2028 ވަނަ އަހަރު ބާއްވާ ރިޔާސީ އިންތިހާބު ކާމިޔާބު ކުރެވިއްޖެ ނަމަ، ދައުލަތުގެ ވެރިޔާގެ މަގާމަށް ކުރީގެ ރައީސް މުހައްމަދު ނަޝީދު އައްޔަންކުރައްވާނެ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް މިއަދު އިއުލާނު ކުރައްވައިފި އެވެ.
"ބޮޑު ބަދަލު" ނަމުގައި ފައްޔާޒު އިސްމާއިލާއި ރައީސް ނަޝީދުގެ ފެކްޝަނުން މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި، މި ދެ ބޭފުޅުން ވަނީ ކުރިއަށް އޮތް ތަނުގައި އެމްޑީޕީން ގެންނަން ގަސްދުކުރާ ސިޔާސީ ބޮޑެތި ބަދަލުތަކުގެ ތަފްސީލު ހާމަކުރައްވާފަ އެވެ.
މި ބައްދަލުވުމުގައި ރައީސް ނަޝީދު ވިދާޅުވީ، ރާއްޖޭގެ ވެރިކަމުގެ ނިޒާމަށް ގެންނަން އުޅޭ ބޮޑު ބަދަލުގެ ދަށުން، ސަރުކާރުގެ ވެރިޔާގެ މަގާމަށް ފައްޔާޒު އިސްމާއިލް ގެނައުމަށް އެމަނިކުފާނު ތާއީދު ކުރައްވާ ކަމަށެވެ. މި ބަދަލުތަކާ ގުޅޭގޮތުން ހުށަހެޅި ޕްރެޒެންޓޭޝަނުގައި އެންމެ ބޮޑަށް އަލިއަޅުއްވާލާފައިވަނީ ސަރުކާރުގެ ވެރިޔަކާއި ދައުލަތުގެ ވެރިއެއް ވަކިން ހުންނަވާ ބަރުލަމާނީ ނިޒާމެއްގެ ސިފަތަކަށެވެ.
Advertisement
ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ނަޝީދު ވަނީ އެމްޑީޕީގެ ކުރިއަށް އޮތް ޗެއާޕާސަން ކަމުގެ މަގާމަށް ކުރިމަތިލައްވާނެކަން ރަސްމީކޮށް އިއުލާނު ކުރައްވާފަ އެވެ. އެމަނިކުފާނު ވިދާޅުވި ގޮތުގައި މި ބަދަލުތައް ގެނެވޭނީ އެމަނިކުފާނަށް ކަމަށް ގަބޫލުކުރެއްވޭތީ، އެކަމަށް މަގުފަހިކުރުމަށްޓަކައި ޗެއާޕާސަން ކަމަށް ކުރިމަތިލައްވަނީއެވެ. ފާހަގަކޮށްލެވޭ ގޮތުގައި މި މަގާމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވެސް ވަނީ ޝައުގުވެރިކަން ފާޅުކުރައްވާފަ އެވެ.
ކުރިއަށް އޮތް ރިޔާސީ އިންތިހާބުގައި ވާދަނުކުރައްވާނެ ކަމުގެ އިޝާރާތެއް ރައީސް ނަޝީދު ދެއްވާފައިވާއިރު، އެމްޑީޕީގެ ތެރޭގައި ރިޔާސީ ޓިކެޓަށް ޝައުގުވެރިވާ ގިނަ ލީޑަރުންތަކެއް އެބަހުއްޓެވެ. އޭގެ ތެރޭގައި ފައްޔާޒު އިސްމާއިލްގެ އިތުރުން ކުރީގެ ރައީސް އިބްރާހިމް މުހައްމަދު ސޯލިހް، މާލޭގެ މޭޔަރު އާދަމް އާޒިމް، ކުރީގެ ފޮރިން މިނިސްޓަރު އަބްދުﷲ ޝާހިދު އަދި ޝަމްހީދު އަހްމަދު ހިމެނެ އެވެ.
