ދިވެހިރާއްޖޭގައި ގަވާއިދާ ހިލާފަށް ވަޒީފާ އަދާކުރަމުންދާ ބިދޭސީން ގަވާއިދުގެ ތެރެއަށް ފެއްތުމަށްޓަކައި ހިންގާ "މާސް ލީގަލައިޒޭޝަން ޕްރޮގްރާމް" ގެ މުއްދަތު، މެއި 02 ގެ ނިޔަލަށް އިތުރުކޮށްފިއެވެ.

މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން މިއަދު ނެރުނު އިއުލާނުގައި ބަޔާންކޮށްފައިވާ ގޮތުގައި، އެ މުއްދަތު އިތުރުކުރަން ނިންމާފައި ވަނީ ގިނަ އަދަދެއްގެ ވަޒީފާދޭ ފަރާތްތަކުން އެކަމަށް އެދެމުންދާތީ އެވެ. އަދި އެމަސައްކަތަކީ ސަރުކާރުން ބިދޭސީންގެ މައްސަލަ ހައްލުކުރުމަށް ފަށާފައިވާ "އޮޕަރޭޝަން ކުރަނގި" ގެ ދަށުން ކުރިއަށްގެންދާ މުހިންމު މަސައްކަތެއް ކަމަށެވެ.

އެ ޕްރޮގްރާމަކީ ރާއްޖޭގައި ވަޒީފާ އަދާކުރާ ބިދޭސީންގެ ތެރެއިން، ވަޒީފާ އަދާކުރުމުގެ ހުއްދަ ނުވަތަ ވޯކް ޕާމިޓް ނެތި ވަޒީފާ އަދާ ކުރާ ފަރާތްތަކާއި، ހުއްދައިގެ މުއްދަތު ހަމަވެފައިވާ ފަރާތްތަކުގެ އިތުރުން، ކާކުކަން އަންގައިދޭ ރަސްމީ ލިޔުމެއް ނެތް ބިދޭސީންނަށް އަމާޒުކޮށްގެން ހިންގާ ޕްރޮގްރާމެކެވެ.

ސަރުކާރުން ހާމަކޮށްފައިވާ ގޮތުގައި، މިއީ ގަވާއިދާ ހިލާފަށް އުޅޭ ބިދޭސީންނަށް ގަވާއިދުގެ ތެރެއަށް ވަނުމަށް ދެވޭނެ އެންމެ ފަހު ފުރުސަތެވެ. އަދި މި މުއްދަތުގެ ފަހުން ވޯކް ޕާމިޓް ހެދުމާއި، ލިޔެކިޔުންތައް ހަމަކުރުމަށް އިތުރު އެއްވެސް ފުރުސަތެއް ނުދެވޭނެ ކަމަށްވެސް އެ މިނިސްޓްރީން ވަނީ ބުނެފަ އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރަމުންދާ މި މަސައްކަތުގައި، ހުރިހާ ވަޒީފާދޭ ފަރާތްތަކުންވެސް މި ފުރުސަތުގެ ބޭނުން ހިފުމަށް ހޯމް މިނިސްޓްރީންވަނީ އިލްތިމާސްކޮށްފައެވެ.

އަދި އެ ޕްރޮގްރާމާ ގުޅޭ އިތުރު މައުލޫމާތު ސާފުކުރުމަށް ބޭނުންވާ ފަރާތްތަކުން 1485 އަށް ގުޅުމަށް ނުވަތަ މިނިސްޓްރީއަށް އީމެއިލް ކުރެއްވުމަށް މިނިސްޓްރީން ވަނީ އެދިފައެވެ.