މިއަދު ކުރިއަށްދިޔަ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިއުޑީސީ) ގެ ބައި-އިލެކްޝަންގެ ދެވަނަ ބުރުގައި، ވެރިކަން ކުރާ ޕީއެންސީން ބޮޑު ކާމިޔާބީއެއް ހޯދައި، ހއ. ކެލާއާއި ލ. މާވަށުގެ ޑަބްލިއުޑީސީ ގޮޑި ކާމިޔާބުކޮށްފި އެވެ.
މި އިންތިހާބަކީ މީގެ ކުރިން ބޭއްވުނު އިންތިހާބުގައި ކެންޑިޑޭޓުންގެ ވޯޓު އެއްވަރުވުމާ ގުޅިގެން، ނަތީޖާ ކަށަވަރު ކުރުމަށްޓަކައި ބޭއްވުނު ދެވަނަ ބުރެކެވެ. އިންތިހާބުގެ ވަގުތީ ނަތީޖާ ދައްކާގޮތުން، ވާދަކުރި ގޮނޑިތަކުގެ ތެރެއިން ތިން ގޮނޑިއެއް ޕީއެންސީން ވަނީ ކާމިޔާބުކޮށްފަ އެވެ.
އިންތިހާބުގެ ވޯޓުލުން ކުރިއަށްދިޔައީ ބ. ދޮންފަނު ކައުންސިލްގެ އަންހެނުންނަށް ހާއްސަ ގޮނޑިއަށާއި، ފުވައްމުލައް ސިޓީ ދަޑިމަގު ދާއިރާގެ މެންބަރު ހޮވުމަށެވެ. މީގެ އިތުރުން ހއ. ކެލާ އަންހެނުންގެ ކޮމިޓީގެ ރައީސް ހޮވުމަށާއި، ހދ. ނޭކުރެންދޫ އަދި ލ. މާވަށު އަންހެނުންގެ ކޮމިޓީގެ މެންބަރުން ހޮވުމަށް ވެސް ވޯޓުލުން ކުރިއަށްދިޔައެވެ.
ވަގުތީ ނަތީޖާ ދައްކާގޮތުން ޕީއެންސީން ކާމިޔާބުކުރި ތިން ގޮނޑިއަކީ:
- ހއ. ކެލާ: އަންހެނުންގެ ކޮމިޓީގެ ރައީސްގެ ގޮނޑި - ހައްވާ ފަޒްނާ (ޕީއެންސީ)
- ހދ. ނޭކުރެންދޫ: އަންހެނުންގެ ކޮމިޓީގެ މެންބަރުގެ ގޮނޑި - ފާތިމަތު ރިއުޒާ (ޕީއެންސީ)
- ލ. މާވަށު: އަންހެނުންގެ ކޮމިޓީގެ މެންބަރުގެ ގޮނޑި - ފާތިމަތު ޝާފިއާ (ޕީއެންސީ)
މީގެ އިތުރުން ބ. ދޮންފަނު ކައުންސިލްގެ އަންހެނުންނަށް ހާއްސަ ގޮނޑި ކާމިޔާބު ކުރެއްވީ އެމްޑީޕީގެ ކެންޑިޑޭޓް އާމިނަތު ރަފާހް އެވެ. އަދި ފުވައްމުލައް ސިޓީ ދަޑިމަގު ދާއިރާގެ މެންބަރުގެ ގޮނޑި ކާމިޔާބު ކުރެއްވީ އަމިއްލަ ގޮތުން ވާދަކުރެއްވި ކެންޑިޑޭޓް ޝީޒާ އިބްރާހިމެވެ.
