ހިފާފައިވާ ވެސްޓް ބޭންކުގައި ހަރަކާތްތެރިވަމުންދިޔަ ސީއެންއެން ގެ ނޫސްވެރިންގެ ޓީމަކަށް އިސްރާއީލު ސިފައިން ހަމަލާދީ، އަނިޔާކުރި ކަމަށް ބުނާ މައްސަލައަކާ ގުޅިގެން، އެ ސަރަހައްދުގައި ހަރަކާތްތެރިވާ އިސްރާއީލު ސިފައިންގެ މުޅި ފައުޖު އެ ސަރަހައްދުން ބޭރުކުރުމަށް އިސްރާއީލުގެ އަސްކަރިއްޔާގެ އިސްވެރިޔާ އަމުރުކޮށްފިއެވެ.
މި ހާދިސާ ހިނގާފައިވަނީ ވެސްޓް ބޭންކުގެ ސަރަހައްދެއްގައި ސީއެންއެންގެ ނޫސްވެރިން މަސައްކަތް ކުރަމުން ދަނިކޮށެވެ. ރިޕޯޓްތައް ބުނާ ގޮތުގައި އިސްރާއީލު ސިފައިން ވަނީ ނޫސްވެރިންނަށް ބިރުދައްކައި، ޖިސްމާނީ ގޮތުން އަނިޔާކޮށްފައެވެ. ސީއެންއެންގެ ނޫސްވެރިން ހިމެނޭހެން، ފަހަކަށް އައިސް އިސްރާއީލުން ހައްޔަރުކުރާ ނޫސްވެރިންގެ އަދަދު ދަނީ އިތުރުވަމުންނެވެ. ވަކިން ހާއްސަކޮށް، ފަލަސްތީނުގެ ބިމުގައި އިސްރާއީލުން ހިންގާ ލާއިންސާނީ އަމަލުތައް ރިޕޯޓްކުރާ ނޫސްވެރިންނަށް އަމާޒުކޮށް ދޭ ހަމަލާތައް ވަނީ ވަރަށް ބޮޑަށް އިތުރުވެފައެވެ.
މި ހާދިސާއާ ގުޅިގެން އަސްކަރިއްޔާއިން ފިޔަވަޅު އަޅަން ނިންމި ނަމަވެސް، މީގެ ކުރިން އަރަބި ނޫސްވެރިންނާއި ފަލަސްތީނުގެ ނޫސްވެރިންނަށް އަމާޒުކޮށް ދީފައިވާ ނުރައްކާތެރި ހަމަލާތަކަށް އެއްވެސް އިންސާފެއް ލިބިފައި ނުވާކަން ފާހަގަކުރެވެއެވެ. މީގެ ކުރިން އިސްރާއީލު ސިފައިން ވަނީ މަޝްހޫރު ނޫސްވެރިޔާ ޝީރީން އަބޫ އާގިލާ ފަދަ އެތައް އަރަބި ނޫސްވެރިންނެއް ގަސްތުގައި މަރާލާފައެވެ. ނަމަވެސް އެފަދަ މައްސަލަތަކުގައި ކުށްވެރިވާ ސިފައިންނަށް އެއްވެސް އަދަބެއް ދީފައެއް ނުވެއެވެ.
ދުނިޔޭގެ އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި، އިސްރާއީލުން މިފަހަރު ފިޔަވަޅު އަޅަން މިއުޅެނީ ހަމަލާގެ ޝިކާރައަކަށްވީ ހުޅަނގުގެ ބޮޑު މީޑިއާއަކަށް ނިސްބަތްވާ ނޫސްވެރިންނަށް ވުމުންނެވެ. އަރަބި ނޫސްވެރިންނާ މެދު އިސްރާއީލުން ގެންގުޅޭ އަނިޔާވެރި ސިޔާސަތަށް އެއްވެސް ބަދަލެއް އައިސްފައި ނުވާކަން ފާހަގަކުރެއެވެ.
