އީދު ބައިބަލާ ޗެލެންޖު 1447ގެ ފޯރިގަދަ މެޗުތަކަކަށްފަހު، މުބާރާތުގެ ފައިނަލްގެ ޖާގަތައް ޒެޕޯ ސްޕޯޓްސް ކްލަބާއި ބީޖީ ސްޕޯޓްސް ކްލަބުން ޔަގީންކޮށްފިއެވެ.

މި ދެ ޓީމު ފައިނަލަށް ދަތުރުކުރީ ރޭ ކުޅެވުނު ކުއާޓާ ފައިނަލާއި ސެމީ ފައިނަލްގެ މެޗުތައް ކާމިޔާބުކޮށްގެންނެވެ.

ޒެޕޯ ސްޕޯޓްސް ކްލަބް ފައިނަލަށް ދަތުރުކުރީ ކުއާޓާ ފައިނަލުގައި ކްލަބް ކާސިންޖީ ބަލިކުރުމަށްފަހު، ސެމީ ފައިނަލުގައި އޮޑި ސްޕޯޓްސް ކްލަބާ ވާދަކޮށް ކުރި ހޯދައިގެންނެވެ. އޮޑި އާއި ބައްދަލުކުރި ސެމީ ފައިނަލް މެޗުގެ ފުރަތަމަ ގޭމް އޮޑި ކާމިޔާބުކުރި ނަމަވެސް، ދެވަނަ ގޭމް ޒެޕޯއިން ކާމިޔާބުކުރީ މެޗު ނިމެން 14 ސިކުންތަށް ވެފައިވަނިކޮށް 7-5 އިންނެވެ. މި މެޗުގެ ނަތީޖާ ނެރުނީ ގަދަ ހިފުމަށް ގޮސްގެންނެވެ. ގަދަ ހިފުމުގެ 5 ވަނަ ބުރުގައި ގުރު ދިމާވުމުން ބޭރުން އަރާ ޒެޕޯއިން ވަނީ މެޗު ކާމިޔާބުކޮށްފައެވެ.

ބައިބަލާގެ އެންމެ ކާމިޔާބު ޓީމު ކަމަށްވާ ބީޖީ ސްޕޯޓްސް ކްލަބް ފައިނަލަށް ދަތުރުކުރީ ކުއާޓާ ފައިނަލުގައި ކްލަބް ޒެފްރޯލް ބަލިކުރުމަށްފަހު، ސެމީ ފައިނަލުގައި ދަ ވުލްވްސް ސްޕޯޓްސް ކްލަބްގެ މައްޗަށް ކުރި ހޯދައިގެންނެވެ. ދަ ވުލްވްސް އާއި ބައްދަލުކުރި މެޗުގެ ފުރަތަމަ ގޭމް ވުލްވްސްއިން ގެންދިޔަ ނަމަވެސް، ބީޖީއިން ވަނީ ދެވަނަ ގޭމް 8-7 އިން ކާމިޔާބުކޮށް މެޗު ގަދަ ހިފުމަކަށް ގެންގޮސްފައެވެ. ގަދަ ހިފުމުގެ ފަސްވަނަ ބުރުގައި ގުރު ދިމާވުމުން ބޭރުން އަރާ ބީޖީއިން ވަނީ ފައިނަލްގެ ޖާގަ ކަށަވަރުކޮށްފައެވެ.

މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މިރޭ 21:00 ގައެވެ. މިރޭގެ ފައިނަލް މެޗުގައި ބައްދަލުކުރާނީ ޒެޕޯ ސްޕޯޓްސް ކްލަބާއި ބީޖީ ސްޕޯޓްސް ކްލަބެވެ.