މިދިޔަ ސަރުކާރުތަކުން ނަގާފައިވާ އެތައް މިލިއަން ޑޮލަރެއްގެ ލޯނުތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަދާކުރުމުން، ކުރީގެ ރައީސް ޢަބްދުﷲ ޔާމީނަށް ގޯސްވީ އެ ފައިސާ ދެއްކި ގޮތް ކަމަށް ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހް ވިދާޅުވެއްޖެ އެވެ.
ލޯކަލް ކައުންސިލް އިންތިހާބުގައި ހއ. މުރައިދޫން ޕީއެންސީއަށް ލިބުނު ކާމިޔާބީ ފާހަގަކުރުމަށް ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަދައްކަވަމުން ފަލާހު ވިދާޅުވީ، ރައީސް ޔާމީނަކީ ވަރަށް މޮޅު "އިކޮނޮމިސްޓް" އަކަށް ހެދިގެން އުޅުއްވާ ބޭފުޅެއް ކަމަށެވެ. ނަމަވެސް މި ސަރުކާރުން 500 މިލިއަން ޑޮލަރުގެ ލޯނު ދެއްކުމުން އެމަނިކުފާނުގެ ރާގު މިހާރު ބަދަލުވެފައިވާ ކަމަށް ފަލާހު ފާހަގަކުރެއްވިއެވެ.
ފަލާހު ވިދާޅުވި ގޮތުގައި، ލޯނު ދެއްކުމުން ރައީސް ޔާމީން މިހާރު ބުނަމުންދަނީ އެ ފައިސާ ދެއްކީ ޕެންޝަން އޮފީހުނާއި، ބީއެމްއެލް އަދި އެކި ގޮތްގޮތުން ލާރި ހަމަކޮށްގެން ކަމަށެވެ. މިކަމަށް ރައްދު ދެއްވަމުން ފަލާހު ވިދާޅުވީ، ބޭރު ގައުމަކުން ލޯނެއް ނެގުމަށްފަހު އެ ލޯނު އަނބުރާ ދެއްކުމަކީ ރާއްޖޭގެ ހަކަތަ ބޭނުންކޮށްގެން ދިވެހިރާއްޖެއިން އަދާކުރަންޖެހޭ ޒިންމާއެއް ކަމަށެވެ.
ރައީސް ޔާމީން ދައްކަވަނީ އެއްވެސް އޮއްޓަރެއް ނެތް، ތާކުންތާކު ނުޖެހޭ ވާހަކަތަކެއް ކަމަށާއި، އެއީ ދިވެހި ރައްޔިތުން ގުބޯ ހައްދަވަން ދައްކަވާ ވާހަކަތަކެއް ކަމަށް ފަލާހު ސިފަކުރެއްވި އެވެ. އޭނާ އިތުރަށް ވިދާޅުވީ، އިދިކޮޅު ލީޑަރުން ތިއްބެވީ މި ސަރުކާރަށް އެ ދަރަނި އަދާނުކުރެވޭނެ ކަމަށް އުންމީދުކޮށް، އެކަމުގެ އުފާވެރިކަމުގައި ކަމަށެވެ.
ނަމަވެސް، އިދިކޮޅު ފަރާތްތަކުން ހީކުރި ގޮތާ ހިލާފަށް، ޖުމްލަ 524 މިލިއަން ޑޮލަރުގެ ދަރަނި މި ސަރުކާރުން މިހާރު ވަނީ އަދާކޮށްފައިވާ ކަމަށް ފަލާހު ވިދާޅުވި އެވެ. މިއީ ރައީސް މުޢިއްޒުގެ ހަރުދަނާ އިގްތިސާދީ ސިޔާސަތުގެ ދަށުން ހޯދިފައިވާ ބޮޑު ކާމިޔާބީއެއްކަން ފާހަގަކުރައްވައި، ފަލާހު ވަނީ އިދިކޮޅު ފަރާތްތަކުގެ ފާޑުކިޔުންތަކަށް ވަރަށް ބޮޑަށް ރައްދު ދެއްވާފަ އެވެ.
