ގާނޫނުއަސާސީ އިސްލާހުކޮށް ބަދަލުކުރުމަކީ ރައްޔިތުން އެންމެ ރުހޭ ގޮތް ނޫންކަމަށް ވާތީ، ކުރިއަށް އޮތް ތަނުގައި ގާނޫނުއަސާސީއަށް އިތުރު ބަދަލުތަކެއް ނުގެންނަވަން ނިންމަވާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ގާނޫނުއަސާސީއަށް އަށްވަނަ އިސްލާހު ގެނައުމާ ގުޅޭގޮތުން ދާދިފަހުން ނެގި ފެންނަ ނުފެންނަ ވޯޓުން ރައްޔިތުން ވަރަށް ސާފު މެސެޖެއް ދީފައިވާ ކަމަށެވެ. އެގޮތުން، ގާނޫނުއަސާސީ ބަދަލުކުރުމަކީ ރައްޔިތުން ބޭނުންވާ ގޮތް ނޫންކަން އެނގިވަޑައިގެންފައިވާތީ، ރައްޔިތުންގެ ވިންދާ އެއްގޮތަށް އަމަލުކުރެއްވުމަށް ސަރުކާރުން ނިންމާފައިވާ ކަމަށް އެމަނިކުފާނު ފާހަގަކުރެއްވި އެވެ.
"އަޅުގަނޑު ހިތުން ފެންނަ ނުފެންނަ ވޯޓުން ރައްޔިތުން މިވަނީ ވަރަށް ބޮޑު މެސެޖެއް ދެއްވާފައި. އެއީ ގާނޫނުއަސާސީއަށް ބަދަލުތައް ގެންނައުމަކީ ރައްޔިތުން އެހާ ބޮޑަށް ގަބޫލުކުރާ ނުވަތަ ފޭވާކުރާ ކަމެއް ނޫންކަން. އެހެންވީމާ ގާނޫނުއަސާސީ ބަދަލުކޮށްގެން ގެންނަންޖެހޭ އިސްލާހެއް ކުރިއަށް އޮތް ތާނގައި ގެންނާކަށް އަޅުގަނޑުމެން ގަސްތެއްނުކުރަން،" ރައީސް ވިދާޅުވި އެވެ.
Advertisement
މިދިޔަ އޭޕްރީލް މަހުގެ 4 ވަނަ ދުވަހު ނެގި ވޯޓަކީ ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމަށާއި މަޖިލީހުގެ ދައުރު ފެށޭ ތާރީހަށް ބަދަލު ގެނައުމަށް ހުށަހެޅި އިސްލާހާ ގުޅޭ ވޯޓެކެވެ. އެ ވޯޓުގައި ބައިވެރިވި ރައްޔިތުންގެ 69 އިންސައްތަ މީހުން ވަނީ އެ އިސްލާހު ތަސްދީގުކުރަން ނުފެންނަ ކަމަށް ވޯޓު ދީފަ އެވެ.
ގާނޫނުއަސާސީ ބަދަލުނުކުރެއްވި ނަމަވެސް، ގާނޫނުތަކަށް ބަދަލު ގެނެސްގެން ދައުލަތް ހިންގުމުގެ ނިޒާމަށް ގެންނަންޖެހޭ މުހިއްމު އިސްލާހުތައް ގެންނަވާނެ ކަމަށް ރައީސް ވިދާޅުވި އެވެ. މިގޮތުން ރައްޔިތުންގެ މަޖިލީހުގެ މެންބަރުންގެ އަދަދު އިތުރުނުވާނެހެން ހިފެހެއްޓުމާއި، ޝަރުއީ ދާއިރާ އިސްލާހުކުރުމުގެ މަސައްކަތް ކުރިއަށްދާނެ ކަމަށް އެމަނިކުފާނު ވިދާޅުވި އެވެ. ޚާއްސަކޮށް، ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އަކީ ޖޭއެސްސީގެ ބަދަލުގައި ޖުޑީޝަލް ކައުންސިލަށް ޖަވާބުދާރީވާ ތަނަކަށް ހެދުމަށް ބޭނުންވާ ބަދަލުތައް ގެންނަވާނެ ކަމަށްވެސް ރައީސް ފާހަގަކުރެއްވިއެވެ.
ރައީސް ވިދާޅުވީ، ސަރުކާރުން އަބަދުވެސް މަސައްކަތް ކުރާނީ ރައްޔިތުންގެ ނިންމުންތަކަށް އިހުތިރާމްކޮށް، ރައްޔިތުން އެދޭ ގޮތަށް ގައުމުގެ ކަންކަން ކުރިއަށް ގެންދިއުމަށް ކަމަށެވެ.
