ރޭ ކުރިއަށް ދިޔަ ބައިބަލާ މުބާރާތުގެ މެޗެއްގެ ތެރެއިން ހިނގައިދިޔަ ހަމަނުޖެހުންތަކަކީ ކްލަބް ޓީސީގެ މެޗާ ސީދާ ގުޅުމެއް އޮތް ކަމެއް ނޫން ކަމަށާއި، އެއީ މަސްތުގެ ހާލަތުގައި ހުރި މީހަކު ހިންގި ދަށުދަރަޖައިގެ އަމަލުތަކެއްގެ ސަބަބުން މެދުވެރިވި ކަމެއް ކަމަށް އެ ކްލަބުން ބުނެފި އެވެ.

މި ހާދިސާއާ ގުޅިގެން ކްލަބް ޓީސީން ނެރުނު ބަޔާނެއްގައި ބުނެފައިވަނީ، އާއިލާތައް އެކުގައި ވަގުތު ހޭދަކުރާ ކުޅިވަރު މައިދާނެއްގައި، ހާއްސަކޮށް އަންހެނުންނާއި ކުޑަކުދިން ތިބި މާހައުލެއްގައި މާރާމާރީ ހިންގުމަކީ އެ ކްލަބުން އެންމެ ހަރުކަށި އިބާރާތުން ކުށްވެރިކުރާ ކަމެއް ކަމަށެވެ.

ކްލަބުން ހާމަކުރި ގޮތުގައި، ހަމަނުޖެހުން ފެށުނީ ޓީސީ ކުޅެމުންދިޔަ ވަގުތު ސަޕޯޓަރުންގެ ބެންޗުގެ އެންމެ މަތީ ސީޓުގައި އިން، ކްލަބާ އެއްވެސް ގުޅުމެއް ނެތް މީހަކު މަސްތުގެ ހާލަތުގައި ހުރެ އަވަގުރާނަ ގޮވައި ބޭއަދަބީ ބަސްތައް ބޭނުންކުރަން ފެށުމުންނެވެ. މި މީހާއަކީ މިދިޔަ އަހަރުގެ މުބާރާތުގައި ވެސް ހަމަނުޖެހުން ހިންގައިގެން ސަސްޕެންޑުކޮށްފައިވާ މީހެއްކަން ޓީސީން ވަނީ ފާހަގަކޮށްފަ އެވެ.

އެ ވަގުތު އެތަނުގައި ތިބި އަންހެނުންތަކެއް، އޭގެ ތެރޭގައި ޓީސީގެ ކުޅުންތެރިއެއްގެ އަންހެނުން ވެސް ހިމެނޭ ގޮތަށް، އެކަން ހުއްޓާލުމަށް އެދުމުން އެ މީހާ ވަނީ ހަޑިހުތުރު ބަހުން ރައްދު ދީފަ އެވެ. އަދި މެޗު ނިމުނު ވަގުތު އެ މީހާއާ އެކު ހުރި ދެވަނަ މީހަކު، ނަސޭހަތްތެރިވި މޫނުބުރުގާ އެޅި އަންހެނަކަށް ޖިސްމާނީ ހަމަލާދީ، އޭނާގެ މޫނުބުރުގާ ވީދައި ނިވާކަން ނަގައިލާފައިވާ ކަމަށް ވެސް ޓީސީގެ ބަޔާނުގައި ބުނެފައިވެ އެވެ.

"މުސްލިމު އުހްތެއްގެ ނިވާކަން ގަދަކަމުން ނަގައިލައި ހަމަލާ ދިނުމަކީ ކުޅިވަރީ މައިދާނެއްގައި ވިޔަސް، އެ ނޫން ތަނެއްގައި ވިޔަސް ބަލައިގަނެވޭނެ ކަމެއް ނޫން،" ޓީސީން ނެރުނު ބަޔާނުގައި ބުންޏެވެ.

މި މާރާމާރީގައި ކްލަބުގެ އެއްވެސް ކުޅުންތެރިއަކު ޝާމިލުވެފައިވޭތޯ ބަލަމުންދާ ކަމަށާއި، އެފަދަ ކަމެއް ފާހަގަވެއްޖެ ނަމަ ހަރުކަށި ފިޔަވަޅު އަޅާނެ ކަމުގެ ޔަގީންކަން އެ ކްލަބުން ވަނީ ދީފަ އެވެ. މީގެ އިތުރުން، ރޭ ކުޅުނު އިދިކޮޅު ޓީމާ ދެމެދު އެއްވެސް ހިތްހަމަނުޖެހުމެއް ނެތް ކަމަށާއި، ރެފްރީގެ ނިންމުންތަކާ މެދު ހުރި ހިތްހަމަނުޖެހުންތައް ދަނޑުން ބޭރަށް ނުގެންދާނެ ކަމަށް ވެސް ޓީސީން ބުންޏެވެ.

ޓީސީން ވަނީ ހަބަރު ފެތުރުމުގައި ކަމުގެ ހަގީގަތް ސާފުކުރުމަށް މީޑިއާތަކަށް އިލްތިމާސްކޮށްފަ އެވެ. އަދި ބައިބަލާ އެރީނާ ބޭރުން ހިނގާ މިފަދަ ކަންކަން ވަގުތުން ބަލައި، ފިޔަވަޅު އެޅުމަށް ބައިބަލާ އެސޯސިއޭޝަނަށް ވެސް އެ ކްލަބުން ވަނީ ގޮވާލާފަ އެވެ.