ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޒީރުންގެ މަޖިލީހަށް ގެންނެވި ބަދަލުތަކާ ގުޅިގެން، އަލުން ހުވާކުރެއްވި 14 ވަޒީރުންނަށް ރުހުން ހޯދުމުގެ މައްސަލަ ރައްޔިތުންގެ މަޖިލީހަށް މިއަދު ފޮނުއްވައިފިއެވެ.

މި ބަދަލުތަކަކީ ސަރުކާރުގެ ހިންގުން ހަރުދަނާކުރުމަށް މި މަހުގެ 14 އަދި 15 ވަނަ ދުވަހު ގެންނެވި ބަދަލުތަކެކެވެ. ވަޒީރުންގެ މަޖިލީހަށް ގެންނެވި ބަދަލުތަކާއެކު، ކުރިން 20 ވުޒާރާ އޮތް އޮނިގަނޑު ވަނީ 15 ވުޒާރާއަށް މަދުކުރައްވާފައެވެ. މި ބަދަލާ ގުޅިގެން 10 ވަޒީރަކު ވަނީ މަގާމުން އިސްތިއުފާ ދެއްވާފައެވެ. އިސްތިއުފާ ދެއްވި ވަޒީރުން ވިދާޅުވީ، މިއީ ރައްޔިތުންގެ ވިންދާ އެއްގޮތަށް ސަރުކާރު ހިންގުމަށް ރައީސުލްޖުމްހޫރިއްޔާ ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެ ގޮތުން ނިންމެވި ނިންމެވުމެއް ކަމަށެވެ.

ރައީސުލްޖުމްހޫރިއްޔާ ވަނީ ވަޒީރުންގެ މަޖިލީހަށް އަލަށް 5 ބޭފުޅަކު އައްޔަންކުރައްވާފައެވެ. އަދި ކުރިން ވަޒީރުންގެ މަޖިލީހުގައި ހިމެނިވަޑައިގެންނެވި 9 ބޭފުޅަކު، ވުޒާރާތަކުގެ މަސްއޫލިއްޔަތުތަކަށް ގެންނެވި ބަދަލުތަކާއެކު ވަނީ އަލުން މަގާމުގެ ހުވާކުރައްވާފައެވެ.

ރުހުން ހޯދުމަށް ފޮނުއްވި ވަޒީރުންގެ ލިސްޓު

ރުހުން ހޯއްދެވުމަށް މަޖިލީހަށް ފޮނުއްވި ވަޒީރުންގެ ތެރޭގައި ހިމެނިވަޑައިގަންނަވަނީ:

1. ހަސަން ރަޝީދު (ދިފާއީ ވަޒީރު)
2. މޫސާ ޒަމީރު (މާލީ ވަޒީރު)
3. އަލީ އިހްސާން (ދާޚިލީ ވަޒީރު)
4. އިރުތިޝާމް އާދަމް (ޚާރިޖީ ވަޒީރު)
5. ޑރ. އިސްމާއިލް ޝަފީއު (ތައުލީމީ ވަޒީރު)
6. ގީލާ އަލީ (ސިއްހީ ވަޒީރު)
7. މުހައްމަދު ސައީދު (އިގުތިސާދީ ވަޒީރު)
8. އަހުމަދު ޝިޔާމް (މަސްވެރިކަމާ ބެހޭ ވަޒީރު)
9. ޑރ. މުހައްމަދު ޝަހީމް އަލީ ސައީދު (އިސްލާމީކަންތައްތަކާ ބެހޭ ވަޒީރު)
10. މުހައްމަދު އަމީން (ފަތުރުވެރިކަމާ ބެހޭ ވަޒީރު)
11. އަބްދުﷲ ރާފިއު (ޒުވާނުންނާ ބެހޭ ވަޒީރު)
12. ހީނާ ވަލީދު (ފަންނާއި ސަގާފަތާ ބެހޭ ވަޒީރު)
13. އަބްދުﷲ މުއްތަލިބް (ބިނާރާ ބެހޭ ވަޒީރު)
14. އަލީ ޝަރީފް (ތިމާވެއްޓާ ބެހޭ ވަޒީރު)

ރައީސުލްޖުމްހޫރިއްޔާ ފޮނުއްވި މި މައްސަލަ މިހާރު ވަނީ ދިރާސާކުރުމަށްޓަކައި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުވާފައެވެ. ގާނޫނުއަސާސީގައިވާ ގޮތުގެ މަތިން، ވަޒީރުންނަށް ފުރިހަމަ ގާނޫނީ ބާރުވެރިކަން ލިބިގެންދާނީ މަޖިލީހުގެ ރުހުން ލިބުމުންނެވެ. ވަޒީރުންނަށް ރުހުން ދިނުމާ މެދު ގޮތެއް ނިންމާނީ ކޮމިޓީން މައްސަލަ ދިރާސާކޮށް ނިންމުމުން، މަޖިލީހުގެ ތަޅުމުގައި ނަގާ ވޯޓަކުންނެވެ.