ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓު ނާކާމިޔާބުވީ ސަރުކާރު ހިންގާ ޕީއެންސީގެ ކެމްޕެއިން ޓީމުތަކަށް އެކަށީގެންވާ ގޮތެއްގައި މަސައްކަތް ނުކުރެވުމުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ހޮނިހިރު ދުވަހުގެ ރޭ އއ. ރަސްދޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ރެފަރަންޑަމްގެ ވޯޓު ނާކާމިޔާބުވި ސަބަބުތައް ތަފްސީލުކޮށް ބެލިއިރު، އެންމެ ބޮޑު އެއް ސަބަބަކީ ޕީއެންސީގެ ކެމްޕޭން ޓީމުތަކުން އެކަމަށް އެކަށީގެންވާ މަސައްކަތްތަކެއް ކޮށްފައި ނުވުން ކަމަށެވެ. މި ޖަލްސާއަކީ މި މަހުގެ 4 ވަނަ ދުވަހު ބޭއްވި ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިލެކްޝަންގައި ތޮއްޑޫ ދާއިރާގެ ތިން ރަށުން ވެސް ޕީއެންސީގެ ކެންޑިޑޭޓުން ހޯދި ކާމިޔާބީ ފާހަގަކުރުމަށް ބޭއްވި ޖަލްސާއެކެވެ.
ދެ އިންތިހާބު އެއްކޮށް ބޭއްވުމުގެ މުހިންމުކަން ރައީސް އަމިއްލަފުޅަށް ވެސް ތަކުރާރުކޮށް ސާފުކޮށްދެއްވާފައިވާނެކަން ފާހަގަކުރައްވަމުން އެމަނިކުފާނު ވިދާޅުވީ، އޭގައި އޮތީ ހުސް ފައިދާ ކަމަށާއި ނަމަވެސް އެ މައުލޫމާތު ރައްޔިތުންނަށް އެކަށީގެންވާ ގޮތެއްގައި ފޯރުކޮށްދިނުމުގައި ކެމްޕެއިން ޓީމުތައް ފަހަތަށް ޖެހިފައިވާ ކަމަށެވެ.
"އެއީ އެހާ ސާފުކޮށް އޮތް މައްސަލައެއް. އެކަމަކު އެކަން ކިޔައިދޭން އަޅުގަނޑުމެންނަކަށް އެކަށީގެންވާ ގޮތެއްގައި މަސައްކަތެއް ނުކުރެވޭ. އަޅުގަނޑުމެންގެ ކެމްޕޭން ޓީމުތަކުން އެ މަސައްކަތް ރަނގަޅަށް ކުރެވިފައެއް ނެތް،" ރައީސް ވިދާޅުވި އެވެ.
މި ވޯޓުގެ ރަސްމީ ނަތީޖާއަށް ބަލާއިރު ނުފެންނަ ކަމަށް 148،859 މީހުން ވޯޓު ލާފައިވެ އެވެ. އެއީ ވޯޓު ލީ މީހުންގެ 68.74 އިންސައްތަ އެވެ. އަދި ފެންނަ ކަމަށް ވޯޓު ލާފައިވަނީ 67،680 މީހުންނެވެ. އެއީ ވޯޓުގެ 31.26 އިންސައްތަ އެވެ. ރައީސް ވިދާޅުވީ ރައްޔިތުން ނިންމި ގޮތަށް އެކަން އެގޮތުގައި ދެމިއޮންނާނެ ކަމަށެވެ.
ރައީސް އިތުރަށް ވިދާޅުވީ ޕީއެންސީން އެކަމަށް ދޭންޖެހޭ ސަމާލުކަން ނުދެވި އޮތް ވަގުތު، އިދިކޮޅު ފަރާތްތަކުން ފެތުރި ދޮގު ވާހަކަތައް ރައްޔިތުންނާ ހަމައަށް ފޯރާފައިވާ ކަމަށެވެ. އަދި އިންތިހާބުތަކަށް ރައްޔިތުންގެ ކައިރިއަށް ދާއިރު އެކުވެރިކަމާއެކު އެއް ޓީމެއްގެ ގޮތުގައި ވަރުގަދަ މަސައްކަތްތަކެއް ކުރަންޖެހޭނެ ކަމަށް އެމަނިކުފާނު ނަސޭހަތްތެރިވެލެއްވި އެވެ.
މި އިންތިހާބާ ދިމާކޮށް ރައީސް ރަށްރަށަށް ވަޑައިނުގަތް ސަބަބާ ގުޅޭގޮތުން މީގެ ކުރިން ރައީސް ވިދާޅުވީ، މީގެ ކުރިން ރައީސުން ރަށްރަށަށް ވަޑައިގަންނަވަނީ އިންތިހާބުތަކާ ދިމާކޮށް "ކަނޑަޖަހަން" ކަމަށާއި، އެ އުސޫލު ގެންގުޅެން ބޭނުންފުޅު ނުވާ ކަމަށެވެ. ނަމަވެސް ވެރިކަމުގެ މިވީ މުއްދަތުގައި ހުރިހާ ރަށަކަށް ޒިޔާރަތްކޮށް ރައްޔިތުންގެ ހާލަތު ބައްލަވާފައިވާނެ ކަމަށް ވިދާޅުވި އެވެ.
