ނޭޕާލްގެ އާ ބޮޑުވަޒީރުގެ މަގާމަށް ރައިޓް އޮނަރަބަލް ބަލެންދްރަ ޝާހު އިންތިހާބުވެވަޑައިގަތުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމަނިކުފާނަށް ތަހުނިޔާ ފޮނުއްވައި ފިއެވެ.
ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ފޮނުއްވި މި ތަހުނިޔާގެ ސިޓީފުޅުގައި، ނޭޕާލްގެ އާ ބޮޑުވަޒީރަށް ހޫނު މަރުހަބާއެއް ވަނީ ދަންނަވާފަ އެވެ.
ރައީސުލްޖުމްހޫރިއްޔާގެ ސިޓީފުޅުގައި ވަނީ މި މަހުގެ ކުރީކޮޅު ނޭޕާލްގައި ބޭއްވުނު އާންމު އިންތިހާބުގެ މައްޗަށް އަލިއަޅުއްވާލެއްވި އެވެ. އެ މަނިކުފާނު ފާހަގަކުރެއްވި ގޮތުގައި އެ އިންތިހާބަކީ އެ ގައުމުގެ ގިނަ އަދަދެއްގެ ޒުވާނުންގެ ބައިވެރިވުމާއެކު އިސްލާހީ ބަދަލުތަކަށް މަގުފަހިކުރުމަށް ގޮވާލައި ގެނެވުނު މުހިންމު ބަދަލެކެވެ. އަދި މިއީ ނޭޕާލްގެ ދިމިގުރާތީ ދަތުރުގައި އެ ގައުމުގެ ރައްޔިތުން އުންމީދުކުރާ ފަދަ ހަމަޖެހުމާއި ތަރައްގީގެ އާ ބާބެއްގެ ފެށުން ކަމުގައިވެސް ރައީސް ސިފަކުރެއްވި އެވެ.
ދިވެހިރާއްޖެ އާއި ނޭޕާލާ ދެމެދު އޮތް ގުޅުމާ ބެހޭގޮތުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ނޭޕާލަކީ ރާއްޖޭގެ ވަރަށް މުހިންމު ބައިވެރިއެއް ކަމަށެވެ. އަދި ދެކުނު އޭޝިއާ ސަރަހައްދުގައި ހުރި އެކިއެކި ގޮންޖެހުންތައް ހައްލުކުރުމުގައި ދެ ގައުމުން ގެންގުޅެނީ ވަރަށް އެއްގޮތް ވިސްނުންތަކެއްކަން އެ މަނިކުފާނު ފާހަގަކުރެއްވި އެވެ.
އޭގެ އިތުރުން، ދެ ގައުމުގެ ދެމެދުގައި އޮންނަ ގުޅުން އިތުރަށް ބަދަހިކުރުމަށާއި، ދެކުނު އޭޝިއާ އާއި ބައިނަލްއަގުވާމީ މައިދާނުގައި ދެ ގައުމު ގުޅިގެން މަސައްކަތް ކުރުމަށް ރާއްޖެއިން އޮތީ ތައްޔާރަށް ކަމަށް ރައީސް މުޢިއްޒު ވަނީ ވިދާޅުވެފަ އެވެ.
ރައީސް އެ ސިޓީފުޅު ނިންމަވާލަމުން ވިދާޅުވީ ނޭޕާލްގެ އައު ބޮޑުވަޒީރަށް ފުރިހަމަ ސިއްހަތާއި އުފާފާގަތިކަމަށް އެދިވަޑައިގަންނަވާ ކަމަށެވެ. އަދި ނޭޕާލްގެ ރައްޔިތުންނަށް އިތުރު ތަރައްގީ އާއި ކުރިއެރުމަށް އެދިވަޑައިންނަވާ ކަމަށް ވެސް އެ މަނިކުފާނު ވިދާޅުވި އެވެ.
