ފޮރިން މިނިސްޓަރު ކަމުގެ މަގާމަށް އިރުތިޝާމް އާދަމް މިއަދު އައްޔަނުކުރައްވައިފި އެވެ. ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ރަސްމިއްޔާތެއްގައި އިރުތިޝާމް އާދަމަށް މި މަގާމުގެ ފަތްކޮޅު އަރުއްވާފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
އިރުތިޝާމް އާދަމް މި މަގާމަށް އައްޔަނުކުރައްވާފައިވަނީ، ކުރިން އެ މަގާމުގައި ހުންނެވި ޑރ. އަބްދުﷲ ހަލީލު މިއަދު އެ މަގާމުން އިސްތިއުފާ ދެއްވުމާ ގުޅިގެންނެވެ.
މިނިސްޓަރު ކަމަށް އައްޔަނުކުރެއްވުމުގެ ކުރިން އިރުތިޝާމް ހުންނެވީ ދިވެހިރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރުގެ މަގާމުގަ އެވެ. މީގެ އިތުރުން، އެކަމަނާއަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ޔޫތު މިނިސްޓަރުގެ މަގާމުވެސް ފުރުއްވާފައިވާ ބޭފުޅެކެވެ.
ޑރ. އަބްދުﷲ ހަލީލު ހިމެނޭހެން ސަރުކާރުގެ 10 މިނިސްޓަރަކު މިއަދު ވަނީ މަގާމުން އިސްތިއުފާ ދެއްވާފަ އެވެ. މި ބޭފުޅުން ކުއްލި ގޮތަކަށް އިސްތިއުފާ ދެއްވި ސީދާ ސަބަބެއް އަދި ސާފުވެފައި ނުވި ނަމަވެސް، ރައީސް އޮފީހުން ހާމަކުރައްވާފައިވާ ގޮތުގައި އެ ބޭފުޅުން އިސްތިއުފާ ދެއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގުމަށް ރައީސުލްޖުމްހޫރިއްޔާ ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެ ގޮތުންނެވެ.
މި ބަދަލުތަކަކީ ސަރުކާރުގެ ހިންގުން ހަރުދަނާކޮށް، ރައްޔިތުންނަށް ދޭންޖެހޭ ހިދުމަތްތައް އަވަސްމަގަކުން ފޯރުކޮށްދިނުމަށް ރައީސް މުއިއްޒު ފައްޓަވާފައިވާ މަސައްކަތްޕުޅުގެ ތެރެއިން އައި ބަދަލުތަކެއް ކަމަށް ބެލެވެ އެވެ.
