މާލެ ސަރަހައްދަށް ދިމާވެފައިވާ ޕާކިންގް މައްސަލައަށް ދާއިމީ ހައްލެއް ހޯދުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، 7 ޕާކިން ބިލްޑިންގުގެ އަމަލީ މަސައްކަތް ވަރަށް އަވަހަށް ފެށޭނެ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުހައްމަދު އަމީން ވިދާޅުވެއްޖެއެވެ.

މިނިސްޓަރު އަމީން އެކްސްގައި ކުރެއްވި ޕޯސްޓެއްގައި ވިދާޅުވީ، މާލެ ސަރަހައްދުގެ ދަތުރުފަތުރާއި ހިނގާބިނގާވެ އުޅުމަށް އާ ފިޔަވަޅުތަކެއް އެޅިގެންދާނެ ކަމަށެވެ. މިގޮތުން އަލަށް އިމާރާތްކުރާ 7 ޕާކިން ބިލްޑިންގުގެ ސަބަބުން ހަތަރު ފުރޮޅުލީ އުޅަނދުތަކަށް 2،600 އަށްވުރެ ގިނަ ޖާގަ އަދި ސައިކަލު ފަދަ ދެ ފުރޮޅުލީ އުޅަނދުތަކަށް 1،000 އަށްވުރެ ގިނަ ޕާކިން ޖާގަ ލިބިގެންދާނެއެވެ.

މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ ދަށުން، މާލޭގެ މަގުތަކުގެ ތޮއްޖެހުން ކުޑަކުރުމަށާއި، ގަވާއިދާ ހިލާފަށް މަގުމަތީގައި ޕާކުކުރުން ހުއްޓުވައި، މަގުތަކުގެ ރައްކާތެރިކަން އިތުރުކުރުމަށް ކުރިއަށްގެންދާ މުހިންމު މަސައްކަތެކެވެ.

މާލޭގައި އެންމެ ބޮޑުވެފައިވާ ޕާކިންގެ މައްސަލައަށް ހައްލެއް ހޯދުމަށް ކުރިއަށްގެންދާ މި މަޝްރޫއާ ގުޅޭގޮތުން ރައީސުލްޖުމްހޫރިއްޔާ މީގެ ކުރިން ވިދާޅުވެފައިވަނީ، މާލޭގެ ހަތަރު ސަރަހައްދެއްގައި ތިމާވެއްޓާ ރައްޓެހި، އަދި އިއާދަކުރަނިވި ހަކަތައިން ކަރަންޓު އުފެއްދޭނެ ގޮތަށް ފަރުމާކޮށްފައިވާ ޕާކިން ބިލްޑިންތަކެއް ބިނާކުރައްވާނެ ކަމަށެވެ.

މި މަޝްރޫއު ކުރިއަށް ގެންދިއުމަށް ހަމަޖެހިފައިވަނީ އިންޑިއާގެ ކޮންސެޝަނަލް ފައިނޭންސިން ނުވަތަ ކުޑަ އިންޓްރެސްޓެއްގައި ދޫކުރާ ލޯނުގެ އެހީގައއި ކަމަށް ރައީސް މުއިއްޒު ވަނީ މީގެ ކުރިން ވިދާޅުވެފަ އެވެ. މި އިމާރާތްތަކުގެ މަސައްކަތް ނިމުމުން މާލޭގެ މަގުތަކުގައި ޕާކުކޮށްފައި ހުންނަ އުޅަނދުތަކުގެ އަދަދު މަދުވެ، ހިނގާބިނގާވެ އުޅޭ މީހުންނަށާއި ދުއްވާ އެއްޗެއްސަށް ބޮޑު ލުޔެއް ލިބިގެންދާނެ އެެ.