ސަރުކާރުގެ އިދާރީ އޮނިގަނޑަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންނެވި ބަދަލުތަކާއެކު، ހޯމް މިނިސްޓްރީ ނުވަތަ މިހާރުގެ މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ދަށަށް 9 އިދާރާއެއް ބަދަލުކޮށްފިއެވެ.
ރައީސުލްޖުމްހޫރިއްޔާ މިނިސްޓްރީތަކަށް ގެންނެވި ބަދަލާއެކު، ކުރިން ދާޚިލީ ސަލާމަތާއި ފަންނިއްޔާތާބެހޭ ވުޒާރާގެ މެންޑޭޓަށް ބަދަލުތަކެއް އައިސް، އެ ވުޒާރާގެ ނަން މިހާރު ވަނީ "މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ" (ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވުޒާރާ) އަށް ބަދަލުކުރައްވާފައެވެ. މި ބަދަލާއެކު، ކުރިން މަތީ ތައުލީމާ ގުޅުންހުރި ވުޒާރާގެ ދަށުން ހިންގަމުންދިޔަ ބައެއް މަސައްކަތްތައް ވެސް މިހާރު ވަނީ ދާހިލީ ވުޒާރާގެ ދަށަށް ބަދަލުކުރެވިފައެވެ.
ދާޚިލީ ވުޒާރާގެ ދަށަށް ބަދަލުކުރެވުނު އިދާރާތައް
މި ބަދަލުތަކާއެކު ދާޚިލީ ވުޒާރާގެ ދަށުން ހިންގާ ގޮތަށް ހަމަޖެއްސެވި 9 އިދާރާއަކީ:
Advertisement
- މޯލްޑިވްސް އިމިގްރޭޝަން
- ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު)
- ނޭޝަނަލް ޑްރަގް އެޖެންސީ (އެންޑީއޭ)
- ޑިޕާޓްމަންޓް އޮފް ޖުވެނައިލް ޖަސްޓިސް
- ނޭޝަނަލް ސައިބާ ސެކިއުރިޓީ އެޖެންސީ
- ލޭބާ ރިލޭޝަންސް އޮތޯރިޓީ
- ކޮމިއުނިކޭޝަންސް އޮތޯރިޓީ އޮފް މޯލްޑިވްސް
- މޯލްޑިވްސް ޑިޖިޓަލް ސާވިސް
- ނޭޝަނަލް ކެރިއާސް ސާވިސް
މި އިދާރާތަކުގެ ތެރެއިން ނޭޝަނަލް ކެރިއާސް ސާވިސް އަކީ މީގެ ކުރިން މިނިސްޓްރީ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓްގެ ދަށުން ހިންގަމުންދިޔަ އިދާރާއެކެވެ. ނަމަވެސް، އާ އޮނިގަނޑާއެކު އެ އިދާރާގެ މަސައްކަތްތައް މިހާރު ވަނީ ދާޚިލީ ވުޒާރާގެ މެންޑޭޓުގެ ތެރެއަށް ހިމަނާފައެވެ.
ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރުގެ މަގާމަށް ރައީސުލްޖުމްހޫރިއްޔާ އައްޔަންކުރައްވާފައިވަނީ، ކުރިންވެސް އެ މަގާމުގައި ހުންނެވި އަލީ އިހްސާން އެވެ. މި ބަދަލުތަކާއެކު، ރާއްޖޭގެ ދާޚިލީ ސަލާމަތާއި، މަސައްކަތްތެރިންގެ ކަންކަމާއި، ޓެކްނޮލޮޖީގެ ދާއިރާގެ މުހިންމު ގިނަ މަސައްކަތްތަކެއް އެއް ފުރާޅެއްގެ ދަށުން ހިންގުމަށް މަގުފަހިވެގެންދާނެއެވެ.
