މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ރާއްޖޭގައި މަސައްކަތްކުރާ ބިދޭސީން ރާއްޖެއިން ބޭރަށް ފޮނުވާ ފައިސާއާ ބެހޭ ސާވޭއެއް "ވޯކާސް ރެމިޓަންސް ސާވޭ 2026" ގެ ނަމުގައި ކުރިއަށް ގެންދިއުމަށް ނިންމައިފި އެވެ.
މި ސާވޭއާ ގުޅޭގޮތުން އެމްއެމްއޭ އިން ނެރުނު ނޫސްބަޔާނެއްގައި (ނަންބަރު: PR/2026/176) ބުނެފައިވަނީ، މިއީ ރާއްޖޭގެ ބެލެންސް އޮފް ޕޭމަންޓްސް ހިސާބުތައް ތައްޔާރުކުރުމަށް ބޭނުންވާ މުހިންމު މައުލޫމާތު ހޯދުމުގެ ގޮތުން ކުރިއަށްގެންދާ ސާވޭއެއް ކަމަށެވެ.
މި ސާވޭ ކުރިއަށް ގެންދިއުމަށް ހަމަޖެހިފައިވަނީ 10 އެޕްރީލް 2026 ވާ ހުކުރު ދުވަހުއެވެ. ސާވޭގެ މަސައްކަތް ކުރިއަށްދާނީ ގްރޭޓަރ މާލެ ސަރަހައްދުގެ އެކި ސަރަހައްދުތަކަށް ބަހާލައިގެން ކަމަށް އެމްއެމްއޭ އިން މައުލޫމާތު ދެ އެވެ.
Advertisement
މި ސާވޭގެ މައިގަނޑު އަމާޒަކީ ރާއްޖޭގައި މަސައްކަތްކުރާ ބިދޭސީން އެމީހުންގެ ގައުމުތަކަށް ފައިސާ ފޮނުވާ މިންވަރާއި، ފައިސާ ފޮނުވުމަށް ބޭނުންކުރާ ވަސީލަތްތަކުގެ މައުލޫމާތު އެއްކުރުމެވެ. މިގޮތުން ސާވޭގައި ބައިވެރިވާ ފަރާތްތަކުން ނިސްބަތްވާ ގައުމާއި، ފައިސާ ފޮނުވާ ގޮތާއި، ފައިސާ ފޮނުވާ މިންވަރުގެ އިތުރުން ފޮނުވާ ފައިސާގެ އަދަދު އޮޅުންފިލުވޭނެ އެވެ.
އެމްއެމްއޭ އިން އިތުރަށް ބުނެފައިވަނީ، މި ސާވޭއަކީ ތަފާސްހިސާބު އެއްކުރުމަށް ކުރެވޭ މަސައްކަތަކަށްވާތީ، ސާވޭގައި ވަކިވަކި ފަރުދުންގެ ނަމާއި، ޕާސްޕޯޓް ނަންބަރު ނުވަތަ ވޯކްޕާމިޓްގެ މައުލޫމާތު އެއް ނުކުރާނެ ކަމަށެވެ. އަދި ސާވޭގެ ތެރެއިން އެއްކުރެވޭ އެންމެހާ މައުލޫމާތެއްގެ ސިއްރު ހިފަހައްޓާނެ ކަމުގެ ފުރިހަމަ ޔަގީންކަން އެ އޮތޯރިޓީން އަރުވަ އެވެ.
މި ސާވޭއަކީ ރާއްޖޭގެ އިގްތިސާދީ ދާއިރާގެ ހިސާބުތައް ހަރުދަނާކޮށް، ބޭރަށްދާ ފައިސާގެ ހަގީގީ މިންވަރު ދެނެގަތުމަށް އެޅޭ މުހިންމު ފިޔަވަޅެކެވެ. ސާވޭއާ ގުޅޭ އިތުރު މައުލޫމާތު ހޯދުމަށް އެމްއެމްއޭގެ ފޯނު ނަންބަރު 3344401 ނުވަތަ 3308880 އަށް ގުޅުއްވުމަށް އެ އޮތޯރިޓީން އެދެ އެވެ.
