ރޭ ބައިބަލާ މުބާރާތް ފެށުނު ވަގުތު ސްޓޭޑިއަމަށް ވަން ކޮންމެ މީހެއްގެ ނަޒަރު އެންމެ ފުރަތަމަ ވެސް ހުއްޓުނީ ކުރިމަތީގައި ސީދާވެ ހުރި 68 ފޫޓުގެ ބިޔަ އެރީނާއަށެވެ. ލައިޓްތައް ދިއްލި، މިއުޒިކުގެ ވެރިވި ހިނދު، އެ އެރީނާ ދިރިގެން އައީ ބެލުންތެރިންގެ ހިތްތަކުގައި ބައިބަލާގެ ޖޯޝާއި ފޯރި އެތައް ދަރަޖައަކަށް އުފުލައިލަމުންނެވެ. މިއީ ހަމައެކަނި ސްޓޭޖެއް ނޫންކަން އެ ވަގުތުކޮޅުން ސާބިތުވިއެވެ. މިއީ ރާއްޖެ މީގެ ކުރިން ނުދެކޭ ފެންވަރުގެ ތަޖުރިބާއެކެވެ.
މި ތަޖުރިބާގެ ފަހަތުގައި ވަނީ ސްޓޭޖް ކޯ ޕްރައިވެޓް ލިމިޓެޑެވެ. ރާއްޖޭގެ އިވެންޓް އިންޑަސްޓްރީގައި ފާހަގަކޮށްލެވޭ ހިދުމަތްތަކެއް ފޯރުކޮށްދެމުން އަންނަ މި ކުންފުނީގެ ފުޅާ ދާއިރާގައި ސްޓޭޖް ޑިޒައިނާއި ފެބްރިކޭޝަނާއި، ލައިޓިން ޑިޒައިނާއި، ސައުންޑް އިންޖިނިއަރިންނާއި، ވިޝުއަލް އިފެކްޓްސް އަދި އިވެންޓް މެނޭޖްމަންޓް ހިމެނެއެވެ. ތަޖުރިބާކާރު ހުނަރުވެރި ޓީމެއް ހިމެނޭ މި ކުންފުނީގެ ތަސައްވުރަކީ ރާއްޖޭގެ ސްޓޭޖް ޕްރޮޑަކްޝަންގެ ފެންވަރު ބައިނަލްއަޤުވާމީ މިންގަނޑުތަކާ އެއް ހަމައަކަށް ގެންދިޔުމެވެ.
ރޭ ބެލުންތެރިންނަށް ފެނިގެންދިޔައީ އެ ތަސައްވުރުގެ ދިރި ހުރި ހެއްކެކެވެ. 68 ފޫޓުގެ ބިޔަ އޮނިގަނޑެއްގެ މައްޗަށް ބިނާކޮށްފައިވާ މި އެރީނާގައި ގިނަ ލެޔަރުތަކެއް ހިމެނޭ ހައި ރެޒޮލޫޝަން އެލް.އީ.ޑީ ޑިސްޕްލޭތަކުން ބެކްޑްރޮޕް ދިރިގެން އައިއިރު، އެޑްވާންސްޑް ލައިޓިން ރިގް ސިސްޓަމުން ކުޅިވަރުގެ ކޮންމެ ވަގުތުކޮޅެއް އައި ކުލައެއް ހެން ބަދަލުވަމުން ދިޔައެވެ. ޕައިރޯޓެކްނިކް އިފެކްޓްސް އާއި ވިޝުއަލް އިފެކްޓްސް އެއްވެ، މެޗުތައް ފެށޭ ކޮންމެ ވަގުތެއް ބަދަލުކޮށްލީ ބެލުންތެރިން އެހެން ދުނިޔެއަކަށް ގެންގޮސްދޭ ފަދަ ހައިރާންކުރުވަނިވި ތަޖުރިބާއަކަށެވެ. ސައުންޑް ސިސްޓަމުން ސްޓޭޑިއަމްގެ ކޮންމެ ކަނަކަށް ވެސް ފޯރީގެ ރާޅު ފޮނުވައިދިނެވެ.
