ހދ. ނޭކުރެންދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިޔުޑީސީ) އަށް މެންބަރަކު ހޮވުމަށް މިއަދު ބޭއްވި އިންތިހާބުގެ ދެވަނަ ބުރު، ސަރުކާރު ހިންގާ މައި ޕާޓީ ޕީއެންސީގެ ކެންޑިޑޭޓް ފާތިމަތު ރިއުޒާ ކާމިޔާބުކޮށްފި އެވެ.

މި ގޮނޑިއަށް މެންބަރަކު ހޮވުމަށް މިއަދު ދެވަނަ ބުރެއް ބާއްވަން ޖެހުނީ، މިދިޔަ އެޕްރީލް މަހުގެ 4 ވީ ހޮނިހިރު ދުވަހު ބޭއްވި ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންގައި ވާދަކުރި ދެ ކެންޑިޑޭޓުންނަށް ލިބުނު ވޯޓު އެއްވަރުވުމާ ގުޅިގެންނެވެ. އެ ފަހަރު ޕީއެންސީގެ ކެންޑިޑޭޓް ފާޠިމަތު ރިއުޒާ އާއި އަމިއްލަ ގޮތުން ވާދަކުރެއްވި ފާތިމަތު ނިޝާދާ، މިއިން ކޮންމެ ކެންޑިޑޭޓަކަށް ލިބިފައިވަނީ 300 ވޯޓެވެ.

މިއަދު ބޭއްވި ދެވަނަ ބުރުގެ ވޯޓުލުމުގައި ޕީއެންސީގެ ކެންޑިޑޭޓް ރިއުޒާ ގޮނޑި ކަށަވަރުކޮށްފައިވާކަން އިންތިހާބުގެ ކަންކަމުގައި އިސްކޮށް އުޅުއްވި ބައެއް ބޭފުޅުން ވަނީ ކަށަވަރުކޮށްދީފަ އެވެ. ނަމަވެސް، މިހާތަނަށް ވޯޓުގެ ސާފު އަދަދުތައް ރަސްމީ އިދާރާތަކުން ހާމަކޮށްފައެއް ނުވެ އެވެ.

ނޭކުރެންދޫގެ އިތުރުން، އިތުރު ބައެއް ރަށްރަށުގެ ހުސްވެފައިވާ ގޮނޑިތަކަށް މެންބަރުން ހޮވުމުގެ ވޯޓުލުންވެސް މިއަދު ވަނީ ކުރިއަށް ގޮސްފަ އެވެ. އޭގެ ތެރޭގައި ހއ. ކެލާ ޑަބްލިޔުޑީސީގެ ރައީސް ހޮވުމާއި، ބ. ދޮންފަން ކައުންސިލްގެ އަންހެނުންނަށް ހާއްސަ ގޮނޑީގެ އިތުރުން، ފުވައްމުލައް ސިޓީ ދަޑިމަގު ދާއިރާގެ އަންހެނުންނަށް ހާއްސަ ގޮނޑިއާއި ލ. މާވަށް ޑަބްލިޔުޑީސީ މެންބަރު ހޮވުމަށް ބޭއްވި އިންތިހާބު ހިމެނެ އެވެ.

މި އިންތިހާބުތަކަކީ އެކި ސަބަބުތަކާ ހުރެ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުން ހުސްވެފައިވާ މަޤާމުތަކަށް މެންބަރުން އިންތިހާބު ކުރުމަށް އިލެކްޝަންސް ކޮމިޝަނުން ކުރިއަށް ގެންދިޔަ އިންތިހާބުތަކެކެވެ.