އެމްޑީޕީގެ ރިޔާސީ ކެންޑިޑޭޓަކު ހޮވުމަށް ބާއްވާ ޕްރައިމަރީގައި ވާދަކުރެއްވުމުގެ ޝައުގުވެރިކަން ފާޅުކުރައްވައި، އެ ޕާޓީގެ މިހާރުގެ ރައީސް އަބްދުﷲ ޝާހިދު ކެމްޕެއިން ފައްޓަވައިފި އެވެ.

ޝާހިދުގެ ކެމްޕެއިން ހަރަކާތްތައް ފެށިގެން އައީ ފޭސްބުކްގައި "ޝާހިދު ފޯ ޕްރެޒިޑެންޓް" މި ނަމުގައި ހުޅުވާފައިވާ ޕޭޖެއް މެދުވެރިކޮށެވެ. އެ ޕޭޖުން އެންމެ ފުރަތަމަ އާންމުކުރި ޕޯސްޓުގައި ބުނެފައިވަނީ، މުޅި ދުނިޔެއަށް ކުރިމަތިވި ކޮވިޑް-19 ގެ ދަތި އުނދަގޫ ދުވަސްވަރު ރާއްޖެ ބަނޑަށް ނުޖެހި ސަލާމަތްވުމުގެ އެންމެ ބޮޑު ރޯލެއް އަދާކުރެއްވީ ޝާހިދު ކަމަށެވެ. މުޅި ދުނިޔޭގެ ބޯޑަރުތައް ބަންދުވެފައި އޮތްއިރު، ރާއްޖެއަށް ބޭނުންވާ ކާޑުގެ ބާވަތްތަކާއި ބޭސް ހޯދައި، ރާއްޖެ އިގުތިސާދީ ގޮތުން ހިފަހައްޓަވައިދެއްވީ ޝާހިދު ކުރެއްވި މިންނެތް މަސައްކަތުން ކަމަށް އެ ޕޭޖުގައި ބުނެފައިވެ އެވެ.

އެ ޕޯސްޓުގައި އިތުރަށް ބުނެފައިވަނީ ރާއްޖޭގެ ތަރައްގީ އާ އުސްމިންތަކަކަށް ގެންދިއުމަށް މިއަދު ބޭނުންވަނީ ދުނިޔޭގެ ގައުމުތަކާއި ގާތް ގުޅުމެއް އޮތް، ޝާހިދު ފަދަ ހަރުދަނާ ލީޑަރެއް ކަމަށެވެ.

އަބްދުﷲ ޝާހިދަކީ ނިމިދިޔަ އެމްޑީޕީ ސަރުކާރުގެ ފޮރިން މިނިސްޓަރެވެ. އަދި އޭނާ ވަނީ އދ. ގެ އާންމު މަޖިލީހުގެ ރައީސްކަން ވެސް އެއް އަހަރު ދުވަހު ފުރުއްވާފައެވެ. ޝާހިދުގެ ސިޔާސީ ހަޔާތް ފެއްޓެވީ ކުރީގެ ރައީސް މައުމޫނު އަބްދުލްގައްޔޫމްގެ ވެރިކަމުގައި ޑީއާރުޕީގެ ތެރެއިންނެވެ. ރައީސް މައުމޫނުގެ ސަރުކާރުގައި ވެސް ފޮރިން މިނިސްޓަރުކަން ކުރެއްވި ޝާހިދު ފަހުން ގުޅިވަޑައިގަތީ އެމްޑީޕީއާއެވެ. އޭނާ ވަނީ 2009 އިން 2014 އަށް ރައްޔިތުންގެ މަޖިލީހުގެ މެންބަރުކަމާއި 16 ވަނަ މަޖިލީހުގެ ރައީސްކަން ވެސް ކުރައްވާފަ އެވެ.

އެމްޑީޕީގެ ޕްރައިމަރީގައި ޝާހިދު ވާދަކުރައްވާނެ ކަމުގެ އިޝާރާތެއް ދެއްވާފައިވާއިރު، އެ ޕާޓީގެ ކުރީގެ ޗެއާޕާސަން ފައްޔާޒު އިސްމާއީލާއި ކުރީގެ ރައީސް މުހައްމަދު ނަޝީދު ވެސް ވަނީ ޕްރައިމަރީގައި ވާދަކުރެއްވުމުގެ ޝައުގުވެރިކަން ފާޅުކުރައްވާފައެވެ. މީގެ އިތުރުން ކުރީގެ ރައީސް އިބްރާހީމް މުހައްމަދު ސާލިހު ވެސް ޕްރައިމަރީގައި ވާދަކުރައްވާނެ ކަމަށް ބެލެވެ އެވެ.

ޝާހިދުގެ ކެމްޕެއިން ފެށިފައިވާއިރު، ކޮވިޑްގެ ދުވަސްވަރު ލިބުނު އެހީތަކާއި ހިންގި ބައެއް މުއާމަލާތްތަކާ ގުޅޭގޮތުން އާންމުންގެ މެދުގައި ސުވާލުތަކެއް ހުރިކަން ފާހަގަކުރެވެއެވެ. އެގޮތުން ކޮވިޑްގައި ލިބުނު އެހީތަކުގެ ތަފްސީލު ސާފުނުވުމާއި، ވެންޓިލޭޓަރުތަކަށް ވީގޮތެއް ނޭނގުމާއި، އެ ދުވަސްވަރު ނެގި ބޮޑެތި ލޯނުތަކުން ގައުމަށް ވީ ފައިދާއެއް ނެތް ކަމަށް ބުނެ ގިނަ ބަޔަކު ދަނީ ފާޑުކިޔަމުންނެވެ.