އިސްރާއީލުން ޣައްޒާއަށް އިއްޔެ ދިން ހަމަލާތަކުގައި ދެ ކުޑަކުދިން ހިމެނޭ ގޮތަށް 11 މީހުން ޝަހީދު ކޮށްލައިފިއެވެ. މި މީހުން ޝަހީދު ކޮށްލާފައި ވަނީ ޣައްޒާގެ އެކި ސަރަޙައްދުގައި ވަކިވަކިން ދިން ހަމަލާތަކުގައެވެ.

ޣައްޒާގެ ސިވިލް ޑިފެންސް އޮތޯރިޓީން ބުނީ އަންގާރަ ދުވަހު އިސްރާއީލުން ދިން ހަމަލާތަކުގައި ޝަހީދުވި މީހުންގެ ތެރޭގައި ތިން އަހަރުގެ ކުއްޖަކާއި 14 އަހަރުގެ ކުއްޖަކު ހިމެނޭ ކަމަށެވެ.

ޣައްޒާގެ ސިވިލް ޑިފެންސްގެ ތަރުޖަމާނު މަހުމޫދު ބަސާލް ވިދާޅުވީ ޣައްޒާ ސިޓީގައި "ފުލުހުންގެ ވެހިކަލަކަށް އަމާޒުކޮށްގެން ހިނގި ހަމަލާއެއްގައި" ތިން އަހަރުގެ ކުއްޖާ ހިމެނޭ ގޮތަށް ހަތަރު މީހަކު ޝަހީދު ވެފައިވާ ކަމަށެވެ.

ޣައްޒާގެ މިނިސްޓްރީ އޮފް އިންޓީރިއާ އިން ނެރުނު ބަޔާނެއްގައި ބުނެފައި ވަނީ އިސްރާއީލުގެ ހަނގުރާމަ މަތިންދާބޯޓުތަކުން ސިޓީ ސެންޓަރުގައި ހުރި ފުލުހުންގެ ވެހިކަލަށް "އަމާޒުކޮށް" ޙަމަލާ ދީފައިވާ ކަމަށެވ. އެ ޙަމަލާގައި ފުލުހަކު ޝަހީދުވި ކަމަށެވެ. މީގެއިތުރުން އުތުރުގެ ބައިތު ލާހިޔާ ސަރަހައްދުގައި އިސްރާއީލުން ދިން ޙަމަލާތަކެއްގައި އިތުރު މީހަކު ޝަހީދު ވެފައިވާ ކަމަށެވެ.

ރޭ ޣައްޒާގެ ސިވިލް ޑިފެންސް އިން ރިޕޯޓްކޮށްފައިވާ ގޮތުގައި އިސްރާއީލުން ދިން އިތުރު ހަމަލާއެއްގައި ޣައްޒާ ސިޓީގެ ރެފިއުޖީ ކޭމްޕްގެ ކައިރީގައި އެތައް ބަޔަކު ޝަހީދުވިއެވެ.

އަލް ޝިފާ ހޮސްޕިޓަލުގެ މެޑިކްސް އިން ފަހުން ކަށަވަރުކޮށްދިން ގޮތުގައި އެ ރެފިއުޖީ ކޭމްޕް ކައިރީގައި ތިބި 5 މީހަކު ޝަހީދުވިއެވެ. އެއީ މިސައިލާއި ޑްރޯން ހަމަލަތަކެއްގައެވެ

މިދިޔަ އޮކްޓޯބަރު މަހު ފެށިގެން އިސްރާއީލާއި ހަމާސްއާ ދެމެދު "ހަމަލާތައް ހުއްޓާލާފައި" ވީ ނަމަވެސް، އިސްރާއީލުގެ ސިފައިން ކޮންމެ ދުވަހަކު އެ ސަރަހައްދަށް ހަމަލާތައް ދެމުން އަންނައިރު، ހަނގުރާމަ ހުއްޓާލުމަށް އެއްބަސްވި ފަހުން ގާތްގަނޑަކަށް 760 މީހުން ވަނީ ޝަހީދުވެފައެވެ.