އާޖެންޓީނާގެ ރައީސް ހާވިއޭ މިލެއި، އެގައުމުގެ އެމްބަސީ ތަލްއަވީވުން ގުދުސް (ޖެރޫސަލަމް) އަށް ބަދަލުކުރައްވައި، ރަސްމީކޮށް ހުޅުއްވައިދެއްވުމަށްޓަކައި އިޒްރޭލަށް ވަޑައިގެންފިއެވެ.
މި ދަތުރުފުޅަކީ އާޖެންޓީނާގެ ރައީސްކަމާ ހަވާލުވެވަޑައިގަތުމުގެ ކުރިން އޭނާ ވެވަޑައިގެންފައިވާ ވައުދެއް ފުއްދެވުމުގެ ގޮތުން ކުރައްވާ ދަތުރުފުޅެކެވެ. މި ނިންމުމާއެކު، އާޖެންޓީނާ ވެގެން ގޮސްފައިވަނީ އިޒްރޭލުގައި ހުންނަ އެގައުމުގެ އެމްބަސީ ގުދުސްއަށް ބަދަލުކުރި މަދު ގައުމުތަކުގެ ތެރެއިން އެއް ގައުމަށެވެ.
ގުދުސްއަކީ އިޒްރޭލުން އިސްތިއުމާރުކޮށްފައިވާ ބިމެއްގެ ގޮތުގައި ބިނަ ޤައުމުތަކުން ބަލާއިރު، މި ފިޔަވަޅަކީ ފަލަސްތީނުގެ ހައްގުތަކަށް އަރައިގަތުން ކަމަށް ބުނެ ގިނަ ގައުމުތަކަކުންނާއި ބައިނަލްއަގުވާމީ ޖަމްއިއްޔާތަކުން ދަނީ ކަންބޮޑުވުން ފާޅުކުރަމުންނެވެ. ވަކިން ހާއްސަކޮށް، މުސްލިމް ގައުމުތަކުން ދެކޭގޮތުގައި މިއީ ބައިނަލްއަގުވާމީ ގާނޫނުތަކާ ހިލާފު، އަދި މެދުއިރުމަތީގެ ސުލްހައަށް އޮތް ބޮޑު ހުރަހެކެވެ.
އާޖެންޓީނާގެ ރައީސް އިޒްރޭލަށް ކުރައްވާ މި ދަތުރުފުޅުގައި އެގައުމުގެ އިސްވެރިންނާ ބައްދަލުކުރައްވައި، ދެގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެއްވުމަށް ވަނީ ހަމަޖެހިފައެވެ. ނަމަވެސް، މި އަމަލުގެ ސަބަބުން އިސްލާމީ އުންމަތާއި އާޖެންޓީނާއާ ދެމެދު އޮތް ހާރިޖީ ގުޅުންތަކަށް ނޭދެވޭ އަސަރު ކުރާނެ ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
ފަލަސްތީނުގެ މިނިވަންކަމަށް ވަކާލާތުކުރާ ފަރާތްތަކުން ބުނާ ގޮތުގައި، ގުދުސްގައި އެމްބަސީ ހުޅުވުމަކީ އިޒްރޭލުން ފަލަސްތީނުގެ ބިންތަކަށް ވެރިވެގަނެގެން ހިންގާ ޖަރީމާތަކަށް ލިބޭ ހިތްވަރެކެވެ. މީގެ ކުރިން އެމެރިކާއިން ވެސް ވަނީ އެގައުމުގެ އެމްބަސީ ގުދުސްއަށް ބަދަލުކޮށްފައެވެ. މިއީ މުޅި ދުނިޔޭގެ މުސްލިމުންގެ ނުރުހުން އަމާޒުވެފައިވާ ކަމެކެވެ.
