެވެ. މީގެ ތެރޭގައި ހިމެނެނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓެވެ. އަދި މި މަޝްރޫއަށް ދިވެހި ސަރުކާރުންވެސް ހަރަދުކުރުމަށް ވަނީ ހަމަޖެހިފައެވެ.