ވ. ފުލިދޫ ކައުންސިލްގެ ރައީސްގެ ގޮނޑި ވެރިކަން ކުރާ ޕީއެންސީން ކާމިޔާބުކޮށް، ވޭތުވެދިޔަ ނުވަ އަހަރު އެ ރަށުގެ ކައުންސިލްގައި އޮތް އެމްޑީޕީގެ ބާރު ކަނޑުވާލައިފި އެވެ.
މި އިންތިހާބުގައި ފުލިދޫ ކައުންސިލްގެ ރައީސްގެ މަގާމަށް ވާދަކުރައްވާފައިވަނީ ޕީއެންސީގެ ކެންޑިޑޭޓް މުހައްމަދު އީމާން އަހްމަދާއި އިދިކޮޅު އެމްޑީޕީގެ ކެންޑިޑޭޓް އަބްދުލް މަޖީދު މުހައްމަދެވެ. ވަގުތީ ނަތީޖާ ދައްކާގޮތުން، މި ގޮނޑި ޕީއެންސީގެ ކެންޑިޑޭޓް މުހައްމަދު އީމާން ކާމިޔާބުކުރެއްވީ 204 ވޯޓު ހޯއްދަވައިގެންނެވެ. އޭނާއާ ވާދަކުރެއްވި އެމްޑީޕީގެ ކެންޑިޑޭޓް އަބްދުލް މަޖީދު މުހައްމަދަށް ލިބިވަޑައިގަތީ 113 ވޯޓެވެ.
މިއީ ފުލިދޫގެ ސިޔާސީ ތާރީހަށް ބަލާއިރު ފާހަގަކޮށްލެވޭ ބޮޑު ބަދަލެކެވެ. ވޭތުވެދިޔަ 9 އަހަރު ދުވަހު އެ ރަށުގެ ކައުންސިލްގެ އަގުލަބިއްޔަތާއި ރައީސްގެ ގޮނޑި ދަމަހައްޓަމުން އައީ އެމްޑީޕީންނެވެ. ނަމަވެސް، މި ފަހަރުގެ ނަތީޖާއާއެކު އެ ރަށުގެ ސިޔާސީ މިސްރާބު މިވަނީ ސަރުކާރު ހިންގާ ޕާޓީއަށް އެނބުރިފަ އެވެ.
ކައުންސިލް ރައީސްގެ ގޮނޑީގެ އިތުރުން، ފުލިދޫ ކައުންސިލްގެ މެންބަރުގެ ގޮނޑިވެސް މިފަހަރު ކާމިޔާބުކޮށްފައިވަނީ ޕީއެންސީންނެވެ. އެ ގޮނޑި ޕީއެންސީގެ ކެންޑިޑޭޓް ހުސައިން ޝަބީން ކާމިޔާބުކުރެއްވީ އިތުރު ކެންޑިޑޭޓަކު ކުރިމަތިނުލާތީ އިންތިހާބަކާ ނުލަ އެވެ.
މި އިންތިހާބުގައި އަންހެނުންނަށް ހާއްސަކޮށްފައިވާ ގޮނޑި ކާމިޔާބުކޮށްފައިވަނީ އެމްޑީޕީގެ ކެންޑިޑޭޓް ސަމްހާ ހުސައިން އެވެ. އޭނާ މި ގޮނޑި ކާމިޔާބުކުރީ 161 ވޯޓު ހޯއްދަވައިގެންނެވެ. އޭނާއާ ވާދަކުރެއްވި ޕީއެންސީގެ ކެންޑިޑޭޓް ފާތިމަތު ޖުމާނާއަށް ލިބުނީ 151 ވޯޓެވެ. މި ގޮނޑި އެމްޑީޕީން ކާމިޔާބުކުރީ 10 ވޯޓުގެ ކުޑަ ތަފާތަކުންނެވެ.
ވ. ފުލިދޫއަކީ އަތޮޅުތެރޭގެ ރަށްތަކުގެ ތެރެއިން ލޯކަލް ޓޫރިޒަމް ވަރަށް ބާރު ސްޕީޑެއްގައި ކުރިއަރަމުން އަންނަ، އަދި އިގްތިސާދީ ގޮތުން ފާހަގަކޮށްލެވޭ މުހިންމު ރަށެކެވެ.
