ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަންނަ މަހުގެ ތެރޭގައި އަވަށްޓެރި ސްރީލަންކާއަށް ރަސްމީ ދަތުރުފުޅެއް ކުރެއްވުމަށް ހަމަޖެހިފައިވާ ކަމަށް ލަންކާގެ މީޑިއާތަކުން ރިޕޯޓްކޮށްފި އެވެ.

ލަންކާގެ ނޫސްތަކުން ބުނާ ގޮތުގައި، މި ދަތުރުފުޅާ ގުޅޭ ތައްޔާރީތަކާއި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާ ގުޅޭގޮތުން މިހާރު ދަނީ މަޝްވަރާ ކުރެވެމުންނެވެ. މިގޮތުން، ސްރީލަންކާގެ ފިޝަރީޒް މިނިސްޓަރު ރާމަލިންގަމް ޗަންދުރަސޭކަރް އާއި ރާއްޖެއިން ލަންކާއަށް ކަނޑައަޅުއްވާފައި ހުންނަވާ ހައިކޮމިޝަނަރު ވަނީ ދާދި ފަހުން ލަންކާގެ ޕާލަމަންޓް ކޮމްޕްލެކްސްގައި ބައްދަލުކުރައްވައި، ރައީސްގެ މި ދަތުރުފުޅާ ގުޅޭގޮތުން ފުޅާދާއިރާއެއްގައި މަޝްވަރާ ކުރައްވާފަ އެވެ.

މި ބައްދަލުވުމުގައި ހާއްސަކޮށް މަސްވެރިކަމުގެ ދާއިރާއިން ދެ ގައުމުގެ ގުޅުން ބަދަހިކުރުމާއި، އިންވެސްޓްމަންޓްގެ އާ ފުރުސަތުތަކާ ގުޅޭގޮތުން ވާހަކަދެކެވުނެވެ. ލަންކާގެ ފިޝަރީޒް މިނިސްޓްރީން ހާމަކުރި ގޮތުގައި، ރާއްޖޭގެ ތާޒާ މަހުގެ ވަސީލަތްތަކާއި ލަންކާގެ މަސްދަޅު ބަންދުކުރާ ސިނާއަތް ގުޅުވާލައިގެން އާ އުފެއްދުންތަކެއް ބާޒާރަށް ނެރުމުގެ ފުރުސަތު އެބައޮތެވެ. އަދި ދުބާއީ މެދުވެރިކޮށް ރާއްޖެއަށް އެތެރެކުރާ ލަންކާގެ އުފެއްދުންތައް، ސީދާ ލަންކާއިން ރާއްޖެއަށް ފޮނުވޭނެ އިންތިޒާމުތަކެއް ހަމަޖެއްސުމާ ގުޅޭގޮތުންވެސް މި ބައްދަލުވުމުގައި މަޝްވަރާ ކުރެވުނެވެ.

ރައީސުލްޖުމްހޫރިއްޔާ ލަންކާއަށް ކުރައްވާ މި ދަތުރުފުޅާ ގުޅޭގޮތުން ރާއްޖޭގެ ރައީސް އޮފީހުން އަދި ރަސްމީކޮށް އެއްޗެއް ބުނެފައެއް ނުވެ އެވެ.

ދާދި ފަހުން ސްރީލަންކާއަށް ކުރިމަތިވި ތޫފާނުގެ ސަބަބުން ލިބުނު ގެއްލުންތަކުން އަރައިގަތުމަށް، ރާއްޖޭގެ ސަރުކާރާއި ރައްޔިތުންގެ ފަރާތުން ފައިސާގެ އެހީގެ އިތުރުން ގިނަ އަދަދެއްގެ މަސްދަޅު ހަދިޔާކޮށްފައިވެ އެވެ. މި އެހީއަކީ ދެ ގައުމުގެ ދެމެދުގައި އޮތް ގާތް ރަހުމަތްތެރިކަމުގެ ރަމްޒެއްގެ ގޮތުގައި ލަންކާ ސަރުކާރުން ވަނީ ފާހަގަކޮށްފަ އެވެ.