އެމްޑީޕީގެ އެތެރޭގެ ހަމަނުޖެހުން ބޮޑުވެ، އެ ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) މަގާމުން ވަކިކުރުމަށް އެމްޑީޕީގެ ގައުމީ މަޖިލީހަށް ހުށަހަޅައިފިއެވެ.
މިދިޔަ އަހަރުގެ ޑިސެމްބަރު 8 ގައި އެ މަގާމަށް އިންތިހާބުކުރި ގަޕޯ ވަކިކުރުމުގެ ޕެޓިޝަން ހުށަހަޅާފައިވަނީ އެ ޕާޓީގެ ގައުމީ މަޖިލީހުގެ ގިނަ އަދަދެއްގެ މެމްބަރުންގެ ސޮޔާއެކުގައެވެ.
ވަގުތީ ޗެއާޕާސަން ކަމުން ގަޕޯ ވަކިކުރުމުގެ މަސައްކަތް ފަށާފައި މިވަނީ، އެ ޕާޓީގެ ޑެޕިއުޓީ ޗެއާޕާސަން އިދާރީ، އިބްރާހިމް ވަހީދު (އިބުރޭ) އާއި ލީގަލް ޑިރެކްޓަރު އަހުމަދު މައުރޫފް މަގާމުން ވަކިކުރި ކަމަށް ބުނެ ގަޕޯ ސޮއިކުރެއްވި ސިޓީއެއް ފޮނުވި މައްސަލައާ ގުޅިގެންނެވެ. ނަމަވެސް އެ ބޭފުޅުން މަގާމުން ވަކިކުރި ސަބަބެއް އެ ސިޓީގައި ބަޔާންކޮށްފައެއް ނުވެ އެވެ.
މިކަމާ ގުޅިގެން އިބްރާހިމް ވަހީދު އެކްސްގައި ކުރެއްވި ޕޯސްޓެއްގައި ވިދާޅުވީ އޭނާ މަގާމުން ވަކިކުރީ ޕާޓީގެ އަސާސީ ގަވާއިދާ ހިލާފަށް ކަމަށެވެ. އަދި ގަޕޯއަށް ވަރަށް ބޮޑަށް ފާޑުވިދާޅުވަމުން އިބުރޭ ވިދާޅުވީ "ގަޕޯ ރަނގަޅަށް މޮޔަވެއްޖެ" ކަމަށެވެ.
އެމްޑީޕީގެ އެތެރޭގެ ކޯޅުން އަނެއްކާވެސް ބޮޑުވެފައި މިވަނީ، ލޯކަލް ކައުންސިލް އިންތިހާބުގެ ކާމިޔާބީ ފާހަގަކުރަން ބޭއްވި ޖަލްސާގައި ޕާޓީގެ ކުރީގެ ރައީސް މުހައްމަދު ނަޝީދަށް ވާހަކަ ދެއްކެވުމުގެ ފުރުސަތު ދިނުމަށް ފަހު، ފަހުން އެޖެންޑާ އިން އެ އައިޓަމް އުނިކުރި މައްސަލައިގަ އެވެ. މިކަމާ ހިތްހަމަނުޖެހިގެން ރައީސް ނަޝީދާއި އެމަނިކުފާނަށް ތާއީދުކުރާ ފަރާތްތަކުން އެ ޖަލްސާ ބޮއިކޮޓްކުރި އެވެ.
މި ތުހުމަތުތަކާ ގުޅިގެން ގަޕޯ ވިދާޅުވީ، ނަޝީދަށް ފުރުސަތު ނުދޭން އުޅޭ ކަމަށް ބުނެ ވާހަކަ ފެތުރީ މަސްލަހަތު ގެއްލޭ ގޮތަށް ކަމަށާއި، އޭނާ މަސައްކަތް ކުރެއްވީ އެ ފުރުސަތު ދެއްވަން ކަމަށެވެ. ގައުމީ މަޖިލިހުގެ 10 މެމްބަރުން ސޮއިކޮށްފި ނަމަ ޖަލްސާއެއް ބޭއްވުން ލާޒިމްވާއިރު، ގަޕޯގެ އިތުބާރު ނެތްކަމުގެ ވޯޓު ނެގުމުގެ ޖަލްސާ ވީހާވެސް އަވަހަށް އެޖެންޑާކޮށްގެން ބާއްވައިދިނުމަށް ޕެޓިޝަނުގައި ވަނީ އެދިފަ އެވެ.
ހަނިމާދޫ ދާއިރާގެ މެމްބަރުކަން ވެސް ކުރައްވާ ގަޕޯ ވަގުތީ ޗެއާޕާސަން ކަމަށް އިންތިހާބުކުރީ ކުރިން އެ މަގާމުގައި ހުންނެވި ފައްޔާޒު އިސްމާއިލް އިސްތިއުފާ ދެއްވުމާ ގުޅިގެންނެވެ.
