ކުރީގެ ސަރުކާރުތަކުގައި ދައުލަތުގެ މާލިއްޔާއިން ބޮޑެތި ވައްކަންތައް ކުރިއިރުވެސް، އެކަންކަމާ ގުޅިގެން ވަޒީރަކު ވަކިކުރަން ކެރިވަޑައިގެންނެވި ރައީސަކު ފެނިފައިނުވާ ކަމަށް ޕީއެންސީގެ ނައިބު ރައީސް އަދި ފިޝަރީޒް، އެގްރިކަލްޗާ އެންޑް އޯޝަން ރިސޯސަސްގެ މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.
ހއ. މުރައިދޫން ކައުންސިލް އިންތިހާބުގައި ޕީއެންސީއަށް ލިބުނު ކާމިޔާބީ ފާހަގަކުރަން ބޭއްވި ޖަލްސާގައި ވާހަކަދައްކަވަމުން ޝިޔާމް ވިދާޅުވީ، މީގެ ކުރީގެ ސަރުކާރުތަކުން ފެނިގެންދިޔައީ "ބަލަދު އަރާފައި" ތިބި މަންޒަރު ކަމަށެވެ. ދައުލަތުގެ ވަތްގަނޑު ހުސްކުރިއިރުވެސް، ރައީސުލްޖުމްހޫރިއްޔާއަށް ހުރިހާ ރައްޔިތުންގެ ބަލަދު އަރައިގެން ވެރިކަން ހިންގިތަން ފެނުނު ކަމަށާއި، ނަމަވެސް މިއަދުގެ ސަރުކާރުން އެފަދަ ކަންކަމުގައި ފަސްޖެހިވަޑައިނުގަންނަވާނެ ކަމަށް އޭނާ ވިދާޅުވި އެވެ.
ޝިޔާމް ފާހަގަކުރެއްވި ގޮތުގައި ޕީއެންސީއަކީ ވަކި ރަށެއް ތަފާތުކުރާނެ ޕާޓީއެއް ނޫނެވެ. ކުޑަ ރަށެއް، ބޮޑު ރަށެއް ނުވަތަ ސިޓީއެއް ނުބަލައި، ހުރިހާ ރަށެއްވެސް ރައީސް ޑރ. މުހައްމަދު މުއިއްޒަށް މުހިންމުވާނެ ކަމަށާއި، މުރައިދޫ ފަދަ އާބާދީ ކުޑަ ރަށަކަށް މި ސަރުކާރުން ދޭ ސަމާލުކަމަކީ އޭގެ އެންމެ ބޮޑު ހެކި ކަމަށް ވިދާޅުވި އެވެ.
Advertisement
މިފަހުން ބޭއްވުނު ކައުންސިލް އިންތިހާބަށް އަލިއަޅުއްވާލައްވަމުން ޝިޔާމް ވިދާޅުވީ، ޕީއެންސީއަށް އެ އިންތިހާބުގައި ލިބުނީ "ބީ ރިޕޯޓެއް" ކަމަށެވެ. ވެރިކަމުގައި ތިބެގެން ބީ ރިޕޯޓެއް ހޯދުމަކީ ބައެއް ބޭފުޅުންނަށް ކާމިޔާބީއެއް ނަމަވެސް، ރައީސް މުއިއްޒު ބޭނުންފުޅުވަނީ "އޭ ރިޕޯޓެއް" ކަމަށް އޭނާ ވިދާޅުވި އެވެ. އަދި އިންތިހާބު ނިމުމާއެކު ރައްޔިތުން ނިންމެވި ގޮތް ގަބޫލުފުޅު ކުރައްވައި، ރައްޔިތުން އެދުނު ގޮތަށް ކަންކަން އިސްލާހު ކުރެއްވުމުގެ މަސައްކަތް ރައީސް ވަނީ ފަށްޓަވާފައި ކަމަށްވެސް ޝިޔާމް ވިދާޅުވި އެވެ.
ޝިޔާމް އިތުރަށް ވިދާޅުވީ، މިއަދު ފެންނަނީ ވެރިކަމުގެ ނިޒާމަށް އޮތް އިތުބާރު ކަމަށެވެ. ރައްޔިތުންގެ މަޖިލީހުގެ 75 މެންބަރުން ޕީއެންސީގައި ތިއްބެވުމުން، ފަނޑިޔާރުން ވަކިކުރުމުގެ ބާރު އޮތް ނަމަވެސް، އެއްވެސް ނުފޫޒެއް ފޯރުވަން ސަރުކާރުން ބޭނުންނުވާ ކަމަށް ވިދާޅުވި އެވެ. އޭގެ ހެއްކަކީ މަޖިލީހުގައި ޕީއެންސީއަށް ނިސްބަތްވާ މެންބަރަކަށް ކޯޓުން ކުރި ހުކުމެއް ތަންފީޒުވެ، ގޮނޑި ގެއްލިގެން ދިޔުން ކަމަށާއި، މީގެއިން އެނގެނީ ރައީސް މުއިއްޒަކީ ކޯޓުތަކަށް ނުފޫޒު ފޯރުވާނެ ލީޑަރެއް ނޫންކަން ކަމަށް އޭނާ ވިދާޅުވި އެވެ.
އިގްތިސާދީ ހާލަތާ ގުޅޭގޮތުން ޝިޔާމް ވިދާޅުވީ، ރައީސް މުއިއްޒު ސަރުކާރާ ހަވާލުވެވަޑައިގަތްއިރު ދައުލަތުގެ ބަޖެޓު އޮތީ ހުސްކޮށްލާފައި ކަމަށެވެ. އިންތިހާބުގެ ފޯރިގަދަ ވަގުތުވެސް ރައީސްގެ އެންމެ ބޮޑު ސަމާލުކަމެއް ހުރީ ކުރީ ސަރުކާރުން ނަގާފައިވާ ބޮޑެތި ދަރަނިތައް އަދާކުރެއްވުމަށް ކަމަށް ޝިޔާމް ވިދާޅުވި އެވެ. އެމަނިކުފާނަށް ކެމްޕެއިނަށްވުރެ މުހިންމުވީ ގައުމު ސަލާމަތްކުރެއްވުން ކަމަށާއި، މިއަދު މި ގައުމު ބަގުރޫޓުވުމުން ސަލާމަތްކޮށްދެއްވައިފި ކަމަށް ވިދާޅުވެ ޝިޔާމް ވަނީ ރައީސަށް ތައުރީފު ކުރައްވާފަ އެވެ.
