ހުވަދު އަތޮޅު އުތުރުބުރީ (ގއ) އަތޮޅު ތައުލީމީ މަރުކަޒުގެ ކިޔެވުން މެދުނުކެނޑި ކުރިއަށްދާނެ ކަމުގެ ޔަގީންކަން މިނިސްޓަރު ދެއްވައިފި އެވެ.
ގއ. ވިލިނގިލީގައި ހުންނަ އެ އަތޮޅު ތައުލީމީ މަރުކަޒުގައި ރޭ ހިނގި ނުރައްކާތެރި އަލިފާނުގެ ހާދިސާގައި އެ ސްކޫލަށް ބޮޑެތި ގެއްލުންތަކެއް ލިބުނު ނަމަވެސް، އެ ސްކޫލުގެ ދަރިވަރުންގެ ކިޔެވުން މެދުނުކެނޑި ކުރިއަށްދާނެ އިންތިޒާމުތައް ހަމަޖައްސަވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
ގާތްގަނޑަކަށް 750 އެއްހާ ކުދިން ތައުލީމު ހާސިލުކުރަމުންދާ ގއ. އަތޮޅު ތައުލީމީ މަރުކަޒުގައި އަލިފާން ރޯވީ ރޭ ދަންވަރު 12:30 ޖެހިކަން ހާއިރު އެވެ. އަލިފާން އެންމެ ފުރަތަމަ ރޯވީ ޕްރައިމަރީ ސްޓާފްރޫމުގައި ހުރި އޭސީއެއްގަ އެވެ. އަދި އެ އަލިފާންގަނޑު ފެތުރިގެން ގޮސް، ސްޓާފްރޫމާ ޖެހިގެން ހުރި ހުރި ޕްރިންޓިން ރޫމާއި އެއް ކްލާސްރޫމް ވަނީ އެއްކޮށް އަނދާފައެވެ. އަލިފާން ރޯވުމުން ސިފައިންނާއި އާންމުން ގުޅިގެން ކުރި މަސައްކަތާއެކު އަލިފާންގަނޑު އެއްކޮށް ނިއްވާލެވުނީ ދަންވަރު 02:00 ޖެހި އިރުގަ އެވެ.
އެ ހާދިސާއާ ގުޅިގެން މިނިސްޓަރު ޑރ. އިސްމާއިލް ޝަފީއު ފޭސްބުކްގައި ކުރެއްވި ޕޯސްޓެއްގައި ވިދާޅުވެފައި ވަނީ، ސްކޫލުގެ އިމާރާތަކަށް މިފަދަ ބޮޑު ގެއްލުމެއް ލިބުމުން، ވަރަށް ބޮޑަށް އެކަމާ ހިތާމަ ކުރައްވާ ކަމަށެވެ. އެހެންނަމަވެސް، ދަރިވަރުންގެ ކިޔެވުމަށް ބުރޫނާރާނެ ފަދަ ގޮތަށް ފިޔަވަޅު އަޅުއްވާ އެ މައްސަލަ ހައްލު ކުރައްވާނެ ކަމުގެ ކަމުގެ ޔަގީންކަން މިނިސްޓަރު ދެއްވި އެވެ.
އެގޮތުން، ފެށޭ ހަފުތާގެ ކިޔެވުން ފެށުމުގެ ކުރިން، އަލިފާނުގެ ހާދިސާގައި ހަލާކުވި ޕްރިންޓިން ރޫމުގެ މެޝިނަރީތަކާއި، ޓީޗަރުންނަށް ބޭނުންވާ ކޮމްޕިއުޓަރުތަކާއި ފަރުނީޗަރު ސްކޫލަށް ލިބޭނެ އިންތިޒާމު ހަމަޖައްސަވާދެއްވާނެ ކަމަށް މިނިސްޓަރު ވިދާޅުވިއެވެ.
ރޭ ހިނގާ ދިޔަ ހާދިސާގައި އެއްވެސް މީހަކަށް އަނިޔާއެއް ލިބިފައި ނުވެ އެވެ. ނަމަވެސް ސްކޫލުގެ މުހިންމު ވަސީލަތްތަކެއް ވަނީ ބޭނުންނުކުރެވޭ ވަރަށް އަނދާފަ އެވެ. އެހެންކަމުން އެޑިއުކޭޝަން މިނިސްޓްރީން މިހާރު ދަނީ ސްކޫލަށް ލިބުނު ގެއްލުންތަކަށް ބަލައި، ހަލާކުވި ވަސީލަތްތަށް އަނބުރާ ސްކޫލަށް ދިނުމުގެ މަސައްކަތް ކުރަމުންނެވެ.
