ލޯކަލް ކައުންސިލް އިންތިޚާބުގެ ނަތީޖާ ދައްކާގޮތުން، ރަށު ކައުންސިލްތަކުގެ ރައީސުންގެ މެޖޯރިޓީ ސަރުކާރު ހިންގާ ޕީއެންސީން ކާމިޔާބުކޮށްފި އެވެ. އިލެކްޝަންސް ކޮމިޝަނުން މިހާރު ދަނީ އިންތިހާބުގެ ދާއިމީ ނަތީޖާ އިއުލާނުކުރަމުންނެވެ.
ވަގުތީ ނަތީޖާތަކަށް ބަލާއިރު، ޕީއެންސީން ވަނީ ރަށު ކައުންސިލްތަކުގެ 74 ރައީސުންގެ ގޮނޑި ކާމިޔާބުކޮށްފަ އެވެ. މިއާ ހިލާފަށް އިދިކޮޅު އެމްޑީޕީއަށް ކާމިޔާބު ކުރެވުނީ 71 ރައީސުންގެ ގޮނޑިއެވެ. ނަމަވެސް، ސިޓީތަކުގެ މޭޔަރުންގެ ގޮނޑިތަކަށް ބަލާއިރު ކުރިހޯދާފައިވަނީ އެމްޑީޕީންނެވެ. އެގޮތުން 5 މޭޔަރުންގެ ގޮނޑި އެމްޑީޕީން ވަނީ ކާމިޔާބުކޮށްފަ އެވެ.
އިންތިހާބުގައި އަތޮޅުތަކުގެ ނަތީޖާއަށް ބަލާއިރުވެސް ކުރީގައި އުޅެނީ ޕީއެންސީއެވެ. އެ ޕާޓީން ވަނީ 10 އަތޮޅެއްގެ މެޖޯރިޓީ ހޯދާފަ އެވެ. އެމްޑީޕީއަށް މެޖޯރިޓީ ލިބިފައިވަނީ 6 އަތޮޅަކުންނެވެ.
އިންތިހާބުގައި ވޯޓުލީ މީހުންގެ ޖުމްލަ އަދަދަށް ބަލާއިރު، އެންމެ ގިނަ މީހުން ވޯޓު ދީފައިވަނީ އެމްޑީޕީއަށެވެ. ނަމަވެސް، ޕީއެންސީ އާއި އެމްޑީޕީއާ ދެމެދު ވޯޓުގެ ނިސްބަތުން އެހާ ބޮޑު ފަރަގެއް ނެތްކަން ފާހަގަކުރެވެ އެވެ.
