ސަރުކާރު ހިއްސާވާ ކުންފުނިތަކުގެ ހިންގުމުގެ ނިޒާމު ހަރުދަނާކޮށް، ހަރަދުތައް ކުޑަކުރުމުގެ ގޮތުން ކުންފުނިތަކުގެ މުވައްޒަފުންގެ އަދަދު 33 އިންސައްތަ މަދުކުރުމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން ނިންމައިފި އެވެ.

މި ނިންމުމާ ގުޅިގެން، ކަމާބެހޭ ގާނޫނުތަކާއި ގަވާއިދުތަކުގެ ތެރެއިން އަޅަންޖެހޭ ފިޔަވަޅުތައް އެޅުމަށް، 17 އެޕްރީލް 2026 ގައި ފައިނޭންސް މިނިސްޓްރީން ވަނީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީ.ސީ.ބީ) އަށް އަންގާފަ އެވެ. ޕީ.ސީ.ބީގެ ރައީސް މުހައްމަދު އަނަސް އަށް ފޮނުއްވި ސިޓީއެއްގައި މިނިސްޓްރީން ވަނީ، ކުންފުނިތަކުގެ ހިންގުންތެރިކަން އިތުރުކުރުމާއި، އިންސާނީ ވަސީލަތްތައް މެނޭޖްކުރުން ހަރުދަނާކުރުމުގެ އިތުރުން މާލީ ގޮތުން ދެމެހެއްޓެނިވި ގޮތެއްގައި ކުންފުނިތައް ހިންގުމަށް ބާރުއެޅުމުގެ ގޮތުން އަޅަންޖެހޭ މުހިންމު ފިޔަވަޅުތައް ބަޔާންކޮށްފަ އެވެ.

މި އިރުޝާދުތަކުގެ އެންމެ މުހިންމު އެއް ބަޔަކީ ކުންފުނިތަކުގެ މުވައްޒަފުންގެ އަދަދު 33 އިންސައްތައަށް މަދުކުރުމަށް ދީފައިވާ އަމުރެވެ. މީގެ އިތުރުން، ވަޒީފާއަށް މީހުން ނެގުމުގެ ނިޒާމު ހަރުދަނާކޮށް، ތައުލީމީ ފެންވަރާއި ހުނަރަށް ބަލައިގެން މީހުން އައްޔަންކުރާ "މެރިޓް ބޭސްޑް" އުސޫލަކަށް އަމަލުކުރަން ފެށުމަށް ވެސް ވަނީ އަންގާފަ އެވެ. މިއީ އެންމެ ގާބިލު ފަރާތްތަކަށް ވަޒީފާގެ ފުރުސަތު ދީ، ކުންފުނިތަކުގެ އުފެއްދުންތެރިކަން އިތުރުކުރުމަށް އެޅޭ ފިޔަވަޅެއް ކަމަށް މިނިސްޓްރީން ފާހަގަކުރި އެވެ.

ފައިނޭންސް މިނިސްޓްރީން ފާހަގަކުރި ގޮތުގައި، މި ފިޔަވަޅުތަކަކީ ދައުލަތުގެ މާލީ ސިޔާސަތުތަކާ އެއްގޮތަށް ކުންފުނިތަކުގެ މަސައްކަތްތައް ބައްޓަންކުރުމަށާއި، ދިގު މުއްދަތަކަށް ކުންފުނިތައް ދެމެހެއްޓެނިވި ގޮތެއްގައި ހިންގުމަށްޓަކައި މިވަގުތު ކޮންމެހެން އަޅަންޖެހޭ ފިޔަވަޅުތަކެކެވެ. މިކަންކަން ތަންފީޒުވަމުންދާ މިންވަރު މޮނިޓަރކޮށް، ގަވާއިދުން އަދާހަމަ މަޢުލޫމާތު ހިއްސާކުރުމަށް ޕީ.ސީ.ބީ އަށް ވަނީ އަންގާފަ އެވެ.

މި އިރުޝާދުތަކަކީ ހަރަދު ކުޑަކުރުމަށް މީގެ ކުރިން ޕީ.ސީ.ބީން ނެރެފައިވާ އުސޫލުތަކަށް އިތުރުކުރެވުނު ބަދަލުތަކެކެވެ. މީގެ ކުރިން އަޅާފައިވާ ފިޔަވަޅުތަކުގެ ތެރޭގައި، މުސާރައާއި އިނާޔަތްތައް ކޮންޓްރޯލް ކުރުމާއި، ކޮންމެހެން ބޭނުންވާ ހާލަތްތަކުގައި ފިޔަވައި އައު މުވައްޒަފުން ނެގުމާއި މަގާމުގެ ކުރިއެރުން ދިނުން ހުއްޓާލުމުގެ އިތުރުން، އިތުރުގަޑީގެ މަސައްކަތާއި އިހްތިޔާރީ ހަރަދުތައް ކުޑަކުރުން ހިމެނެ އެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ސަރުކާރު ހިއްސާވާ ކުންފުނިތައް އިސްލާހުކުރުމަށް ފަށާފައިވާ މި މަސައްކަތުގެ ދަށުން، ކުންފުނިތަކަކީ ދައުލަތަށް ބުރައަކަށް ނުވާނެހެން ހިންގާ ތަންތަނަށް ހެދުމަށް ގިނަ މަސައްކަތްތަކެއް ކުރަމުންދާކަން ފާހަގަކުރެވެ އެވެ.