އއ. އުކުޅަހުގެ ބޮޑެތި މަގުތަކުގައި ތާރު އެޅުމުގެ މަސައްކަތް ބާރުދުވެލީގައި ކުރިއަށްދާކަމަށާއި، މަޝްރޫޢުގެ މުޅި އަމަލީ މަސައްކަތުގެ 74 އިންސައްތަ މިހާރު ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފި އެވެ.

މި މަޝްރޫއަކީ ދައުލަތުގެ ބަޖެޓުން 56 މިލިއަނަށްވުރެ ގިނަ ރުފިޔާ ހަރަދުކުރައްވައިގެން ކުރިއަށްގެންދަވާ މުހިންމު މަޝްރޫއެކެވެ. މި މަސައްކަތް އެމްޓީސީސީއާ ސަރުކާރުން ހަވާލުކޮށް، އެއްބަސްވުމުގައި ސޮއިކޮށްފައިވަނީ 19 އޮކްޓޯބަރ 2022 ގައެވެ. ނަމަވެސް، މިދިޔަ ސަރުކާރުގެ ދައުރުގައި މި މަޝްރޫއުގެ އަމަލީ މަސައްކަތްތަކަށް މާބޮޑު ކުރިއެރުމެއް ލިބިފައި ނުވާކަން ފާހަގަކުރެވެ އެވެ.

އުކުޅަހުގެ މަގު ހެދުމުގެ މަޝްރޫއުގެ ދަށުން ޖުމްލަ 2,678 މީޓަރުގެ 10 މަގެއް ޒަމާނީ ފެންވަރަށް ތަރައްގީކުރުމަށް ވަނީ ހަމަޖެހިފަ އެވެ. މި މަޝްރޫޢުގެ ތެރޭގައި ހިމެނޭ މައިގަނޑު މަސައްކަތްތަކުގެ ތެރޭގައި:

- ފެން ހިންދާ ނިޒާމު ޤާއިމުކުރުމާއި ސެޓްލްމެންޓް ޓޭންކް ހަރުކުރުން.

- ކޭބަލް ޖަންކްޝަން ފޮށި ވަޅުލުމާއި، 4,193 އަކަމީޓަރުގެ ސަރަޙައްދެއްގައި ޕޭމަންޓް ގައު އެޅުން.

- 14,452 އަކަމީޓަރުގެ ދުއްވާ ސަރަހައްދެއް ތާރު އަޅައިގެން ތަރައްގީކުރުން.

- މަގުބައްތި ހަރުކުރުމާއި، މަގުމަތީގެ ނިޝާންތަކާއި ކަފިހިހުރަސްތައް ގާއިމުކުރުން.

- ސްޕީޑް ބްރޭކަރުތަކާއި، މަގުމަތީގެ ރައްކާތެރިކަމަށް ބޭނުންވާ ސައިން ބޯޑުތައް ހަރުކުރުން.

އެމްޓީސީސީން ބުނެފައިވަނީ މިހާރު ކުރިއަށްދަނީ މަގުތަކުގައި ތާރު އެޅުމުގެ އެންމެ ފަހުގެ މަސައްކަތްތައް ކަމަށެވެ. މި މަޝްރޫއު ނިމުމުން، އުކުޅަހުގެ ރައްޔިތުންނަށާއި އެ ރަށަށް ޒިޔާރަތްކުރާ ފަތުރުވެރިންނަށް ދަތުރުފަތުރު ކުރުމުގައި ބޮޑެތި ފަސޭހަތަކެއް ލިބިގެންދާނެ އެވެ.

މިސަރުކާރުން އަމާޒު ހިފާފައިވަނީ ރަށްރަށުގެ އަސާސީ ޚިދުމަތްތަކާ ގުޅުންހުރި މިފަދަ މަޝްރޫޢުތައް އަވަސް މިނެއްގައި ނިންމައި ރައްޔިތުންނަށް އޭގެ މަންފާ ހޯދައިދިނުމަށެވެ.