ސްޓޭޖްކޯއިން އީދު ބައިބަލާ ޗެލެންޖު 1447 އަށް އަޅައިދިން ބިޔަ އެރީނާ---ފޮޓޯ:ޚުލާސާ
މި އެރީނާގެ ކޮންސެޕްޓާއި ޑިޒައިންގެ ފަހަތުގައި ހުރި މޭސްތިރިޔާއަކީ އަލީ ރާޝިދެވެ. ބައިބަލާގެ ބާރާއި އެއްބައިވަންތަކަމާއި ކުރިއަރަމުންދާ ރޫހު ރަމްޒުކޮށްދޭ ގޮތަށް މި އެރީނާ ބައްޓަންކުރުމުގައި އޭނާ ވަނީ މުހިންމު ދައުރެއް އަދާކޮށްފައެވެ. އިންޖިނިއަރިންގް މަސައްކަތްތަކުން ފެށިގެން މުޅި އެރީނާގެ ފެންނަ ފެނުމާ ހަމައަށް، 68 ފޫޓުގެ ބިޔަ އޮނިގަނޑެއްގެ ޓެކްނިކަލް ކޮމްޕްލެކްސިޓީ އާ އެކު ބައިބަލާގެ ރޫހު ދިރުވައިދޭ ވިޝުއަލް އައިޑެންޓިޓީއެއް ގެނެސްދިނުމުގައި އަލީ ރާޝިދުގެ ކްރިއޭޓިވް ވިޝަން ވެގެންދިޔައީ މި އެރީނާގެ ފުރާނައިގެ ގޮތުގައެވެ.
މި ބޮޑު ތަސައްވުރު ހަގީގަތަކަށް ހެދީ ސްޓޭޖް ކޯގެ ޓެކްނިކަލް ކްރޫގެ ހުއްޓުމެއް ނެތް ބުރަ މަސައްކަތުންނެވެ. އެތައް ހަފުތާއެއް ކުރިން ކޮންސެޕްޓް ޑިޒައިނުން ފެށިގެން، 3ޑީ ރެންޑާ ތައްޔާރުކުރުމާއި، ސްޓްރަކްޗރަލް އިންޖިނިއަރިން ޕްލޭން ފައިނަލްކުރުމާއި، ހުރިހާ ސިސްޓަމެއް ޓެސްޓުކުރުމާ ހަމައަށް ކޮންމެ މަރުޙަލާއެއް ގެންގޮސްފައި ވަނީ އެންމެ މަތީ ފެންވަރު ކަށަވަރުކުރަމުންނެވެ. ރެއާ ދުވާލު ކެނޑިނޭޅި ރިގިންގް އާއި ސެޓަޕްގެ މަސައްކަތް ކުރަމުން ގެންދިޔައިރު، ކޮންމެ ތަނބެއް، ކޮންމެ ގުޅުމެއް ރައްކާތެރިކަމާ އެކު ފުރިހަމަ ނިޒާމެއްގެ ތެރެއިން ގެންދިޔުމުގައި ސްޓްރަކްޗރަލް ސޭފްޓީ އާއި އިލެކްޓްރިކަލް ސޭފްޓީގެ ހުރިހާ މިންގަނޑެއް ފުރިހަމަކޮށް، ހުށަހެޅުންތެރިންނާއި ބެލުންތެރިންގެ ރައްކާތެރިކަން ކަށަވަރުކުރިއެވެ.
އީދު ބައިބަލާ ޗެލެންޖު 1447 ގެ ފުރަތަމަރޭގެ މެޗުތަކުގެ ތެރެއިން---ފޮޓޯ:ޚުލާސާ
މައިދާން ތައްޔާރުކުރުމުގައި ސްޓޭޖް ކޯގެ އިތުރުން މުހިންމު ޕާޓްނަރުންގެ ދައުރު ވެސް ފާހަގަކޮށްލެވެއެވެ. މުބާރާތުގެ ހޯސްޓިން ޕާޓްނަރު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގުޅިގެން މައިދާން ތައްޔާރުކުރުމުގައި ކުރި މަސައްކަތުން، ރޭގެ މުބާރާތް ފެށުނީ ހުރިހާ ގޮތަކުން ވެސް ފުރިހަމައަށެވެ.
ރޭ ސްޓޭޑިއަމް ދިއްލުނު ހިނދު ސާބިތުވީ ސްޓޭޖް ކޯ އިން މި ބިނާކުރީ ހަމައެކަނި ސްޓޭޖެއް ނޫން ކަމެވެ. މިއީ ދިވެހި ފަންނުވެރިކަމުގެ ކުޅަދާނަކަން ދައްކުވައިދޭ ލާމަސީލު މާސްޓާޕީސްއެކެވެ. ބައިބަލާ ފަދަ ދިވެހި ސަގާފީ ހަރަކާތްތައް ދުނިޔޭގެ ފެންވަރުގެ ސްޓޭޖުތަކުގައި ދައްކުވައިދީ، ރާއްޖޭގެ އިވެންޓް އިންޑަސްޓްރީ ބައިނަލްއަގުވާމީ ފެންވަރަށް ގެންދިޔުމުގެ ހުވަފެނާ ދިމާއަށް ސްޓޭޖް ކޯ އެޅި މި ފިޔަވަޅު ބައްލަވައިލައްވަން، ބައިބަލާ މައިދާނަށް ވަޑައިގަންނަވާށެވެ. އެ މަންޒަރު ފެނިވަޑައިގަންނަވާ ހިނދު، ދިވެހި ފަންނުވެރިކަމާ މެދު ފަހުރުވެރިވެވޭނެ ކަން ޔަގީނެވެ.
