ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަނބިކަނބަލުން މެޑަމް ސާޖިދާ މުހައްމަދު، 1988 ނޮވެންބަރު ތިނެއްގެ އުދުވާނީ ހަމަލާގައި ރާއްޖޭގެ ދިފާއުގައި ހަނގުރާމަކޮށް ޝަހީދުވި ބަތަލު، ޝަހީދު ކޯޕްރަލް ހުސައިން އާދަމްގެ މަންމަގެ އަރިހަށް އިހުތިރާމްގެ ޒިޔާރަތެއް ކުރައްވައިފި އެވެ.
މެޑަމް ސާޖިދާ މި ޒިޔާރަތް ކުރެއްވީ އެކަމަނާ މިހާރު ކުޅުދުއްފުށި ސިޓީއަށް ކުރައްވަމުން ގެންދަވާ ދަތުރުފުޅުގެ ތެރެއިން، މިއަދު އިރުއޮއްސުނު ވަގުތުގަ އެވެ. ޝަހީދު ހުސައިން އާދަމްގެ އުފަން ގެ، "މާވާގެ" އަށް ވަޑައިގެން އެކަމަނާ ވަނީ ޝަހީދުގެ މަންމައާ ބައްދަލުކުރައްވައި، އޭނާގެ ހާލު އޮޅުންފިލުއްވާފަ އެވެ. މި ބައްދަލުކުރެއްވުމުގައި އާއިލާގެ ފަރާތުން ހުރި ކަންބޮޑުވުންތައް އަޑުއައްސަވައި، އެކަންކަމާ ގުޅޭގޮތުން މެޑަމް ސާޖިދާ މަޝްވަރާކުރެއްވި އެވެ.
ނޮވެންބަރު ތިނެއްގެ އުދުވާނީ ހަމަލާއަކީ ބޭރުގެ ހަނގުރާމަވެރި ޖަމާއަތެއްގެ އެހީތެރިކަމާއެކު، ވެރިކަމުގެ ދަހިވެތިކަމުގައި ރާއްޖޭގެ ހާއިނުންގެ ބަޔަކު އިސްވެ ތިބެ ދިން ރަހުމްކުޑަ ހަމަލާއެކެވެ. މި ނުރައްކާތެރި ހަމަލާއިން ގައުމު ސަލާމަތްވުމުގެ އެންމެ ބޮޑު ސަބަބަކީ، ސިފައިންގެ މައި މަރުކަޒުގެ ބޮޑު ގޭޓުގެ ޑިއުޓީގައި ހުރި ޒުވާން ސިފައިންގެ މީހާ، ހުސައިން އާދަމް ދެއްކެވި ހިތްވަރާއި ޖެހިލުންކުޑަ ކަމެވެ. ދުޝްމަނުންގެ ވަޒަންތައް އަރައި ޝަހީދުވެގެން ވެއްޓެންދެން އޭނާ ވަނީ ހުއްޓުމެއްނެތި ރައްދު ހަމަލާދީ، ބާގީން މައި މަރުކަޒަށް ވަނަނުދީ ހިފަހައްޓާފަ އެވެ.
ޝަހީދު ހުސައިން އާދަމްގެ ބައްޕަ، އާދަމް މުހައްމަދު ނިޔާވެފައިވަނީ 2023 ވަނަ އަހަރުގެ އޮގަސްޓް މަހުގެ 28 ވަނަ ދުވަހު، އުމުރުން 89 އަހަރުގަ އެވެ. އޭނާ ނިޔާވީ މުސްކުޅި ބަލީގައި އުޅުއްވުމަށްފަހު ކުޅުދުއްފުށީ ހޮސްޕިޓަލުގައި ފަރުވާދެމުން ދަނިކޮށެވެ.
ވޭތުވެދިޔަ ތަނުގައި ޝަހީދުންގެ ދުވަސް ފާހަގަކުރުން ކުލަފަނޑުވެފައި އޮތް ނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވަނީ މި ދުވަސް ވަރަށް ކުލަގަދަކޮށް، އޭގެ ހަގީގީ ޝަރަފުގައި ފާހަގަކުރަން އަލުން ފައްޓަވާފަ އެވެ. މީގެ އިތުރުން، ގައުމަށްޓަކައި ގުރުބާންވި ޝަހީދުންގެ އާއިލާތަކަށް ދޭ މާލީ އެހީތެރިކަން އަލުން އިއާދަކޮށް، އެ އާއިލާތަކަށް އެހީތެރިކަން ފޯރުކޮށްދިނުމަށް މި ސަރުކާރުން ވަނީ ހާއްސަ އިސްކަމެއް ދީފަ އެވެ.
