ޔަމަނުގެ ހަނގުރާމަ ވަރުގަދަވެ، ސައުދީ އަރަބިއްޔާއާއި ޔަމަނުގެ ހޫތީންނާ ދެމެދު ކުރިމަތިލުންތައް އިތުރުވުމުން ފައިދާ ކުރާނީ ހަމައެކަނި އިޒުރޭލަށް ކަމަށް އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަގާއީ ވިދާޅުވެއްޖެއެވެ.
އީރާނުން ދެކޭގޮތުގައި މުސްލިމު ދެގައުމެއްގެ މެދުގައި ހިނގާ މި ހަނގުރާމައިގެ ސަބަބުން އިސްލާމީ އުންމަތް ބައިބައިވެ، އެއް ގައުމު އަނެއް ގައުމާ ދެކޮޅަށް ވަސީލަތްތައް ހޭދަކުރަންޖެހުމަކީ އިޒުރޭލަށް ލިބޭ ބޮޑު ހިތްހަމަޖެހުމެކެވެ. މީގެ އިތުރުން، މި ސަރަހައްދުގައި އިޒުރޭލާއި އެމެރިކާއިން އުފައްދާފައިވާ ނުތަނަވަސްކަމުގެ ސަމާލުކަން ޔަމަނު ހަނގުރާމައަށް ހުއްޓުމަކީ، އިޒުރޭލުން ފަލަސްތީނާއި ލުބުނާނުގައި ހިންގާ ހަމަލާތަކަށް އޮންނަ ބައިނަލްއަގުވާމީ ފިއްތުންތައް ކުޑަވެގެންދާނެ ކަމެކެވެ.
އީރާނުގެ ސިޔާސީ މާހިރުން ފާހަގަކުރާ ގޮތުގައި، ޔަމަނުގެ ހޫތީންނަކީ އިޒުރޭލާ ދެކޮޅަށް ސީދާ ހަމަލާދެމުންދާ "މުގާވަމާ" (ރެސިސްޓެންސް) ބާރަކަށް ވާއިރު، ސައުދީގެ ހަމަލާތައް ޔަމަނަށް އަމާޒުވުމުން ހޫތީންގެ ފޯކަސް ބަދަލުވެ އިޒުރޭލަށް ކުރާ ފިއްތުންތައް މަދުވެގެންދާނެއެވެ. ހަމައެއާއެކު، ޔަމަނުގެ ފަރާތުން ސައުދީއަށް ނުރައްކާ ބޮޑުވުމުން، ދިފާއީ އަދި އިންޓެލިޖެންސް އެހީތެރިކަން ހޯދުމަށް އިޒުރޭލާއެކު ގުޅުން ބަދަހިކުރުމުގެ ފުރުސަތު ސައުދީއަށް ބޮޑުވެއެވެ. މިއީ އިޒުރޭލުން މެދުއިރުމަތީގައި އެކަހެރިވުމުން ސަލާމަތްވުމަށް އަބަދުވެސް ބޭނުންވާ ސަރަހައްދީ ހަމަޖެހުމެކެވެ.
Advertisement
މި ނުރައްކާތެރި ހާލަތުން ސަރަހައްދު ސަލާމަތްކުރުމަށްޓަކައި، އީރާނުގެ ފޮރިން މިނިސްޓަރު އައްބާސް އަރާގްޗީ ވަނީ ސައުދީގެ ފޮރިން މިނިސްޓަރާ ގުޅުއްވައި، ސައުދީއާއި ހޫތީންގެ މެދުގައި ސުލްހައިގެ ވާހަކަތައް ކުރިއަށްގެންދިއުމަށް ބާރުއަޅުއްވާފައެވެ. އީރާނުން ވަނީ މި ހަނގުރާމަ ހުއްޓުވުމަށްޓަކައި ދެ ފަރާތުގެ މެދުގައި މެދުވެރިއެއްގެ ބައި އަދާކުރަން އެގައުމު ފުރިހަމައަށް ތައްޔާރަށް އޮތްކަން ހާމަކޮށް، މުސްލިމް ގައުމުތަކުގެ މެދުގައި އޮންނަ ހިޔާލުތަފާތުވުންތައް ސުލްހަވެރިކަމާއެކު ހައްލުކުރުމަށް ގޮވާލާފައެވެ.
