މާތް ﷲ ރުމަތްތެރި ކުރައްވައިފައިވާ މައްސަރުތަކުގައި ފާފަތަކަށް އަރައިގަތުމުން ދުރުހެލިވެ، ހެޔޮ އަމަލުތައް ގިނަކުރުމަށް މިއަދުގެ ހުކުރު ހުތުބާގައި އިލްތިމާސްކޮށްފި އެވެ.

މިއަދު "ހުރުމަތްތެރިވެގެންވާ މައްސަރުތަކުގައި ފާފަތަކާ ދުރުހެލިވެ ހެޔޮ އަމަލުތައް ގިނަކުރުން" މި މައުޟޫއަށް އިއްވި ހުތުބާގައި، އިސްލާމްދީނުގައި މާތްކުރައްވައިފައިވާ ވަގުތުތަކާއި މައްސަރުތަކުގެ މުހިންމުކަމުގެ މައްޗަށް އަލިއަޅުއްވައިލެއްވި އެވެ.

ހުތުބާގައި ބަޔާންކުރެއްވި ގޮތުގައި، އަހަރުގެ ބާރަ މަހުގެ ތެރެއިން ހަތަރު މަހެއް މާތް ﷲ ވަނީ ހުރުމަތްތެރި ކުރައްވައިފަ އެވެ. އެއީ ޒުލްގައިދާ މަހާއި، ޒުލްހިއްޖާ މަހާއި، މުހައްރަމް މަހުގެ އިތުރުން ރަޖަބު މަހެވެ. މި މައްސަރުތަކުގައި އަމިއްލަ ނަފުސަށް އަނިޔާވެރިނުވުމަށް މާތް ﷲ އަމުރުކުރައްވައިފައިވާކަން ފާހަގަކުރައްވައި، ހުތުބާގައި ވިދާޅުވީ އަމިއްލަ ނަފުސަށް އަނިޔާވެރިވުމަކީ ފާފަތަކަށް އަރައިގަތުން ކަމަށެވެ.

އިބްނު އައްބާސް (ރަޟިޔަﷲ އަންހު) ގެ ބަސްފުޅަކާ ހަވާލާދީ ހުތުބާގައި ވިދާޅުވީ، ހުރުމަތްތެރިވެގެންވާ މައްސަރުތަކުގައި ކުރާ ފާފަތަކުގެ ނުބައިކަން ބޮޑުވެގެންވާ ފަދައިން، އެ މަސްތަކުގައި ކުރާ ހެޔޮ އަމަލުތަކުގެ ދަރުމައާއި ސަވާބު ވެސް އިތުރުވެގެންވާ ކަމަށެވެ. އަދި މި މައްސަރުތަކުގައި ކުރެވޭ ފާފަތަކުގެ ނުބައިކަން ބޮޑުކަމުން، އިމާމް ޝާފިއީ ފަދަ އިލްމުވެރިންގެ އަރިހުގައި މި މައްސަރުތަކުގައި މީހަކު މެރުމުން ދޭންޖެހޭ މަރުގެ ދިޔަ ވެސް ބޮޑުވެގެންވެއެވެ.

މިއަދުގެ ހުތުބާގައި އިތުރަށް ބަޔާންކުރެއްވި ގޮތުގައި، މިފަދަ މަތިވެރި މައްސަރުތަކާ ބައްދަލުވުމުން މުއުމިނު އަޅާގެ މައްޗަށް އޮތީ އަޅުކަމުގައި ހީވާގިވުމެވެ. އެގޮތުން ގިނަގިނައިން ޒިކުރުކުރުމާއި، ދުއާކުރުމާއި، ކީރިތި ގުރުއާން ކިޔެވުމާއި، ރޯދަހިފުމާއި، ސަދަގާތްކުރުން ފަދަ އަމަލީ ހެޔޮކަންތައް ގިނަކުރުމަށް ގޮވާލެއްވި އެވެ. ހަމައެހެންމެ، ހިތްތައް ތާހިރުކޮށް، އީބަބުނުމާއި، ދޭތެރެޖެއްސުމާއި، ދޮގުހެދުން ފަދަ ފާފަތަކުން ދުރުހެލިވުމަށް ނަސޭހަތްތެރިވި އެވެ.

ހުތުބާ ނިންމަވާލެއްވީ، ކުރިއަށް އޮތް ބަރަކާތްތެރި ވަގުތުތަކުގެ ބޭނުން ހެޔޮގޮތުގައި ހިފައި، މާތް ﷲ އަށް ތަގުވާވެރިވުމަށް އުންމަތަށް ހަނދާންކޮށްދެއްވަމުންނެވެ. އަދި ދީނަށް އަލަށް އުފައްދާ ބިދުއަތަކުން ދުރުހެލިވެ، މާތް ނަބިއްޔާ ﷺ ގެ ސުންނަތުގައި ސާބިތުވެ ތިބުމަށް ހުރިހާ މުސްލިމުންނަށް ވަނީ ވަސިއްޔަތް ކޮށްފަ އެވެ.