ވެރިކަން ކުރާ ޕީއެންސީގެ ޓިކެޓުގައި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަންގައި ވާދަކުރުމަށް އެ ދާއިރާގެ ކުރީގެ މެންބަރު މުހައްމަދު ސިނާނާއި، ހިތަދޫ މޫލެކެޑެ ދާއިރާގެ މިހާރުގެ ކައުންސިލަރު އަހްމަދު ސައީދު ކުރިމަތިލައްވައިފި އެވެ.
ޕީއެންސީގެ ޓިކެޓުގައި މި އިންތިހާބުގައި ވާދަކުރުމަށް އެދި ހުށަހެޅުމުގެ ފުރުސަތު މިއަދު އިރުއޮއްސި 6:00 އަށް ހަމަވިއިރު، އެ ޕާޓީގެ ޕްރައިމަރީގައި ވާދަކުރުމަށް ފޯމު ހުށަހަޅާފައިވަނީ ސިނާނާއި ސައީދު އެކަނި ކަމަށް މައުލޫމާތު ލިބެ އެވެ. ޕީއެންސީން ބުނެފައިވާ ގޮތުގައި، ޝަރުތު ހަމަވާ އެކަކަށް ވުރެ ގިނަ މީހުން ކުރިމަތިލާފައިވާ ނަމަ، ޕާޓީގެ ކެންޑިޑޭޓަކު ކަނޑައަޅާނީ އެތެރޭގެ ޕްރައިމަރީއަކުންނެވެ.
މިކަމާ ގުޅޭގޮތުން އަހްމަދު ސައީދު ވިދާޅުވީ، އޭނާ ކުރިމަތިލެއްވީ ދާއިރާގެ ރައްޔިތުންނަށާއި އައްޑޫ ސިޓީއަށް ހިދުމަތް ކުރުމުގެ މަތިވެރި ނިޔަތުގައި ކަމަށެވެ. "އަޅުގަނޑަކީ އެ ދާއިރާގެ ނިމިގެންދާ ދައުރުގެ ކައުންސިލަރު. އިރާދަކުރެއްވިއްޔާ ޕާޓީއަށް މި ގޮނޑި ހޯދައިދިނުމުގައި އަޅުގަނޑު ސާބިތުވެ ހުންނާނަން،" ސައީދު ވިދާޅުވި އެވެ.
ހިތަދޫ އުތުރު ދާއިރާގެ ގޮނޑި ހުސްވީ، އެ ދާއިރާގެ މެންބަރަކަށް ހުންނެވި މުހައްމަދު ސިނާންގެ މައްޗަށް ސާބިތު ދަރަންޏެއް އޮތުމާ ގުޅިގެން އޭނާގެ މެންބަރުކަމުގެ ޝަރުތު ގެއްލިފައިވާ ކަމަށް ސުޕްރީމް ކޯޓުން ހުކުމް ކުރުމާ ގުޅިގެންނެވެ. ސިނާންގެ މެންބަރުކަމާ މެދު ސުޕްރީމް ކޯޓަށް މައްސަލަ ހުށަހެޅީ، އިސްލާމިކް ބޭންކުން ނެގި ލޯނަކަށް ދައްކަންޖެހޭ 3.8 މިލިއަން ރުފިޔާ ދެއްކުމަށް ހިތަދޫ ކޯޓުން ކުރި ހުކުމާ އެއްގޮތަށް ފައިސާ ދައްކާފައިނުވާތީ އެވެ.
ހިތަދޫ އުތުރު ދާއިރާގެ ބައި އިލެކްޝަން އަންނަ ޖޫން މަހުގެ 6 ވަނަ ދުވަހު ބޭއްވުމަށް އިލެކްޝަންސް ކޮމިޝަނުން މިހާރު ނިންމާފައި އެވެ.
