ހިޔާލު ތަފާތުވުން އުފެދިފައިވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ހިންގުމަށްޓަކައި ލަފާދޭ ހާއްސަ އިންޓަރިމް ކޮމެޓީއެއް އެކުލަވާލައި، އެ ކޮމެޓީގައި ކުރީގެ ދެ ރައީސުން ކަމަށްވާ ރައީސް މުހައްމަދު ނަޝީދާއި ރައީސް އިބްރާހީމް މުހައްމަދު ސާލިހު ހިމެނުމަށް އެ ޕާޓީގެ ގައުމީ މަޖިލީހުން މިރޭ ފާސްކޮށްފި އެވެ.

މިރޭ ބޭއްވި އެމްޑީޕީގެ ގައުމީ މަޖިލީހުގެ ސިއްރު ބައްދަލުވުމެއްގައި މިގޮތަށް ނިންމާފައިވަނީ، ޕާޓީގެ ދާއިމީ ޗެއާޕާސަންއަކު އިންތިހާބު ކުރެވެންދެން ޕާޓީ ހިންގުމުގައި މިހާރުގެ ވަގުތީ ޗެއާޕާސަން އަބްދުލްގަފޫރު މޫސާ (ގަޕޯ) އަށް ލަފާދިނުމަށެވެ. މިއީ ޕާޓީގެ ހިންގުން ހަރުދަނާކޮށް، ކުރިއަށް އޮތް ދުވަސްތަކަށް ތައްޔާރުވުމުގެ ގޮތުން ނިންމި ނިންމުމެއް ކަމަށް މައުލޫމާތު ލިބެ އެވެ.

އަލަށް އެކުލަވާލި މި އިންޓަރިމް ކޮމެޓީގައި ހިމެނިވަޑައިގަންނަވާ ބޭފުޅުންނަކީ:

ކުރީގެ ރައީސް މުހައްމަދު ނަޝީދު

ކުރީގެ ރައީސް އިބްރާހީމް މުހައްމަދު ސާލިހު

ވަގުތީ ޗެއަރޕާސަން އަބްދުލްގަފޫރު މޫސާ

ޕާޓީގެ ރައީސް އަބްދުﷲ ޝާހިދު

ޕީޖީ ލީޑަރު އިބްރާހީމް ނާޒިލް

ކުރީގެ ޗެއާޕާސަން ފައްޔާޒް އިސްމާއީލް

މި ހުރިހާ ނިންމުންތަކެއް ނިންމާފައިވަނީ ވަގުތީ ޗެއާޕާސަން އަބްދުލްޣަފޫރު މޫސާ ހުށަހެޅުއްވި ގަރާރަކުންނެވެ. މި ގަރާރަށް ތާއީދު ކުރެއްވީ ގައުމީ މަޖިލީހުގެ މެންބަރު އިބްރާހީމް ޝަރީފް (ފިއްޓެ) އެވެ.

ވަރަށް ކުރު ވަގުތުކޮޅަކަށް ކުރިއަށްދިޔަ މިރޭގެ ބައްދަލުވުމުގައި، ޕާޓީގެ ކުރިމަގާ ގުޅޭ މުހިންމު ނިންމުންތަކެއް ވަނީ ނިންމާފަ އެވެ.

އެމްޑީޕީގެ ލީޑަރުންގެ މެދުގައި ހިޔާލުތަފާތުވުންތަކަށް އުފެދިފައިވަނީ މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގެ ކާމިޔާބީ ފާހަގަކުރުމަށް ބޭއްވި ޖަލްސާގައި ރައީސް ނަޝީދަށް ވާހަކަފުޅު ދެއްކެވުމުގެ ފުރުސަތު ނުލިބުމާ ގުޅިގެންނެވެ.