ކުދި އަދި މެދުފަންތީގެ ވިޔަފާރިތަކުން 20 ކޯޓާއާ ހަމައަށް ފީ ދައްކަން ނުޖެހޭ ގޮތަށް ބިދޭސީން ވަޒީފާ އަދާކުރުމާ ބެހޭ ގަވާއިދަށް ސަރުކާރުން މުހިންމު އިސްލާހެއް ގެނެސްފިއެވެ.

ހޯމްލޭންޑު ސެކިއުރިޓީ މިނިސްޓްރީން ހާމަކުރި ގޮތުގައި، މިދިޔަ ބުދަ ދުވަހު ގެނައި މި އިސްލާހުގެ ދަށުން އެކްސްޕެޓް ސިސްޓަމް މެދުވެރިކޮށް ވިޔަފާރިތަކަށް މި ލުއި ލިބޭނެއެވެ. މި ބަދަލުގެ ސަބަބުން ގާތްގަނޑަކަށް 30،000 އަށް ވުރެ ގިނަ ކުދި އަދި މެދުފަންތީގެ ވިޔަފާރިތަކަށް ކޯޓާ ފީގެ ލުއި ލިބޭނެ ކަމަށް އެ މިނިސްޓްރީން ލަފާކުރެއެވެ.

ކުރިން އަމަލުކުރަމުން އައި ގޮތުން ނަމަ، ބިދޭސީން ރާއްޖެ އެތެރެކުރުމަށް ކޮންމެ ކޯޓާއަކަށް އަހަރަކު 2،000 ރުފިޔާގެ ފީއެއް ދައްކަން ޖެހެއެވެ. ނަމަވެސް އާ އިސްލާހާއެކު 20 ކޯޓާއާ ހަމައަށް މި ފީ ދައްކާކަށް ނުޖެހޭނެއެވެ.

މިނިސްޓްރީން ބުނީ މި ބަދަލަކީ މިދިޔަ ޑިސެމްބަރު 17 ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުދި އަދި މެދުފަންތީގެ ވިޔަފާރިތަކާ އެކު ބޭއްވެވި ބައްދަލުވުމުގައި އެ ފަރާތްތަކުން ހުށަހެޅި ކަންބޮޑުވުންތަކަށް ހައްލެއް ހޯދައިދިނުމުގެ ގޮތުން ނިންމެވި ނިންމެވުމެއް ކަމަށެވެ.

އިންސާނީ ވަގުފާރިއަށް މަގުފަހިވިޔަ ނުދިނުމަށްޓަކައި، އެއް ހިއްސާދާރެއް ނުވަތަ މަސްއޫލުވެރިއެއްގެ ދަށުން ހިންގާ އެކި ވިޔަފާރިތަކަށް މި ލުއި ތަކުރާރު ނުވާނެ ގޮތަށް ގަވާއިދުގައި ވަނީ ހަރުދަނާ އުސޫލުތަކެއް ކަނޑައަޅާފައެވެ. މި ބަދަލާ ގުޅިގެން އަމަލުކުރަންޖެހޭ ގޮތުގެ ގައިޑްލައިންތައް އެކްސްޕެޓް ސިސްޓަމްގައި މިހާރު ވަނީ ޝާއިއުކޮށްފައެވެ.

ސަރުކާރުގެ އަމާޒަކީ ކުރިއަށް އޮތް ދެ އަހަރުގެ ތެރޭގައި ނިޒާމީ ގޮތުން ހުރި މިފަދަ މައްސަލަތަކަށް ދާއިމީ ހައްލެއް ހޯދައިދީ، ރާއްޖޭގެ އިގުތިސޯދުގައި ކުދި ވިޔަފާރިތަކުގެ ދައުރު މިހާރަށްވުރެ ފުޅާކުރުމެވެ.