މަސްވެރިންނަށް ތެޔޮ ލިބުން ދަތިވެ، މަސްވެރިކަމަށް ބުރޫ އަރާފައިވާ ކަމަށް ބުނެ ބައެއް މީޑިއާތަކުން ރިޕޯޓްކޮށްފައިވާ ހަބަރުތަކަކީ ހަގީގަތާ ހިލާފު ދޮގު ހަބަރުތަކެއް ކަމަށް މިނިސްޓާ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްގެ އަހްމަދު ޝިޔާމް ވިދާޅުވެއްޖެ އެވެ.

މިނިސްޓަރު މިފަދައިން ވިދާޅުވީ، ރާއްޖޭގެ މަސްވެރި އުޅަނދުފަހަރަށް ތެޔޮ ލިބުމުގައި ދަތިތަކެއް ކުރިމަތިވެފައިވާ ކަމަށް ބުނެ ދެކެވޭ ވާހަކަތަކާ ގުޅިގެންނެވެ. ވަޒީރު ވިދާޅުވީ ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިގެން ދިޔަ ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންނަނީ މަސްވެރިންނަށް އެއްވެސް ދަތިކަމެއް ނުވާނެހެން ތެޔޮ ލިބުމުގެ އިންތިޒާމްތައް ވަރަށް ފުރިހަމައަށް މެނޭޖުކުރަމުން ކަމަށެވެ.

މި އުނދަގޫ އިގްތިސާދީ ހާލަތުގައިވެސް ސަރުކާރުން އެންމެ ބޮޑު އިސްކަމެއް ދޭ އެއް ކަމަކީ ދިވެހި މަސްވެރިން މަސްކަނޑުތަކަށް ނިކުމެވޭނެކަން ކަށަވަރުކުރުން ކަމަށް މިނިސްޓަރު ފާހަގަކުރެއްވި އެވެ. "ދުނިޔޭގެ ބާޒާރުގައި ތެލުގެ އަގު މިއިން ދުވަހަކު މައްޗަށް އަރައިގެން ނުދާވަރަށް މައްޗަށް އަރައިގެން ދިޔަނަމަވެސް، ދިވެހި މަސްވެރިންނަށް އެ ބުރަ ނުޖައްސާ ސަރުކާރުން މިގެންދަނީ ތެލުގެ ކަންކަން ވީއެންމެ ރަނގަޅަށް މެނޭޖުކުރަމުން،" މިނިސްޓަރު ވިދާޅުވި އެވެ. އަދި މިކަން މަސްވެރިންވެސް ޝުކުރުވެރިކަމާއެކު ބަލައިގަންނަކަން މިނިސްޓަރު ފާހަގަކުރެއްވި އެވެ.

މީޑިއާތަކުން ފަތުރާ ހަބަރުތަކަށް އިޝާރާތް ކުރައްވައި މިނިސްޓަރު ވިދާޅުވީ، ނޫސްތަކުގައި އެފަދަ ހެޑްލައިންތައް ޖަހާއިރު ކަން އޮތްގޮތް ރަނގަޅަށް ބަލާލިނަމަ ވަރަށް ބޮޑަށް ރަނގަޅުވީސް ކަމަށެވެ. މީގެއިތުރުން ގިނަ ދުވަސްތަކެއް ވަންދެން އެންވެރިކަން ދަށްވެފައި އޮތުމަށްފަހު، މިހާރު މުޅި ރާއްޖެއަށްވެސް އެންވެރިކަން ރަނގަޅުވަމުން އަންނާތީ، މާތްﷲގެ އިރާދަފުޅާއެކު މަސްވެރިކަން އަންނަކީ ވަރަށް ބޮޑަށް ރަނގަޅުވަމުންނެވެ. އެހެންކަމުން މަސްވެރިކަން ރަނގަޅު ސަރަހައްދުތަކަށް މަސް ގަންނަ ބޯޓުތައް ފޮނުވުމުގެ މަސައްކަތްވެސް ސަރުކާރުން ދަނީ ކުރަމުންނެވެ.

މީގެ އިތުރުން، މަސްވެރި ސިނާއަތުގައި ހަރަކާތްތެރިވާ ކުންފުނިތަކަށް ދިމާވެފައިވާ ގޮންޖެހުންތަކަށް ހައްލު ހޯދުމަށް އިންޑަސްޓްރީގެ މަޝްވަރާއާއެކު ގިނަ މަސައްކަތްތަކެއް ކުރަމުންދާ ކަމަށްވެސް މިނިސްޓަރު ވިދާޅުވި އެވެ. ދުނިޔޭގެ އިގްތިސާދަށް ހީނަރުކަމެއް ކުރިމަތިވެފައިވާ މި ނާޒުކު ދަނޑިވަޅުގައި، ރާއްޖޭގެ އިގްތިސާދު ހިފެހެއްޓުމަށާއި މަސްވެރިންނަށް އެންމެ ރަނގަޅު ގޮތްތައް މަގުފަހިކޮށްދިނުމަށް ސަރުކާރުން އަންނަނީ ހަރުދަނާ ފިޔަވަޅުތަކެއް އަޅަމުންނެވެ.