އީރާނުގެ މަސްރަހު މިދުވަސްވަރު ހޫނުވެފައިވާއިރު، އެ ގައުމުގެ ކަމާބެހޭ އިދާރާތަކުން ވަނީ ސަރުކާރަށް ތާއީދުކުރާ ފަރާތްތައް މަގުތަކަށް ނުކުމެ، ސަރުކާރާއެކު ސާބިތުވެ ތިބުމަށް ބާރުއަޅައި ގޮވާލާފައެވެ.
އަލްޖަޒީރާއިން ރިޕޯޓްކޮށްފައިވާ ގޮތުގައި، މި މަހުގެ 12 ވަނަ ދުވަހު އީރާނުގެ އެކި ސަރަހައްދުތަކުގައި ސަރުކާރާ ދެކޮޅަށް ކުރަމުންދާ މުޒާހަރާތަކާ ގުޅިގެން، އީރާނުގެ އިސްވެރިން ވަނީ ދޫނުދޭނެ ކަމުގެ މެސެޖެއް ދީފައެވެ. ސަރުކާރުގެ އިސް މަސްއޫލުވެރިން ވިދާޅުވަމުން ގެންދަވަނީ ގައުމުގެ ހަމަޖެހުމާއި އިސްލާމީ އުސޫލުތައް ހިމާޔަތްކުރުމަށްޓަކައި ސަޕޯޓަރުން މަގުތަކުގައި ދެމިތިބުމަކީ މުހިންމު ކަމެއް ކަމަށެވެ.
އީރާނު ސަރުކާރުން ތުހުމަތުކުރާ ގޮތުގައި މި ހަމަނުޖެހުންތަކުގެ ފަހަތުގައި ވަނީ ބޭރުގެ ބާރުތަކެވެ. އެހެންކަމުން، ގައުމީ ސަލާމަތާއި ރައްކާތެރިކަން ކަށަވަރުކުރުމަށްޓަކައި ސަރުކާރަށް ވަފާތެރި ރައްޔިތުންގެ އެއްބާރުލުން ބޭނުންވާ ކަމަށް ކަމާބެހޭ އިދާރާތަކުން ވަނީ ހާމަކޮށްފައެވެ.
