އިސްލާމްދީނުގެ މަތިވެރި ރުކުނެއް ކަމުގައިވާ މުދަލު ޒަކާތަކީ اللهގެ މަހުލޫޤުންނާ އަޅާއާ ގުޅުވައިދޭ މުހިންމު ވަސީލަތެއް ކަމަށް މިއަދުގެ ހުކުރު ހުތުބާގައި ބަޔާންކޮށްފި އެވެ.

ހުތުބާގައި ބަޔާންކޮށްފައިވާ ގޮތުގައި، ޒަކާތަކީ ހަމައެކަނި އަދާކޮށްލާ ދީނީ ވާޖިބެއް ނޫނެވެ. އަދި އެއީ ނިކަމެތިންނަށް ވެދެވޭ އިހުސާންތެރިކަމެއްގެ ބަދަލުގައި، އެއީ އަދުލުވެރިކަމާއި އިންސާފުގެ މައްޗަށް ބިނާވެފައިވާ އިލާހީ ނިޒާމެކެވެ.

ހުތުބާގައި ފާހަގަކުރި ގޮތުގައި، ނަމާދަކީ އަޅާއާ اللهއާ ދެމެދު އޮންނަ ގުޅުން ބަދަހިކޮށްދޭ އަޅުކަމަކަށް ވާ ފަދައިން، ޒަކާތަކީ މުޖުތަމައުގެ ފަރުދުންގެ މެދުގައި އޮންނަ ގުޅުން ވަރުގަދަކޮށްދޭ ކަމެކެވެ. ޒަކާތުގެ ސަބަބުން މީހާގެ ނަފުސު ދަހިވެތިކަމުން ތާހިރުކޮށްދީ، މުދަލުގައި ބަރަކާތް ލައްވާކަން ހުތުބާގައި ފާހަގަކުރެއްވި އެވެ.

އިޖުތިމާއީ އަދާލަތު ގާއިމުކުރުމުގައި ޒަކާތުގެ ދައުރަށް އަލިއަޅުވާލަމުން، މުދަލަކީ ހަމައެކަނި މުއްސަނދިންގެ މެދުގައި ދައުރުވާ އެއްޗަކަށް ވިޔަނުދިނުމަށް ޒަކާތް މުހިންމު ދައުރެއް އަދާކުރާ ކަމަށް ހުތުބާގައި ވިދާޅުވި އެވެ. ކީރިތި ގުރްއާނުގައި ޒަކާތަކީ ނިކަމެތިންނަށް ދެވޭ "ކަނޑައެޅިގެންވާ ހައްގެއް" ކަމުގައި ބަޔާންކުރައްވާފައިވާކަން ހަނދާންކޮށްދެއްވި އެވެ.

މީގެ އިތުރުން، އިސްލާމީ ތާރީހުންނާއި މިޒަމާނުގެ މިސާލުތަކުން ޒަކާތުގެ މުހިންމުކަން ހުތުބާގައި ތަފްސީލުކޮށްދިނެވެ. އެގޮތުން އިންޑޮނޭޝިއާގައި 2024 ވަނަ އަހަރު އެކަނިވެސް 1.35 މިލިއަން މީހުން ޒަކާތުގެ ސަބަބުން ފަގީރުކަމުން ސަލާމަތްވެފައިވާކަން ފާހަގަކުރެއްވި އެވެ. އަދި މެލޭޝިއާގައި ޒަކާތުގެ އެހީގައި އަމިއްލަ ފައިމައްޗަށް ތެދުވެ، ޒަކާތް ދޭ މީހުންނަށް ބަދަލުވާ މީހުންގެ އަދަދު އިތުރުވަމުންދާކަން ހުތުބާގައި ފާހަގަކުރެއްވި އެވެ.

ހުތުބާ ނިންމާލަމުން، މުދަލުން ޒަކާތް ނުދައްކާ ހިފަހައްޓާ މީހުންނަށް އާހިރަތުގައި އޮތް ގަދަފަދަ އަޒާބުގެ ވާހަކަ ހަނދާންކޮށްދީ، ލަސްނުކޮށް ޒަކާތް ދެއްކުމަށާއި، ދަރިންނަށް އެކަން އުނގަންނައިދީ މުޖުތަމައުގައި ޒަކާތުގެ ނިޒާމު ދިރުވުމަށް ހުރިހާ މުސްލިމުންނަށް އިލްތިމާސްކުރެއްވި އެވެ.